Yaelal dꞌa yibꞌan̈ Judá yuj schucal
17
Ix yalan Jehová icha tic: Ex aj Judá, maxtzac el e chucal dꞌa e pensar. Max satlaj e chucal chiꞌ dꞌa schiquintac eyaltar. Scan yechel icha letra tzꞌochcan dꞌa junoc qꞌuen qꞌueen yuj qꞌuen cincel ma yuj qꞌuen diamante.2 A ebꞌ eyuninal snacot juntzan̈ altar ebꞌ, snaanpaxcot juntzan̈ te teꞌ yechel comon dios ebꞌ, teꞌ ay dꞌa yichtac te teꞌ cꞌayum xiil dꞌa juntzan̈ tzalquixtac chaan̈ yajqꞌuei, 3 yedꞌ dꞌa jolomtac vitz dꞌa stitaquel chon̈abꞌ. Yuj e chucal tzeyacꞌoch dꞌa juntzan̈ lugar yic ejmelal bꞌaj chaan̈ dꞌa masanil e macbꞌen tic, ol vacꞌ elcꞌajbꞌat e bꞌeyumal yedꞌ tastac ay dꞌayex.
4 Yovalil ol ex icꞌjoquel dꞌa sat lum e lum tic, aton lum ix vacꞌ e macbꞌenej. Ol ex vacꞌcanoch schecabꞌoc ebꞌ ayoch ajcꞌolal dꞌayex dꞌa jun luum man̈ eyojtacoc, yujto toxo ix cot yoval in cꞌol dꞌayex. A yoval in cꞌol chiꞌ, lajan icha junoc cꞌacꞌ malaj bꞌaqꞌuin̈ stupi, xchi Jehová.
Juntzan̈xo lolonel
5 Ix yalanxi Jehová icha tic: Obꞌiltac ebꞌ tzin icꞌanel dꞌa scꞌool, axo anima syacꞌoch ebꞌ yipoc scꞌol yic scolvaj yedꞌ ebꞌ snaani.
6 Lajan val ebꞌ icha teꞌ qꞌuiix dꞌa tzꞌinan luum, malaj bꞌaqꞌuin̈ syil vachꞌil. Sqꞌuibꞌqꞌue teꞌ dꞌa caltac qꞌueen yedꞌ dꞌa lum luum ay atzꞌam atzꞌam dꞌay yedꞌ bꞌaj max yal scajnaj anima.
7 Palta te vachꞌ yic ebꞌ anima tzin acꞌanoch yipoc scꞌool.
8 Lajan val ebꞌ icha te teꞌ avabꞌil dꞌa stitac a aꞌ, sbꞌat val schꞌan̈al yibꞌ bꞌaj sbꞌey a aꞌ chiꞌ. Malaj sna teꞌ vachꞌchom te ay cꞌacꞌ, cꞌayumn̈ej xil teꞌ. Dꞌa stiempoal malaj n̈abꞌ, malaj jabꞌoc tzꞌicꞌan teꞌ, malaj bꞌaqꞌuin̈ syactej yacꞌan sat teꞌ. Icha chiꞌ yaj ebꞌ.
9 ¿Toc ay junoc tas yelxo val acꞌum musansatil, icha spensar ebꞌ anima? Malaj sbꞌonabꞌil jun spensar ebꞌ chiꞌ. ¿Mach val syal yojtacaneli?
10 A in val Jehová in tzin chꞌolbꞌitej tastac ay dꞌa junjun pensar. Vojtac val tastac tzꞌecꞌ dꞌa spixan junjun anima. A in svacꞌ spac dꞌa junjun dꞌa smojal icha scꞌulej, xchi Jehová.
11 A ebꞌ tzꞌoch bꞌeyumal yuj ixtoj anima, lajan val ebꞌ icha junoc nocꞌ much sman̈elta n̈olobꞌ man̈ yicoc. Ayic te tecꞌanto ebꞌ ol ecꞌxoc sbꞌeyumal ebꞌ chiꞌ, axo ol aj scheclaji to malaj spensar ebꞌ.
12 A scajnubꞌ Dios bꞌobꞌilcan yictax yichbꞌanil, lajan val icha junoc palacio te vachꞌ yilji, chaan̈ bꞌobꞌilcanqꞌuei.
13 Mamin Jehová, a ach ayachoch yipoc co cꞌol a on̈ israel on̈ tic. Masanil ebꞌ tzach actancani, ol qꞌuixvoccanel ebꞌ. Masanil ebꞌ tzꞌel dꞌa a tzꞌey, ol satcanel ebꞌ icha tzꞌaj satel junoc bꞌi tzꞌibꞌabꞌilem dꞌa cal pococ. Ol satcanel ebꞌ yujto tzach yactejcan ebꞌ, yujto a ach tic lajan ach icha junoc sjaj a aꞌ.
Ix tevi vin̈aj Jeremías dꞌa Jehová
14 Mamin Jehová, acꞌ bꞌoxoc in cꞌool yic tzin bꞌoxicani. Col in, yic vachꞌ tzin colchajcani, yujto an̈ej dꞌayach sval vachꞌ lolonel.
15 Syal ebꞌ anima dꞌayin icha tic: ¿Bꞌaqꞌuin̈ ol elcꞌoch slolonel Jehová alnac dꞌayon̈? Elocabꞌcꞌoch tas syal chiꞌ ticnaic, xchi ebꞌ.
16 Mamin, malaj bꞌaj ix in tevi dꞌayach yic tzin cꞌanancot junoc tas tzꞌicꞌan satel ebꞌ anima. Max in nibꞌej pax sjavi junoc yaelal dꞌa yibꞌan̈ ebꞌ. A ach tic ojtac tas ix in cꞌanaꞌ, yujto dꞌa ichan̈ ix valaꞌ.
17 Man̈ in acꞌoch dꞌa xivcꞌolal, yujto a dꞌayach tzin col in bꞌa ayic ay in och dꞌa syaelal.
18 Qꞌuixvocabꞌcanel ebꞌ tzin pechan bꞌeyecꞌoc, mocabꞌ in qꞌuixvoquel a in tic. Xivocabꞌ ebꞌ chiꞌ, mocabꞌ in xiv a in tic. Acꞌcot yaelal dꞌa yibꞌan̈ ebꞌ, satel ebꞌ dꞌa juneln̈ej.
A tas ix alchaj yuj scꞌual icꞌoj ip
19 Ix yalan Jehová dꞌayin icha tic: Ixic, bꞌat ochan̈ lin̈an dꞌa spuertail chon̈abꞌ bꞌaj tzꞌeli tzꞌoch ebꞌ sreyal Judá. Ataꞌ tzalel in lolonel. Ichan̈ej chiꞌ tza cꞌulej dꞌa juntzan̈ spuertail Jerusalén. 20 Tzalan dꞌa ebꞌ anima icha tic: Ex rey yedꞌ jantac ex cajan ex dꞌa Jerusalén tic yedꞌ e masanil ex aj Judá, machtac ex tzex och dꞌa juntzan̈ puerta tic, abꞌec val tas syal Jehová: 21 Tzeyil val e bꞌa, man̈ e cuch eyicatz dꞌa scꞌual icꞌoj ip, man̈ eyicꞌochta dꞌa spuertail Jerusalén tic, yic max ja yaelal dꞌa eyibꞌan̈ yuuj. 22 Man̈ eyicꞌpaxelta junoc eyicatz dꞌa yol e pat dꞌa scꞌual icꞌoj ip chiꞌ. Malajocabꞌ junoc munlajel tze cꞌulej dꞌa jun cꞌu chiꞌ. Nivanocabꞌ yelcꞌoch dꞌayex icha ajnac valan dꞌa ebꞌ e mam eyicham. 23 Palta man̈ schanacoc yabꞌ ebꞌ tas valnac chiꞌ. Spitejnac sbꞌa ebꞌ, man̈ scꞌanabꞌajejnacoc scachnabꞌil ebꞌ vacꞌnac.
24 A in val Jehová in svalaꞌ: Cꞌanabꞌajejec tas svalaꞌ, man̈ eyicꞌcot eyicatz dꞌa spuertail chon̈abꞌ tic dꞌa scꞌual icꞌoj ip. Nivanocabꞌ yelcꞌoch jun cꞌu chiꞌ dꞌayex, malajocabꞌ junoc munlajel tze cꞌulej. 25 Tato tze cꞌanabꞌajej tas sval tic, ayn̈ej ebꞌ yin̈tilal vin̈aj David ol ochn̈ej reyal dꞌa in chon̈abꞌ tic. Ol ochta ebꞌ dꞌa spuertail yedꞌ carruaje n̈erbꞌil yuj nocꞌ chej, ajun ebꞌ eyajalil ex aj Judá ex tic yedꞌ pax ebꞌ aj Jerusalén tic. A jun chon̈abꞌ tic malaj bꞌaqꞌuin̈ ol can tzꞌinan. 26 Ol laj cot ebꞌ anima dꞌa junjun chon̈abꞌ dꞌa yol yic Judá, aton juntzan̈ ay dꞌa spatic yichan̈ Jerusalén tic, dꞌa yol yic Benjamín, dꞌa acꞌlic, dꞌa tzalquixtac yedꞌ pax dꞌa yol yic Neguev. Ol yicꞌcot nocꞌ nocꞌ ebꞌ silabꞌil yic sn̈usjitzꞌa dꞌa templo. Ol yicꞌpaxcot juntzan̈xo nocꞌ silabꞌ ebꞌ, ixim trigo, incienso yedꞌ ofrenda yic syacꞌan yuj diosal ebꞌ dꞌayin.
27 Palta tato man̈ ol e cꞌanabꞌajej in checnabꞌil tic jun, tato man̈ nivanoc yelcꞌoch jun cꞌual chiꞌ dꞌayex, tato ol eyicꞌochta eyicatz dꞌa spuertail chon̈abꞌ tic dꞌa jun cꞌu chiꞌ, ol vacꞌ n̈usjoctzꞌa masanil palacio dꞌa Jerusalén tic. Man̈xa mach ol yal smacꞌan tup jun cꞌacꞌ chiꞌ, xchi Jehová, xa chi, xchi dꞌayin.