Schecnabꞌil Jehová dꞌa vin̈aj Jeremías
16
Ix lolon Jehová dꞌayin, ix yalan icha tic: 2 Man̈ acꞌoch etbꞌeyum, man̈ ol aj uninal dꞌa jun chon̈abꞌ tic. 3 A in Jehová in tic ol val dꞌayach tas ol javoc dꞌa yibꞌan̈ ebꞌ unin ol aljoc dꞌa jun chon̈abꞌ tic yedꞌ dꞌa yibꞌan̈ ebꞌ mamabꞌil nunabꞌil. 4 Ol cham ebꞌ yuj juntzan̈ ilya te ov, malaj mach ol ocꞌ yuj ebꞌ, malaj mach ol mucan ebꞌ. Toxon̈ej ol can teljabꞌ ebꞌ dꞌa sat luum, icha tzꞌaj nocꞌ nocꞌ. A oval yedꞌ vejel ol icꞌan scham ebꞌ. Axo snivanil ebꞌ chiꞌ, ol laj chijocbꞌat yuj nocꞌ ostoc yedꞌ nocꞌ chium nocꞌ dꞌa caltac teꞌ, xchi Jehová dꞌayin.5 Ix yalanxi Jehová dꞌayin icha tic: Man̈ ach och dꞌa yol junoc pat bꞌaj ayecꞌ ebꞌ anima iloj acꞌval yuj chamnac. Man̈ ach ocꞌ yedꞌ ebꞌ, man̈ acꞌ snivanil scꞌol ebꞌ, yujto a in Jehová in svalaꞌ to ix viqꞌuel juncꞌolal dꞌa ebꞌ, maxtzac in xajanej ebꞌ, maxtzac ocꞌ in cꞌol dꞌa jun chon̈abꞌ tic. 6 Ol cham ebꞌ icham anima yedꞌ ebꞌ unin. Man̈xalaj mach ol mucan ebꞌ, malaj mach ol ocꞌ yuj ebꞌ. Malaj mach ol yacꞌ echnaj snivanil, ma sjoxanel xil sjolom yuj schꞌoxanel scuscꞌolal yuj ebꞌ. 7 Man̈xalaj mach ol bꞌoan vael yuj chamel chiꞌ, yic tzꞌacꞌji snivanil scꞌol ebꞌ ayto yuj sbꞌa yedꞌ jun ix cham chiꞌ, vachꞌchom a ebꞌ mamabꞌil nunabꞌil schami.
8 An̈ejtonaꞌ man̈ ach och cꞌojan dꞌa yol junoc pat a vaꞌi yedꞌ ucꞌan aꞌ bꞌaj ay junoc qꞌuin̈. 9 Yujto a in Jehová in Yajal in dꞌa Smasanil, e Diosal in, a in sval icha tic: Ol vacꞌ lajvoc qꞌuin̈ yic tzalajcꞌolal, icha qꞌuin̈ yic nupnajel dꞌa jun chon̈abꞌ tic. A dꞌa yol e tiempoal tic ol ujoc jun tic, ol eyil val.
10 Ayic ol alan jun lolonel tic dꞌa ebꞌ etchon̈abꞌ tic, ol scꞌanbꞌej ebꞌ dꞌayach: ¿Tas yuj ol yacꞌcot jun nivan yaelal chiꞌ Jehová dꞌa quibꞌan̈? ¿Tas chucal ix co cꞌulej? ¿Tas co mul ix och dꞌa Jehová co Diosal? xcham ebꞌ. 11 Tza pacan dꞌa ebꞌ icha tic: A val Jehová tzꞌalan icha tic: A ebꞌ e mam eyicham ix in yactejcan ebꞌ, ix bꞌat tzacꞌan ebꞌ dꞌa spatic comon dios, ix och ebꞌ ejmelal dꞌay. Ix in spaticanel ebꞌ, maj scꞌanabꞌajej scꞌaybꞌubꞌal ebꞌ ix vacꞌaꞌ. 12 A exxo pax tic, ecꞌal te chuc tze cꞌulej dꞌa yichan̈ ebꞌ e mam eyicham chiꞌ. Junjun ex tze cꞌulej chucal scot dꞌa e pensar, maxtzac e cꞌanabꞌajej tas svalaꞌ. 13 Yuj chiꞌ ol ex viqꞌuel dꞌa jun lum tic, ol ex vacꞌancanbꞌat dꞌa junocxo chon̈abꞌ man̈ eyojtacoc, man̈ yojtacoc pax ebꞌ e mam eyicham. Ataꞌ cꞌual dꞌacꞌval ol eyacꞌ servil juntzan̈ comon dios. Man̈xo ol ocꞌ in cꞌol dꞌayex, xchi Jehová, xa chi dꞌa ebꞌ.
14 Palta a in Jehová in svacꞌ in tiꞌ: A ticnaic, ayic slocan in bꞌi ebꞌ anima tic, syalan ebꞌ icha tic: Dꞌa sbꞌi Jehová Dios icꞌannaquelta ebꞌ co mam quicham dꞌa Egipto, xchi ebꞌ. 15 Palta ol javoc jun tiempoal, ol yalan ebꞌ anima icha tic: Dꞌa sbꞌi Jehová, aton ix icꞌanelta ebꞌ israel dꞌa juntzan̈ chon̈abꞌ dꞌa norte yedꞌ dꞌa juntzan̈xo chon̈abꞌ bꞌaj ix saclemcanbꞌat ebꞌ, xcham ebꞌ. Yujto a in ol vicꞌ meltzaj ebꞌ etisraelal dꞌa schon̈abꞌ, aton lum luum vacꞌnaccan dꞌa ebꞌ e mam eyicham.
16 Palta ayic manto ol ujoc jun chiꞌ, ol vicꞌcot ebꞌ yajcꞌol ebꞌ israel yic tzul yamji ebꞌ yuj ebꞌ, icha tzꞌaj syaman nocꞌ chay ebꞌ yamum chay yedꞌ schimpa, ma icha ebꞌ pechum nocꞌ sbꞌat tzacꞌan dꞌa spatic nocꞌ nocꞌ dꞌa tzalquixtac, tzecꞌ sayan nocꞌ ebꞌ dꞌa yoltac qꞌuen n̈aqꞌueen yedꞌ dꞌa yoltac sjatelal qꞌueen. 17 Yujto svil masanil tastac scꞌulej ebꞌ. Malaj junoc mach syal scꞌubꞌanel sbꞌa dꞌa yol in sat, ma scꞌubꞌanel schucal dꞌa vichan̈. 18 Ol vacꞌ spac dꞌa ebꞌ yuj chucal scꞌulej chiꞌ, yujto ix yixtejbꞌat in lum ebꞌ yuj juntzan̈ sdiosal to man̈ pitzanoc, yajbꞌentac icha snivanil junoc chamnac. Ix scꞌulej ebꞌ tas to max scha in cꞌool, xchi Jehová.
Slesal vin̈aj Jeremías
19 Mamin Jehová, vilumal ach, in tan̈vumal aji. A ach val tzin a coloꞌ ayic ay in och dꞌa syaelal. Ol cot juntzan̈ chon̈abꞌ bꞌaj slajvicꞌoch lum luum tic, ol ul yalan ebꞌ dꞌayach: A ebꞌ co mam quicham, an̈ej dꞌa juntzan̈ comon dios malaj vachꞌ yochi, malaj yopisio, an̈ej taꞌ yacꞌnaquem sbꞌa ebꞌ.
20 ¿Tom syal sbꞌoan sdiosal ebꞌ anima? Tato a ebꞌ sbꞌoani, man̈ diosoc syal chiꞌ, xcham ebꞌ, xin chi.
21 Ix yalanxi Jehová icha tic: Yuj chiꞌ dꞌa juneln̈ej ol vacꞌ yojtaquejel in poder ebꞌ. Icha val chiꞌ ol aj yojtacanel ebꞌ to a in Jehová in a inn̈ej Dios in, xchi.