Yaelal ol javoc dꞌa yibꞌan̈ Judá
15
Ix tacꞌvi Jehová dꞌayin icha tic: Vachꞌchom a vin̈aj Moisés, ma vin̈aj Samuel tzul tevoc dꞌayin yuj ebꞌ, man̈xo ol ocꞌ in cꞌol dꞌa in chon̈abꞌ tic. Al dꞌa ebꞌ to tzꞌel ebꞌ dꞌa vichan̈, sbꞌat ebꞌ. 2 Tato ay ebꞌ scꞌanbꞌan dꞌayach, bꞌajtil tzon̈ bꞌati, tato xchi ebꞌ, al juntzan̈ sval tic dꞌa ebꞌ:A mach ayoch dꞌa yibꞌan̈ scham yuj ilya, aꞌ ilya chiꞌ ol milanoc. A mach ayoch dꞌa yibꞌan̈ scham dꞌa oval, a dꞌa oval chiꞌ ol chamoc. A mach ayoch dꞌa yibꞌan̈ scham yuj vejel, a vejel chiꞌ ol milanoc. A pax mach ayoch dꞌa yibꞌan̈ yicꞌjibꞌat dꞌa chꞌoc chon̈abꞌil, ol icꞌjocn̈ejbꞌatoc, xa chi.
3 A in Jehová in svalaꞌ: Ol vacꞌcot chan̈ macan̈ yaelal dꞌa yibꞌan̈ ebꞌ anima tic: Ol cham ebꞌ dꞌa scal oval, ol n̈erjoc bꞌeyecꞌ snivanil ebꞌ yuj nocꞌ tzꞌiꞌ, ol chijocbꞌat ebꞌ yuj nocꞌ ostoc, axo nocꞌ caltacteꞌal nocꞌ ol vachꞌ lajanel ebꞌ. 4 Ol javoc jun yaelal chiꞌ yuj val juntzan̈ chucal ix scꞌulej vin̈aj Manasés yuninal vin̈aj Ezequías dꞌa Jerusalén, ayic ayoch vin̈ reyal dꞌa Judá. Masanil chon̈abꞌ dꞌa yolyibꞌan̈qꞌuinal tic, ol te xiv ebꞌ yilanoch juntzan̈ yaelal ol javoc dꞌa yibꞌan̈ in chon̈abꞌ tic.
5 Ex aj Jerusalén, ¿machto val ol ocꞌ scꞌol dꞌayex? ¿Machto val ol cus scꞌol eyuuj? ¿Machto val ol och ilcꞌolal eyuuj?
6 A in Jehová in svalaꞌ, a ex tic ix in e patiquejeli, ex te juvieli. Toxo ix in te tzactzaj ex vacꞌan nivancꞌolal, yuj chiꞌ toxo ix vicꞌchan̈ in cꞌabꞌ vacꞌan eyaelal yic tzex in sataneli.
7 Ol ex viqꞌuelta dꞌa yoltac e chon̈abꞌ dꞌa yol e macbꞌen tic, ol ex in saclemejbꞌat icha tzꞌaj saclem smatzꞌil ixim trigo yuj icꞌ. Ol vacꞌan satjoquel in chon̈abꞌ tic. Man̈xa junoc eyuninal ol vacꞌcani, yujto max yal e cꞌol tzeyactejcan e chuc bꞌeybꞌal.
8 Vuujn̈ej tzijtum ol ajcan ebꞌ ix ix ol cham yetbꞌeyum, icha val yarenail stiꞌ aꞌ mar maxtzac bꞌischaji. Dꞌa chimcꞌualil ol javoc jun yaelal dꞌa yibꞌan̈ ebꞌ ix nunabꞌil aybꞌat yuneꞌ dꞌa oval, ayn̈ej ebꞌ nancꞌolal ol javoc cuscꞌolal yedꞌ xivcꞌolal dꞌa yibꞌan̈ ebꞌ.
9 A ebꞌ ix nunabꞌil man̈ jantacoc yuneꞌ, tzꞌel yip ebꞌ ix yuj qꞌuixvelal, maxtzac yal yicꞌan yicꞌ ebꞌ ix, emnaquilxon̈ej tzꞌajcan ebꞌ ix. A cꞌualil smeltzajcanoch dꞌacꞌvalil dꞌa ebꞌ ix. Tato ayto ebꞌ ol can dꞌa yol schon̈abꞌ chiꞌ, a in Jehová in svalaꞌ to ol vacꞌ miljoccham ebꞌ yuj ebꞌ ajcꞌool, xchi Jehová.
Scuscꞌolal vin̈aj Jeremías
10 Nunin, obꞌiltac in. ¿Tas val yuj ix in acꞌ aljoc? An̈ej val oval yedꞌ telajbꞌail svacꞌ yedꞌ masanil anima. Malaj junoc mach bꞌaj ix vacꞌ tumin majanil, malaj pax mach bꞌaj ix in majnej qꞌueen, palta masanil ebꞌ tzin catabꞌani.
11 Mamin Jehová, elocabꞌcꞌoch bꞌaj tzin scatabꞌej ebꞌ chiꞌ tato chuc ix vutej ach vacꞌan servil, tato maj in cꞌan a vachꞌcꞌolal dꞌa yibꞌan̈ ebꞌ ayoch ajcꞌolal dꞌayin, ayic ayoch ebꞌ dꞌa cuscꞌolal yedꞌ dꞌa syaelal.
Yaelal ol javoc dꞌa yibꞌan̈ ebꞌ israel
12 Ix yalan Jehová icha tic: Ex aj Judá, ¿toc ay mach syal smacꞌan can̈chaj qꞌuen bronce yedꞌ qꞌuen hierro? Icha chiꞌ yaj ebꞌ ajcꞌol ol cot dꞌa stojolal norte, man̈ ol techaj eyacꞌan oval yedꞌ ebꞌ.
13 Yuj val jantac e chucal ex aj Israel, yuj chiꞌ a val e bꞌeyumal yedꞌ masanil tas ay dꞌa sat e lum tic, ol vacꞌ dꞌa ebꞌ eyajcꞌool chiꞌ. Nabꞌan̈ej ol yicꞌbꞌat ebꞌ, man̈ ol stupcanlaj ebꞌ dꞌayex.
14 Ol ex vacꞌcanoch schecabꞌoc ebꞌ eyajcꞌol chiꞌ dꞌa jun lum luum man̈ eyojtacoc, yujto a yoval in cꞌool lajan icha teꞌ cꞌacꞌ, ol ex satel yuuj, xchi Jehová.
Ix tevi val vin̈aj Jeremías dꞌa Jehová
15 Mamin Jehová, ojtac smasanil, na in coti, colin. Pactzitej dꞌa ebꞌ vajcꞌool. Mocabꞌ acꞌ nivancꞌolal ebꞌ, pactzitej dꞌa ebꞌ yacbꞌan manto in smilcham ebꞌ. Ilnabꞌ val, uuj tzin sbꞌuch ebꞌ.
16 Ayic tzalan a lolonel dꞌayin tzin chan̈ej vabꞌi, an̈ej ayoch in tzalajcꞌolaloc, yujto ic in Mamin Jehová in Diosal, Yajal ach dꞌa Smasanil.
17 Man̈ junn̈ejoc tzin ecꞌ yedꞌ ebꞌ stzalaj scꞌulan chucal. Yuj vopisio acꞌnac, in chꞌocoj tzin eqꞌui, yujto svabꞌ syail yoval a cꞌol edꞌoc.
18 ¿Tas val yuj malaj bꞌaqꞌuin̈ tzꞌoch vaan in yaelal icha junoc echen malaj yan̈al? ¿Tom ol in ixtej icha aꞌ elumaꞌ stupemi?
Spacanxi Jehová
19 Yuj chiꞌ ix tacꞌvi Jehová dꞌayin icha tic: Tato tzach meltzajcot dꞌayin, ol ach in chaxi, icha chiꞌ bꞌian ol yal in acꞌan servil. Tato max a comon alej comon lolonel, an̈ej tas nivan yelcꞌoch tzalaꞌ, a ach ol ach lolon vuuj. A ebꞌ anima ol meltzajcot ebꞌ ul yabꞌan a loloni, man̈oc ach ol a cha abꞌ slolonel ebꞌ.
20 Lajan val ol ach vutejcan dꞌa ebꞌ etchon̈abꞌ tic icha junoc muro nabꞌa bronce. Ol yacꞌ oval ebꞌ edꞌoc, palta a in val Jehová in svalaꞌ to man̈ ol ach yacꞌ ganar ebꞌ, yujto ayin och edꞌoc, ol ach in coloꞌ.
21 Ol ach in colel dꞌa yol scꞌabꞌ ebꞌ chuc, ol ach in coln̈ej dꞌa ebꞌ milumcham anima, xchi dꞌayin.