Jun nivan tiempo man̈xalaj n̈abꞌ
14
Yuj val jun nivan tiempo man̈xalaj n̈abꞌ syacꞌaꞌ, yuj chiꞌ ix lolon Jehová dꞌayin Jeremías in tic, ix yalan icha tic:2 A ebꞌ aj Judá tzꞌocꞌ val ebꞌ yuj cuscꞌolal, man̈xa yip schon̈abꞌ ebꞌ, toxon̈ej teltumbꞌa ebꞌ dꞌa sat luum yuj cuscꞌolal. Sqꞌue val yav ebꞌ aj Jerusalén yuj syaelal.
3 A ebꞌ bꞌeyum, schecbꞌat ebꞌ schecabꞌ ebꞌ icꞌoj aꞌ. Sbꞌat ebꞌ say aꞌ dꞌa yoltac jul, palta man̈xalaj aꞌ, malaj yol schꞌubꞌ ebꞌ smeltzaj ebꞌ. Toxon̈ej smac sat ebꞌ yuj qꞌuixvelal.
4 Sqꞌue tamaljoc lum luum sjat yuj staquin̈al. Yuj chiꞌ a ebꞌ munlajvum, stac val scꞌol ebꞌ, smac sat ebꞌ yuj qꞌuixvelal.
5 Icha chiꞌ nocꞌ cꞌultaquil chej, syactejcan yuneꞌ nocꞌ toto tzꞌalji, yujto man̈xa an̈ an̈cꞌultac scꞌux nocꞌ.
6 Yedꞌ nocꞌ caltacteꞌal bꞌuru, a dꞌa tzalquixtac bꞌaj malaj steꞌal scot tecꞌtecꞌ nocꞌ. Sucꞌlan icꞌ nocꞌ icha nocꞌ oques. Scꞌunbꞌi val yol sat nocꞌ yilani, yujto man̈xa an̈ an̈cꞌultac vachꞌ scꞌuxan nocꞌ, xchi Jehová.
Ix tevi vin̈aj Jeremías yuj ebꞌ anima
7 Mamin Jehová, vachꞌchom te nivan co mul dꞌa a sat, palta colvajan̈ dꞌayon̈ yic vachꞌ max ach alchaj chucal. Tzijtum el sco pitej co bꞌa dꞌayach, tzꞌochpax co mul.
8 A achn̈ej ayach och yipoc co cꞌool, a achn̈ej pax co Columal aji ayic ayon̈ och dꞌa syaelal. ¿Tas yuj icha chꞌoc chon̈abꞌil tzutej a bꞌa dꞌa co chon̈abꞌ tic, icha junoc paxyalvum junn̈ej acꞌval tzꞌecꞌ dꞌayon̈?
9 ¿Tas yuj lajan ach icha junoc soldado satcꞌolal yaji syamji, maxtzac yal scolvaji? Palta Mamin, tic pax ayachecꞌ dꞌa co cal. Masanil chon̈abꞌ ojtannac to a chon̈abꞌ on̈. Man̈ on̈ actejcani, xin chi.
10 Aton juntzan̈ tic ix yal Jehová yuj ebꞌ chon̈abꞌ israel: A ebꞌ anima dꞌa jun chon̈abꞌ tic, te ay stzalajcꞌolal ebꞌ sbꞌeyeqꞌui. Sbꞌat ebꞌ dꞌa jun, sbꞌat ebꞌ dꞌa junxo. Yuj chiꞌ man̈ jabꞌoc tzin tzalaj yedꞌ ebꞌ. A ticnaic ol in nacot schucal ebꞌ, ol in chꞌolbꞌitan tastac scꞌulej ebꞌ, xchi.
11 Ix yalanxi Jehová dꞌayin icha tic: Man̈ ach tevoc dꞌayin yuj svachꞌiloc juntzan̈ anima dꞌa jun chon̈abꞌ tic. 12 Vachꞌchom tzꞌoch ebꞌ dꞌa tzecꞌojcꞌolal, palta man̈ ol in tacꞌvoclaj dꞌa ebꞌ. Vachꞌchom tzijtum silabꞌ sn̈us ebꞌ yedꞌ jantac sat avbꞌen syicꞌcot ebꞌ ofrendail, palta man̈ ol in tzalaj yedꞌ ebꞌ. Ol in satel ebꞌ yuj oval, yuj vejel yedꞌ pax yuj ilya, xchi dꞌayin.
13 Ix in tacꞌvi dꞌa Jehová chiꞌ icha tic: Palta Mamin Jehová in Diosal, a ebꞌ syaloch sbꞌa a checabꞌoc, syal ebꞌ dꞌa ebꞌ anima tic to malaj oval ol ochoc. Malaj vejel ol javoc. Syal ebꞌ to ol acꞌn̈ej juncꞌolal bꞌaj cajan on̈ tic, xin chi.
14 Ix tacꞌvi Jehová dꞌayin icha tic: Tato icha chiꞌ tzꞌaj yalanel ebꞌ checabꞌ chiꞌ dꞌa in bꞌi, van yesan ebꞌ syal chiꞌ, yujto man̈oc in tzin chec yal ebꞌ. Malaj junoc checnabꞌil ix vacꞌ dꞌa ebꞌ, maj in lolonpax dꞌa ebꞌ. A juntzan̈ syal ebꞌ chiꞌ to a in ix vacꞌ yil ebꞌ yalani, palta man̈ yeloclaj, malaj yelcꞌochi. Munil dꞌa yol yic ebꞌ snachaan̈ juntzan̈ syal chiꞌ. 15 A in Jehová in sval dꞌa juntzan̈ checabꞌ stecꞌbꞌej sbꞌa yalanel dꞌa in bꞌi to malaj oval, malaj vejel ol javoc dꞌa yibꞌan̈ chon̈abꞌ tic, man̈oc in tzin chec yal ebꞌ, yuj chiꞌ ol cham ebꞌ yuj oval yedꞌ yuj vejel chiꞌ. 16 Yedꞌ pax ebꞌ anima bꞌaj syal ebꞌ chiꞌ, ol cham ebꞌ yuj oval yedꞌ vejel. Ol cham ebꞌ ix yetbꞌeyum ebꞌ yedꞌ yalyuninal. Toxon̈ej ol can teljabꞌ snivanil ebꞌ dꞌa yoltac scalleal chon̈abꞌ Jerusalén. Malaj mach ol mucan ebꞌ. Icha chiꞌ ol aj stupanel smul ebꞌ ix yacꞌochi. 17 Yuj chiꞌ al juntzan̈ tic dꞌa ebꞌ anima:
Cꞌual dacꞌvalxo yel yal in sat vocꞌ yuj yaelal ayxo smay ix javi dꞌa yibꞌan̈ ebꞌ vetchon̈abꞌ, yuj yaelal tzꞌacꞌan echnaj ebꞌ.
18 Ayic tzin ecꞌ dꞌa cal munlajel svilani, ay snivanil anima teltumbꞌa yajcan yuj oval. Axo yic tzin ochxita dꞌa yol chon̈abꞌ tic, svilani to van scham anima yuj vejel. Axo ebꞌ syaloch sbꞌa schecabꞌoc Dios yedꞌ ebꞌ sacerdote, toxo ix icꞌchajbꞌat ebꞌ dꞌa chꞌoc chon̈abꞌil man̈ yojtacoc, xa chi, xchi Jehová dꞌayin.
19 Yuj chiꞌ ix valan icha tic: Mamin Jehová, ¿tom juneln̈ej ix iqꞌuel ebꞌ aj Judá tic dꞌa a cꞌool? ¿Tom toxo ix a patiquejel chon̈abꞌ Sion? ¿Tas yuj ix on̈ acꞌ echnajoc to maxtzac yal can̈taji? Sco nibꞌej juncꞌolal caji, palta malaj jabꞌoc tas vachꞌ sjavi dꞌayon̈. Sco naꞌ to vachꞌn̈ej ol on̈ bꞌey dꞌa quichan̈, palta an̈ej tas ay smay ix ja dꞌa quibꞌan̈.
20 Mamin Jehová, scojtaquejel co chucal yedꞌ pax spitalil ebꞌ co mam quicham. Ix och val co mul dꞌayach.
21 Yuj val yicꞌjichaan̈ a bꞌi, man̈xo on̈ a patiquejeli. Man̈ a patiquejel jun chon̈abꞌ tic bꞌaj ay a despacho to nivan yelcꞌochi. Nacot a trato ix acꞌ quedꞌoc. ¿Tocval man̈ ol aqꞌuelcꞌochi?
22 Malaj junoc comon dios, sdiosal chꞌoc chon̈abꞌil ol yal yacꞌancot n̈abꞌ. A satchaan̈ max yal-laj yacꞌancot yaxn̈abꞌ dꞌa yol yicoꞌ. Mamin Jehová, co Diosal ach, yuj chiꞌ tzach cacꞌoch yipoc co cꞌool, yujto a achn̈ej tzacꞌcot juntzan̈ tic, xin chi dꞌa Jehová.