A yabꞌixal jun tzecꞌul nabꞌa lino
13
Ix yalan Jehová dꞌayin icha tic: Ixic, bꞌat man junoc tzecꞌul nabꞌa lino, tzacꞌanoch dꞌa a nan̈al ayic manto jucꞌchajoc, xchi dꞌayin. 2 Ix in manan jun tzecꞌul chiꞌ icha ix yal Jehová, ix vacꞌanoch dꞌa in nan̈al. 3 Ix yalanxi Jehová dꞌayin: 4 Icꞌbꞌat jun a tzecꞌul ix a man chiꞌ, jun ayoch dꞌa a nan̈al chiꞌ, tzach bꞌat dꞌa Perat.* Ataꞌ tza cꞌubꞌejel dꞌa sjatelal junoc qꞌuen tenam, xchi Jehová. 5 Ix in bꞌat bꞌian, ix in cꞌubꞌanel jun tzecꞌul chiꞌ, icha ix aj yalan Jehová dꞌayin.6 Ix ecꞌ junoc tiempoal, ix yalanxi Jehová icha tic: Ixic dꞌa Perat, bꞌat icꞌxicot jun tzecꞌul in checnac bꞌat a cꞌubꞌejel taꞌ, xchi dꞌayin. 7 Ix in bꞌat bꞌian, ix in joyan bꞌaj aycan chiꞌ vuuj, ix vicꞌancoti, palta cꞌaxo, man̈xalaj yopisio.
8 Ix yalanxi Jehová dꞌayin yic svaleli: 9 Icha tic ol aj in satanel yicꞌojchan̈bꞌail Judá yedꞌ Jerusalén. 10 A ex in chon̈abꞌ ex tic, te chuc ex, malaj e gana tze cꞌanabꞌajej in checnabꞌil, an̈ej tas tze nibꞌej a tze cꞌulej. Tzex och ejmelal dꞌa juntzan̈ comon dios, tzeyacꞌan servil. Lajan ex icha jun tzecꞌul man̈xalaj yopisio tic. 11 Icha junoc mach stzecꞌoch junoc tzecꞌul dꞌa snan̈al, icha chiꞌ ix in cꞌulej eyedꞌ ex aj Israel yedꞌ ex aj Judá, yic junn̈ej tzex aj vedꞌoc, in chon̈abꞌ eyaji, yic tzeyacꞌan ojtacajeli to bꞌinajnac in, nivan velcꞌochi. Palta maj in e cꞌanabꞌajej, xchi Jehová, xa chi, xchi dꞌayin.
Yabꞌixal yedꞌtal vino
12 Ix yalanxi Jehová dꞌayin icha tic: Al dꞌa ebꞌ etchon̈abꞌ tic: A Jehová co Diosal tzꞌalani: Junjun yedꞌtal vino, smoj sbꞌudꞌji yuj vino, xa chi. Ol yalan ebꞌ dꞌayach: Toxon cojtac to junjun yedꞌtal vino smoj sbꞌudꞌji yuuj, xcham ebꞌ. 13 Ol alan dꞌa ebꞌ to a in sval icha tic: Ol vacꞌ sat e cꞌol e masanil ex cajan ex dꞌa jun chon̈abꞌ tic yuj yoval in cꞌool, icha val tzꞌaj sat scꞌol mach nivan vino syuqꞌuej. A ebꞌ ol satel scꞌol chiꞌ, aton ebꞌ rey yin̈tilal vin̈aj David, ebꞌ sacerdote, ebꞌ syaloch sbꞌa in checabꞌoc yedꞌ masanil ex cajan ex dꞌa Jerusalén tic. 14 Ol vacꞌ e macꞌlajcham e bꞌa icha tzꞌaj spojbꞌat lum yedꞌtal vino ayic stenlan sbꞌa luum. Lajan ol yutej sbꞌa ebꞌ mamabꞌil yedꞌ ebꞌ uninabꞌil. A in val Jehová in svalaꞌ, ol ex in sateli, man̈xo ol ocꞌlaj in cꞌol dꞌayex, xchi Jehová, xa chi, xchi dꞌayin.
Scachnabꞌil chon̈abꞌ Judá
15 Ex aj Judá, a Jehová van slolon dꞌayex. Emnaquil tzeyutej e bꞌa, tze maclan eyabꞌ tas syalaꞌ.
16 Alecqꞌueta e mul dꞌa Jehová co Diosal, yacbꞌan manta tas scot dꞌa eyibꞌan̈, icha scꞌulej ebꞌ sbꞌeyecꞌ dꞌa sat pacꞌan dꞌa scal qꞌuicꞌalqꞌuinal. Tze naꞌ to ol ja vachꞌilal dꞌayex palta te nivan yaelal ol cot dꞌa eyibꞌan̈ yuj Jehová, ichato ol qꞌuicꞌbꞌoc qꞌuinal ol eyilaꞌ.
17 Tato max e cha eyabꞌi, elcꞌaltac ol in ocꞌ yuj eyicꞌojchan̈bꞌail chiꞌ. Ol elta yal in sat, yujto ol ex icꞌchajcanbꞌat dꞌa najat, xin chi dꞌa ebꞌ.
A slolonel Jehová dꞌa vin̈ rey
18 Ix yalanxi Jehová dꞌayin: Al dꞌa vin̈ a reyal yedꞌ dꞌa ix snun vin̈: Eman̈eccot dꞌa xilail e reyal, tzex em cꞌojan dꞌa sat luum, yujto ol icꞌchajel e corona man̈ jantacoc svachꞌil yilji ayqꞌue dꞌa e jolom.
19 A juntzan̈ chon̈abꞌ dꞌa Neguev ol macchaj yuj ebꞌ soldado, ol oymaj ebꞌ dꞌa spatictac, man̈xa mach ol yal yochi. Masanil ebꞌ aj Judá, ol icꞌchajcanbꞌat ebꞌ dꞌa najat.
20 Ixiquec qꞌuelan dꞌa stojolal norte, tzeyilan scot ebꞌ ajcꞌool. ¿Tas yaj in chon̈abꞌ vacꞌnacoch dꞌa yol e cꞌabꞌ e tan̈vani, aton ebꞌ ayoch e bꞌinajbꞌiloc?
21 ¿Tas ol eyalaꞌ ayic ol vacꞌanoch juntzan̈ anima eyajaliloc, aton ebꞌ eyacꞌnacoch yipoc e cꞌool? Ol ja yaelal dꞌa eyibꞌan̈ icha sjavi yaelal dꞌa yibꞌan̈ junoc ix ix van yalji yuneꞌ.
22 Ex aj Jerusalén, tato tze cꞌanbꞌej tas yuj sjavi juntzan̈ tic dꞌa eyibꞌan̈, nachajocabꞌ el eyuuj to yuj jantac e mul, yuj chiꞌ bꞌeran ex eli tzex eqꞌui, tzex te ixtajpaxi.
23 A junoc qꞌuicꞌal anima, tocval syal sqꞌuexmaj yilji. A spintotaquil nocꞌ leopardo, tocval syal sqꞌuexmaji. Ichextaꞌ te cꞌaynac ex dꞌa chucal, maxtzac yal sqꞌuexmaj e bꞌeybꞌal.
24 Yuj chiꞌ ol ex in saclemejbꞌati, icha tzꞌaj saclemcanbꞌat smatzꞌil ixim trigo yuj icꞌ scot dꞌa taquin̈ luum.
25 Aton val tic aycanoch dꞌa eyibꞌan̈ vuuj, icha val smojal. Yujto ix in bꞌatcan satcꞌolal eyuuj, axon̈ej juntzan̈ comon dios tzeyacꞌoch yipoc e cꞌool.
26 Ol ex vaqꞌuel bꞌeran, ol ex vacꞌan qꞌuixvelal.
27 Ix vil jantac eyajmulal, aton juntzan̈ qꞌuixvelaltac tze cꞌulej. Yajbꞌentac tas tze cꞌulej dꞌa lum jolomtac vitz yedꞌ dꞌa yichtac te teꞌ cꞌayum xiil. Ex aj Jerusalén, obꞌiltac ex, ¿bꞌaqꞌuin̈ ol eyactejcan e cꞌulan chucal chiꞌ? xchi Jehová.