A tas scꞌanbꞌej vin̈aj Jeremías
12
Ix valan dꞌa Jehová icha tic: Mamin Jehová, vachꞌchom vojtac to te tojol a pensar, palta in gana tzin telaj in bꞌa edꞌoc. Tzin nibꞌej tzin cꞌanbꞌej juntzan̈ tic dꞌayach: ¿Tas yuj vachꞌn̈ej yaj ebꞌ chuc sbꞌeybꞌal? ¿Tas yuj juncꞌolal yaj ebꞌ an̈ej chucal snaꞌa?2 A ach a bꞌonac ebꞌ, vachꞌn̈ej sqꞌuibꞌ ebꞌ, icha junoc te teꞌ vachꞌ sbꞌat schꞌan̈al yibꞌ, vachꞌ sqꞌuibꞌi, syacꞌan sat, icha chiꞌ yaj ebꞌ. An̈ej yedꞌ stiꞌ ebꞌ syal vachꞌ lolonel dꞌayach, axo spensar ebꞌ najat yajeli.
3 Palta a ach tic Mamin Jehová, ojtac in. Tzilaꞌ jantac yajoch in pensar dꞌayach. Icꞌbꞌat juntzan̈ anima chiꞌ, icha tzꞌaj yicꞌjibꞌat nocꞌ calnel bꞌaj smiljichamoc. Tza sicꞌcanel ebꞌ, yic vachꞌ ol cham ebꞌ dꞌa jun cꞌual ayic ol miljoccham anima.
4 ¿Bꞌaqꞌuin̈ ol och vaan stacji yibꞌan̈qꞌuinal tic yedꞌ stacjiel an̈ an̈cꞌultac scꞌux nocꞌ nocꞌ? An̈ejaꞌ nocꞌ much van scham nocꞌ yuj schucal ebꞌ anima cajan dꞌa jun chon̈abꞌ tic. Sna ebꞌ to max il tastac scꞌulej ebꞌ, xin chi dꞌa Jehová.
Ix spacan Dios
5 Ix yalan Jehová dꞌayin: Tato maj ach tzacꞌvan a bꞌey yedꞌ ebꞌ sbꞌey dꞌa yoc, ¿tas val ol aj a lajbꞌan a bꞌey yedꞌ ebꞌ ayqꞌue dꞌa yibꞌan̈ chej? Tato man̈ juncꞌolaloc ajecꞌ bꞌaj secan, ¿tas ol aj a naani tato tzach ecꞌ dꞌa scaltac svayumtaquil stitac aꞌ Jordán?
6 Ijan spax ip, palta manto ojtacoc to a ebꞌ ayoch ajcꞌolal dꞌayach, aton ebꞌ ayto uj a bꞌa yedꞌoc. Tzꞌavaj ebꞌ scot ebꞌ dꞌa a patic icha ebꞌ pechum nocꞌ. Vachꞌchom vachꞌn̈ej syutej lolon sbꞌa ebꞌ dꞌayach, man̈ acꞌoch ebꞌ yipoc a cꞌool, xchi dꞌayin.
Scuscꞌolal Jehová yuj schon̈abꞌ
7 Ix yalanxi Jehová icha tic: Ol vactejcan in chon̈abꞌ tic, ol in patiquejel jun chon̈abꞌ to vic yaji. Ol vacꞌoch in chon̈abꞌ xajanabꞌil tic vuj dꞌa yol scꞌabꞌ ebꞌ ajcꞌool.
8 A ebꞌ in chon̈abꞌ victaxon yaj tic, icha junoc nocꞌ choj dꞌa caltac teꞌ tzꞌel yav scoti, icha chiꞌ syutej sbꞌa ebꞌ dꞌayin, yuj chiꞌ tzin yajcanel ebꞌ.
9 A in chon̈abꞌ tic, lajan val icha junoc nocꞌ chꞌacbꞌa chꞌoc yilji, stzocꞌjicham nocꞌ yuj juntzan̈xo nocꞌ yetchꞌacbꞌail. Cotocabꞌ masanil juntzan̈xo chon̈abꞌ ul satel in chon̈abꞌ tic.
10 Tzijtum ebꞌ yilumal ebꞌ chꞌoc chon̈abꞌil ol satanel in chon̈abꞌ tic, ichato van satanel teꞌ uva ebꞌ avabꞌil vuuj. Ol steqꞌuem ladꞌan in munlajel ebꞌ. A lum luum nibꞌabꞌil vuuj, taquin̈ lum ol ajcan lum yuj ebꞌ.
11 Cuseltacxon̈ej ol ajcan in chon̈abꞌ tic yuj ebꞌ, ichato ol ocꞌ lum dꞌayin. Masanil in chon̈abꞌ tic, cuseltacxon̈ej ol ajcanoc. Man̈xa mach ol naan jabꞌoc yuuj.
12 Masanil dꞌa tzalquixtac dꞌa tzꞌinan luum, ol javoc ebꞌ vin̈ vinac sateli, yujto a vespada a in Jehová in tic, a ol satanel masanil bꞌaj slajvicꞌoch smacbꞌen in chon̈abꞌ tic. Man̈xalaj junoc mach juncꞌolal ol ajoc.
13 Ix yavej ixim trigo ebꞌ, axo teꞌ qꞌuiix ix qꞌuibꞌ sqꞌuexuloc. Nabꞌan̈ej ix munlaj ebꞌ. Ix lajviel yavbꞌen ebꞌ, qꞌuixvelalxo smolanqꞌue jabꞌjabꞌ sat yavbꞌen ebꞌ chiꞌ, yuj val yoval in cꞌol dꞌa ebꞌ, xchi Jehová.
A stiꞌ Jehová ix yacꞌaꞌ
14 Icha tic sval a in Jehová in tic yuj juntzan̈ nación te chuc dꞌa slacꞌanil Israel tic, to ix yiqꞌuecꞌ lum luum ebꞌ ix vacꞌ smacbꞌenej Israel in chon̈abꞌ: Ol viqꞌuel ebꞌ dꞌa sluum junjun, axo ebꞌ aj Judá ol viqꞌuel ebꞌ dꞌa scal ebꞌ. 15 Ayic toxo ix viqꞌuel juntzan̈ chꞌoc chon̈abꞌil chiꞌ, ol ocꞌxoc in cꞌol dꞌa ebꞌ, ol vicꞌan meltzaj ebꞌ dꞌa sluum yedꞌ dꞌa schon̈abꞌ junjun. 16 A juntzan̈ chon̈abꞌ chiꞌ ix cꞌaybꞌan in chon̈abꞌ yacꞌan stiꞌ dꞌa sbꞌi Baal. Axo ol ajoc, tato ol scꞌanabꞌajej scꞌaybꞌubꞌal in chon̈abꞌ tic ebꞌ, ol slocan in bꞌi ebꞌ dꞌa tas syalaꞌ, tato icha chiꞌ ol yal yaj ebꞌ dꞌa scal ebꞌ in chon̈abꞌ tic. 17 Tato man̈ ol scꞌanabꞌajej ebꞌ tas sval jun, a in val Jehová in svalaꞌ to ol in satel ebꞌ icha stocꞌjiqꞌueta junoc te teꞌ yedꞌ schꞌan̈al yibꞌ, xchi Jehová.