Max cꞌanabꞌajajlaj strato Dios
11
Ix yalanxi Jehová dꞌayin Jeremías in tic icha tic: 2 Abꞌ val tas syal in trato, tzalan dꞌa ebꞌ aj Judá yedꞌ pax dꞌa ebꞌ cajan dꞌa Jerusalén. 3 Tzalan dꞌa ebꞌ to a in Jehová sDiosal in ebꞌ, a in svalaꞌ to scatabꞌaj mach max cꞌanabꞌajan tas syal in trato tic. 4 Aton in trato in bꞌonac yedꞌ ebꞌ e mam eyicham, ayic vicꞌannaquelta ebꞌ dꞌa Egipto. A jun nación chiꞌ, lajan yaj dꞌa ebꞌ icha junoc horno bꞌaj stzꞌa qꞌuen hierro. Valannac dꞌa ebꞌ: Cꞌanabꞌajejinec, bꞌoec masanil tas svalaꞌ. Tato icha chiꞌ tze cꞌulej, ol ex och in chon̈abꞌoc, a inxo ol in och e Diosaloc, xin chi dꞌa ebꞌ. 5 A exxo pax tic, tato ol in e cꞌanabꞌajej, ol vacꞌn̈ej elcꞌoch in tiꞌ vacꞌnac dꞌa ebꞌ e mam eyicham, yic svacꞌan jun e luum, aton lum te yax sat bꞌaj ayex ecꞌ tic, xchi Jehová, xa chi, xchi dꞌayin. Yuj chiꞌ ix in tacꞌvi dꞌay icha tic:Ujocabꞌ Mamin Jehová, xin chi.
6 Yuj chiꞌ ix yalanxi Jehová dꞌayin icha tic: Al jun checnabꞌil tic dꞌa juntzan̈ chon̈abꞌ ay dꞌa yol yic Judá yedꞌ dꞌa yoltac scalleal Jerusalén. Tzalan dꞌa ebꞌ anima icha tic: Maclejec eyabꞌ jun trato tic, tze bꞌeybꞌalan tas syalaꞌ. 7 Ayic vicꞌannaquelta ebꞌ e mam eyicham dꞌa Egipto, cham val valnac dꞌa ebꞌ to scha yabꞌ ebꞌ tas svalaꞌ. Atax dꞌa jun tiempoal chiꞌ masanto ticnaic ayinn̈ejoch valani. 8 Palta maj schalaj yabꞌ ebꞌ, maj scꞌanabꞌajej ebꞌ, an̈ej to vachꞌ pitbꞌinaquel spensar ebꞌ. Yacꞌannacbꞌat sbꞌa ebꞌ dꞌa scal chucal. Maj yal scꞌol ebꞌ scꞌanabꞌajej tas svalaꞌ. Yuj chiꞌ vacꞌnacbꞌat yaelal dꞌa yibꞌan̈ ebꞌ, icha yajcan dꞌa in trato chiꞌ, xchi Jehová.
9 Ix yalanxi Jehová dꞌayin icha tic: A ebꞌ aj Judá yedꞌ ebꞌ cajan dꞌa Jerusalén, ix slajtiej sbꞌa ebꞌ yic syicꞌanel sbꞌa ebꞌ dꞌa yol in cꞌabꞌ. 10 Ix scꞌulejxi chucal ebꞌ icha sbꞌeybꞌalejnac ebꞌ e mam eyicham. Aton ebꞌ man̈ cꞌanabꞌajannacoc tas valnac, axo dꞌa juntzan̈ comon dios yacꞌnacoch spensar ebꞌ, yochnac ebꞌ ejmelal dꞌay. A pax ticnaic man̈oc chon̈abꞌ Israel, man̈oc pax chon̈abꞌ Judá scꞌanabꞌajan in trato in bꞌonac yedꞌ ebꞌ e mam eyicham chiꞌ. 11 Yuj chiꞌ a in val Jehová in svalaꞌ, ol vacꞌcot yaelal dꞌa yibꞌan̈ ebꞌ, man̈xo ol yal scolan sbꞌa ebꞌ dꞌay. Olto avaj ebꞌ dꞌayin scꞌanan in colval, palta man̈xo ol in tacꞌvoc dꞌa ebꞌ. 12-13 Ichato chiꞌ bꞌian a ebꞌ aj Judá yedꞌ ebꞌ cajan dꞌa Jerusalén tic, ol bꞌat sn̈us incienso ebꞌ yic scꞌanan colval dꞌa juntzan̈ sdiosal chiꞌ. Yujto a ebꞌ aj Judá tic, tzijtum val sdiosal ebꞌ, lajan sbꞌisul icha sbꞌisul schon̈abꞌ ebꞌ. An̈ejaꞌ pax ebꞌ cajan dꞌa Jerusalén, te tzijtum altar ix sbꞌoqꞌue ebꞌ, icha val scalleal chon̈abꞌ, aton taꞌ sn̈us incienso ebꞌ dꞌa Baal, jun comon dios yajbꞌentac. Palta man̈ ol yal-laj scolji ebꞌ dꞌa syaelal chiꞌ yuj juntzan̈ scomon diosal chiꞌ. 14 Ach Jeremías, man̈ ach lesalvoc yuj jun chon̈abꞌ tic. Man̈ al dꞌayin, man̈ ach tevoc dꞌayin yuj ebꞌ, yujto man̈ ol in tacꞌvoc, vachꞌchom ol scꞌan in colval ebꞌ dꞌa scal syaelal.
15 Ix yalan Jehová to sval dꞌa ebꞌ vetchon̈abꞌ icha tic: Ex in chon̈abꞌ xajanabꞌil vuuj, malaj eyalan eyic e javi dꞌa in cajnubꞌ, yujto man̈ jantacoc tas yajbꞌentac tze cꞌulej. A xepual yedꞌ schibꞌejal nocꞌ e silabꞌ, man̈ ol yal ex scolanel dꞌa jun yaelal ol javoc dꞌa eyibꞌan̈. Man̈xo eyacꞌoch qꞌuin̈ dꞌa in cajnubꞌ tic.
16 Yujto a dꞌa yalan̈taxo, lajan ex icha junoc teꞌ olivo cꞌayum xiil, te ay sat. Palta axo ticnaic, ol ex in sateli, icha tzꞌaj slajviem junoc te teꞌ sjecchaj scꞌabꞌ yuj junoc oval icꞌ n̈abꞌ, stzꞌabꞌat teꞌ yuj scꞌacꞌal lebꞌlon.
17 A in Jehová Yajal in dꞌa Smasanil, a in ix ex vacꞌ pitzvoc ex aj Israel yedꞌ ex aj Judá, icha yavchaj junoc te teꞌ. Palta toxo ix valaꞌ to ol ex in satel yuj jantac chucal tze cꞌulej, icha junoc te teꞌ stocꞌjiqꞌueta dꞌa yol luum. Ix e tzuntzejcot yoval in cꞌool, yujto ix e n̈us incienso dꞌa Baal, xchi Jehová.
Snibꞌej ebꞌ aj Anatot smilcham vin̈aj Jeremías
18 Mamin Jehová, ix acꞌ vojtaquejeli to ay ebꞌ ajcꞌol dꞌayin van snaan in smilani. Ix a jac in pensar yic snachajel vuuj. 19 Juncꞌolal vajeqꞌui, icha junoc nocꞌ calnel tzꞌicꞌjibꞌat bꞌaj smiljichamoc, palta man̈ vojtacoc tas van snaan ebꞌ dꞌa in patic. Syalan ebꞌ icha tic: Co maqꞌuecchamoc, yic vachꞌ man̈xa mach ol naancotoc, icha val tzꞌaj xicjiel junoc te teꞌ syacꞌ sat, xchi ebꞌ.
20 Mamin Jehová, Yajal ach dꞌa Smasanil, Juez ach dꞌa stojolal. Ojtac tas ayecꞌ dꞌa co pensar. Acꞌ vil tas ol aj acꞌan spac dꞌa juntzan̈ anima tic, yujto toxo ix vabꞌenejoch dꞌa yol a cꞌabꞌ tas sna ebꞌ dꞌa in patic, xin chi.
21 A ebꞌ aj Anatot, ix sna ebꞌ tas tzꞌaj in chami. Ix yalan ebꞌ to tzin smilcham ebꞌ tato an̈ejaꞌ valanel slolonel Jehová. 22 A Jehová Yajal dꞌa Smasanil ix alan yuj ebꞌ aj Anatot chiꞌ icha tic: Ayic ol in bꞌoan yaj yedꞌ ebꞌ, a ebꞌ quelemtac ol cham ebꞌ dꞌa scal oval, axo yuninal ebꞌ yedꞌ yisil, ol cham ebꞌ yuj vejel. 23 Man̈xa junoc ebꞌ vinac ol canoc, yujto ol ja scꞌual ol in chꞌolbꞌitan tas scꞌulej ebꞌ. Ol javoc yaelal dꞌa yibꞌan̈ ebꞌ, xchi Jehová.