A ejmelal dꞌa comon dios
66
Ix yalan Jehová icha tic:A satchaan̈ in despacho yaji, axo sat luum tic sbꞌachnubꞌ voc yaji. A exxo tic, ¿bꞌajtil ol e bꞌoqꞌue junoc in pat bꞌaj vachꞌ tzin aji?
2 A in Jehová in svalaꞌ to a in val in bꞌonac juntzan̈ tastac ix vacꞌ bꞌinaj tic, icha chiꞌ ajnac spitzvichaan̈ smasanil.
A ebꞌ te emnaquil yaji, a in ol in tan̈vej ebꞌ, aton ebꞌ scus yuj smul, ebꞌ ay yelcꞌoch in lolonel dꞌay.
3 Ay ex tzex tzalaj e cꞌulan juntzan̈ tastac yajbꞌentac dꞌa vichan̈. Yuj chiꞌ ayic tze milancham nocꞌ vacax silabꞌil dꞌayin, a dꞌa in sat ichato a junoc anima tze milchamoc. Ayic tze milancham nocꞌ calnel silabꞌil dꞌayin, a dꞌa in sat ichato a sjaj nocꞌ tzꞌiꞌ tze chꞌumeli. Ayic tzeyacꞌan sat eyavbꞌen ofrendail dꞌayin, a dꞌa in sat ichato a schiqꞌuil nocꞌ chitam tze tobꞌemi. Ayic tze n̈usan incienso dꞌayin, a dꞌa in sat ichato a dꞌa comon dios tzeyal vachꞌ lolonel.
4 Yuj chiꞌ toxo ix in naꞌ tas yaelal ol javoc dꞌa eyibꞌan̈. A tas bꞌaj te cꞌun e xivi, a chiꞌ ol vacꞌcot dꞌayex, yujto ix ex vavtej, palta malaj mach ix tacꞌvi dꞌayin. Ix in lolon dꞌayex, palta maj e cha eyabꞌi, ix e cꞌulan chucal. Ix e cꞌulan juntzan̈ tas max schalaj in cꞌool, xchi Jehová.
Tzꞌel ebꞌ anima libre
5 A ex tze cha eyabꞌi, abꞌec val tas syal Jehová: Ay juntzan̈ ebꞌ eyetchon̈abꞌ schichon scꞌol dꞌayex, tzex spechanbꞌeyecꞌ ebꞌ, yujto tzeyal e bꞌa dꞌayin, syalan ebꞌ icha tic: Schꞌoxocabꞌ stziquiquial Jehová chiꞌ, squil jabꞌoc e tzalaji, xchi ebꞌ. Palta a ebꞌ chiꞌ, te qꞌuixvelal ol ajcan ebꞌ, xchi Jehová.
6 Abꞌec jun n̈ilili scꞌan scot dꞌa chon̈abꞌ chiꞌ, scꞌan̈ scotpax dꞌa templo. Aton Jehová scꞌan̈ scoti, yic syacꞌan spac dꞌa ebꞌ ajcꞌol dꞌa smojal.
7 Syalan Jehová icha tic: A chon̈abꞌ Sion, lajan val icha junoc ix ix mantalaj syail yuneꞌ scoti, tzꞌalji yuneꞌ ix chiꞌ.
8 ¿Tom ay mach ix abꞌani, mato ay mach ix ilan jun chiꞌ? ¿Tom ay junoc chon̈abꞌ junn̈ej cꞌual tzꞌoch nacional? ¿Tom ay junoc chon̈abꞌ junn̈ej cꞌual sbꞌoi? Palta a Sion tic, quenn̈ej ol yabꞌ syail ol ochxoc nacional.
9 ¿Tom ol yal in yamanoch vaan jun van yalji, yujto a in svacꞌ aljoc? Maay. Man̈ ol yalpaxlaj in tenanecꞌ spitzvixi jun chon̈abꞌ tic. A in Jehová e Diosal in svalaꞌ, icha chiꞌ ol ajoc.
10 A ex tze xajanej Jerusalén, tzalajan̈ec yedꞌoc. A ex ocꞌnac ex yuuj ayic yabꞌannac syail, mol tzalajan̈ec yedꞌoc.
11 Yujto a Jerusalén chiꞌ, lajan icha junoc ix nunabꞌil smontej yuneꞌ, syacꞌan yim, icha chiꞌ ol aj yacꞌan snivanil e cꞌool, masanto ol ex tzalaj yuuj, yujto nivan vachꞌilal ol scha Jerusalén chiꞌ.
12 A in Jehová in svalaꞌ: Ol vacꞌbꞌat vachꞌilal dꞌa scal ebꞌ anima dꞌa jun chon̈abꞌ tic. Ol yicꞌcot sbꞌeyumal juntzan̈xo nación dꞌay. Icha sjavi junoc aꞌ elumaꞌ, icha chiꞌ ol aj sjavi. Icha junoc neneꞌ unin nibꞌabꞌil ol ex utajoc, ichato ol ex chunoc, ol ex cheljoc, ichato ol ex chenchenan dꞌa sat xubꞌ.
13 Icha junoc ix nunabꞌil smontej yuneꞌ, icha chiꞌ ol aj ex in montani. Icha chiꞌ ol aj eyicꞌan snivanil e cꞌol dꞌa Jerusalén, xchi Jehová.
14 Ayic ol eyilan juntzan̈ tic, ol ex te tzalajoc. Ol eyicꞌxi eyipoc, icha tzꞌaj syaxbꞌixi an̈ an̈cꞌultac. Yujto ol schꞌox spoder Jehová dꞌa scal ebꞌ schecabꞌ, axo yoval scꞌol ol yacꞌ dꞌa ebꞌ ayoch ajcꞌolal dꞌay.
15 Yujto a Jehová ol javoc dꞌa cal cꞌacꞌ, a scarruaje lajan icha chacxuxum icꞌ. Ol javoc yacꞌoch yoval scꞌol dꞌa ebꞌ ajcꞌol icha sqꞌue n̈iln̈on yoc teꞌ cꞌacꞌ.
16 A yedꞌ cꞌacꞌ yedꞌ yespada Jehová, ol schꞌolbꞌitej masanil anima dꞌa yolyibꞌan̈qꞌuinal tic, tzijtum ebꞌ ol cham yuuj.
17 A val Jehová tzꞌalan icha tic: A ebꞌ tzꞌoch ejmelal dꞌa comon dios dꞌa scaltac teꞌ avbꞌen teꞌ, stzalaj ebꞌ scꞌulan icha scꞌulej mach scuchbꞌan ebꞌ, schiꞌan nocꞌ chitam ebꞌ, nocꞌ chꞌoov yedꞌ juntzan̈xo nocꞌ nocꞌ yajbꞌentac, junn̈ej ol satel ebꞌ smasanil.
18 Yuj tastac sna ebꞌ yedꞌ tastac scꞌulej ebꞌ, ol in molbꞌej masanil anima dꞌa junjun tiꞌal, dꞌa junjun chon̈abꞌ, ol in chꞌoxan in poder yil ebꞌ.
19 Ol in chꞌoxan in poder dꞌa ebꞌ olto canoc, ol in checanbꞌat ebꞌ dꞌa juntzan̈xo chon̈abꞌ tic: Aton dꞌa Tarsis, dꞌa Fut, dꞌa Lud bꞌaj cajan ebꞌ jelan sjulvaj dꞌa jul-labꞌ. Ol in checanpaxbꞌat ebꞌ dꞌa Tubal, dꞌa Javán yedꞌ dꞌa juntzan̈ chon̈abꞌ najat dꞌa stitac aꞌ mar bꞌaj man̈ abꞌchajnacoc in bꞌinaji yedꞌ bꞌaj man̈ ilbꞌiloc in poder. Ol bꞌat yalel yabꞌixal snivanil velcꞌoch ebꞌ dꞌa juntzan̈ chon̈abꞌ chiꞌ.
20 A in Jehová in svalaꞌ to dꞌa masanil chon̈abꞌ, ol icꞌjoccot masanil ebꞌ eyetchon̈abꞌ ayecꞌ dꞌa scal ebꞌ. Ay ebꞌ ol icꞌjoccot dꞌa yibꞌan̈ nocꞌ chej, dꞌa yol carruaje, dꞌa yibꞌan̈ bꞌachlabꞌ, dꞌa yibꞌan̈ nocꞌ mula yedꞌ dꞌa yibꞌan̈ nocꞌ camello. Icha junoc silabꞌ ol aj sjavi ebꞌ dꞌa tzalan bꞌaj tzꞌoch ejmelal dꞌayin dꞌa Jerusalén tic. Icha tzꞌaj yicꞌancot junoc ofrenda ebꞌ in chon̈abꞌ dꞌa in templo dꞌa yol junoc yedꞌtal te vachꞌ, icha chiꞌ ol aj yicꞌchajcot ebꞌ.
21 A dꞌa scal juntzan̈ ebꞌ ixto cani, ataꞌ ol in siqꞌuel ebꞌ ol och sacerdoteal yedꞌ levitail, xchi Jehová.
22 Syalanpax Jehová icha tic: A acꞌ satchaan̈ yedꞌ acꞌ yolyibꞌan̈qꞌuinal ol in bꞌoꞌo, ol ajn̈ejecꞌ dꞌa juneln̈ej. Icha chiꞌ ol aj eyajn̈ejeqꞌui, ol ex bꞌinaj yedꞌ eyin̈tilal dꞌa juneln̈ej.
23 Junjun scꞌual icꞌoj ip dꞌa junjun semana yedꞌ juntac el tzꞌalji qꞌuen uj, ol javoc masanil ebꞌ anima, ol ul em cuman ebꞌ dꞌayin.
24 Ayic tzꞌelta ebꞌ in chon̈abꞌ, ol yilan snivanil ebꞌ chamnac ebꞌ, aton ebꞌ pit yutejnac sbꞌa dꞌayin. Ayn̈ejoch nocꞌ aꞌay schianbꞌat snivanil ebꞌ chiꞌ, axo cꞌacꞌ van sn̈usantzꞌa ebꞌ, malaj bꞌaqꞌuin̈ stupi. Yajbꞌentac yilji ebꞌ dꞌa sat masanil anima tzꞌilani, xchi Jehová.