Yaelal dꞌa yibꞌan̈ ebꞌ pit
65
Ix yalan Jehová icha tic:Ix vacꞌ in bꞌa yojtaquejel ebꞌ max in cꞌanbꞌaneqꞌui. Ix in chꞌox in bꞌa dꞌa ebꞌ max yal sbꞌa dꞌayin. A dꞌa ebꞌ max in cꞌanbꞌanecꞌ chiꞌ, ataꞌ ix valaꞌ: Ina in tic, xin chi dꞌa ebꞌ.
2 Masanil tiempo jecann̈ejbꞌat in cꞌabꞌ vavtancot jun chon̈abꞌ te pit, palta axon̈ej chucal snibꞌej scꞌulej.
3 Val dꞌa vichan̈ scꞌulej chucal ebꞌ, syacꞌan silabꞌ ebꞌ dꞌa juntzan̈ scomon diosal dꞌa scaltac yavbꞌen teꞌ ebꞌ, sn̈usan incienso ebꞌ dꞌa yibꞌan̈ altar bꞌobꞌil yedꞌ lum ladrillo.
4 Tzꞌem cꞌojan ebꞌ dꞌa scal bꞌajtac mucan ebꞌ chamnac. Tzꞌecꞌ acꞌval yuj ebꞌ bꞌajtac cꞌubꞌeltac. Schiꞌan schibꞌejal nocꞌ chitam ebꞌ, syacꞌan bꞌudꞌjoc schen ebꞌ yuj yal chibꞌej to ay yovalil yuj ley.
5 Syalan ebꞌ icha tic: Canan̈ taꞌ, man̈ a nitzcot a bꞌa dꞌayon̈, yujto chꞌocxo quel dꞌayach, xchi ebꞌ dꞌayin. Tzin tzactzaj val yuj juntzan̈ anima tic, lajan val tas scꞌulej ebꞌ icha stabꞌil teꞌ cꞌacꞌ ayochi tzꞌecꞌ cꞌu, sbꞌat dꞌa yol co n̈iꞌ.
6 Palta masanil juntzan̈ schucal ebꞌ chiꞌ, tzꞌibꞌabꞌilcan dꞌa vichan̈, man̈ ton̈ejoc ol vilochi. Ol vacꞌ spac dꞌa ebꞌ icha val smojal.
7 Yuj val schucal ebꞌ chiꞌ yedꞌ schucal ebꞌ smam yicham ebꞌ, stzuntzejnaccot voval ebꞌ, ayic sn̈usannac silabꞌ ebꞌ dꞌa jolomtac vitz. Yuj chiꞌ ol in chꞌolbꞌitej yaj ebꞌ, ol vacꞌan spac dꞌa ebꞌ icha val smojal, xchi Jehová.
Syacꞌ stiꞌ Jehová yacꞌan vachꞌilal
8 Ix yalan Jehová icha tic: A junoc cꞌojlabꞌ sat uva ayto yalil, max yixtej ebꞌ anima, yujto ayto yalil vachꞌ yicꞌanel ebꞌ dꞌay. Icha chiꞌ ol in cꞌulej, man̈ ol in satel masanil in chon̈abꞌ, yujto tzin xajanej ebꞌ in checabꞌ.
9 Ol vactejcan jayvan̈ocxo ebꞌ yin̈tilal Jacob, yic vachꞌ ayto anima ol cajnaj dꞌa lum luum dꞌa yol yic Judá. A ebꞌ in checabꞌ sicꞌbꞌilel vuj chiꞌ, ol cajnaj ebꞌ taꞌ, ol yican lum ebꞌ.
10 A dꞌa span̈anil lum Sarón, man̈xo jantacoc nocꞌ calnel ol ajoc, axo dꞌa yacꞌlical chon̈abꞌ Acor ol va nocꞌ vacax, aton nocꞌ smolbꞌetzal nocꞌ ebꞌ in chon̈abꞌ tzꞌoch ejmelal dꞌayin.
11 Palta man̈ ichoctaꞌ ol vacꞌ dꞌayex mach ex ix eyicꞌcanel e bꞌa dꞌayin. A jun tzalan bꞌaj tzꞌoch ejmelal dꞌayin, ix bꞌatcan satcꞌolal eyuuj, axon̈ej dꞌa juntzan̈ comon dios scuch Gad yedꞌ Meni tzeyacꞌ vael yedꞌ vino silabꞌil, aton juntzan̈ comon dios tzꞌalani tas ol ex ajoc yedꞌ tas ol javoc dꞌa eyibꞌan̈ eyalani.
12 Yuj chiꞌ a in svalaꞌ tas ol javoc dꞌa eyibꞌan̈. Chuclaj tas van ex stan̈vani. A qꞌuen espada ol ex milancham vuuj, ol ex em cuman, ol tzepchajel e jolom. Yujto ix ex vavtej, palta maj ex tacꞌvoc dꞌayin, ix in lolon dꞌayex, palta maj e cha eyabꞌi. Ix e cꞌulej juntzan̈ chucal max scha in cꞌool.
13 Yuj chiꞌ a ebꞌ in checabꞌ ay tas sva ebꞌ, a exxo tic ol ex cham yuj vejel. Ay tas ol yuqꞌuej ebꞌ, a exxo tic ol ex cham yuj taquin̈tial. Ol tzalaj ebꞌ, a exxo tic qꞌuixvelal ol ex ajcanoc.
14 Ol bꞌitan ebꞌ yuj tzalajcꞌolal, a exxo tic, ol ex ocꞌ yuj cuscꞌolal yuj yaelal.
15 A ebꞌ sicꞌbꞌilel vuj chiꞌ, ol ex yacꞌ bꞌinaj ebꞌ ayic ol scatabꞌan junocxo anima ebꞌ. Ol ex in sateli, palta a dꞌa ebꞌ in checabꞌ ol vacꞌ jun acꞌ bꞌi yic syacꞌ bꞌinaj ebꞌ.
16 Yaln̈ej mach dꞌa jun chon̈abꞌ tic scꞌan vachꞌilal dꞌa yibꞌan̈, a dꞌayin ol scꞌanaꞌ, a in Dios in svaqꞌuelcꞌoch tas svalaꞌ. Yaln̈ej mach syacꞌ stiꞌ dꞌa junoc tasi, a in bꞌi ol yacꞌ bꞌinajoc. A dꞌa jun tiempoal chiꞌ, jantac yaelal toxo ix ecꞌbꞌati, ol bꞌatcan satcꞌolal, man̈xo ol in nacoti.
17 Abꞌec, ol in bꞌo jun acꞌ satchaan̈ yedꞌ jun acꞌ yolyibꞌan̈qꞌuinal. A tastac ecꞌnacxo, ol bꞌatcan satcꞌolal, man̈xa bꞌaqꞌuin̈ ol nachajcotoc.
18 Tzalajan̈ec dꞌa masanil tiempo yuj tas ol in cꞌulej, yujto ol in bꞌoxiqꞌue chon̈abꞌ Jerusalén bꞌaj ay tzalajcꞌolal, a ebꞌ anima cajan taꞌ ol tzalaj ebꞌ vuuj.
19 Ol in tzalajpax val yuj in chon̈abꞌ Jerusalén chiꞌ, man̈xa bꞌaqꞌuin̈ ol abꞌchaj yel yav ebꞌ anima yuj yaelal taꞌ.
20 Malaj ebꞌ unin jayen̈ej cꞌual ol ecꞌ taꞌ ol chamoc, malaj pax ebꞌ icham anima manto cꞌoch yabꞌilal ol chamoc. Tato ay mach scham dꞌa 100 abꞌil sqꞌuinal, unin animato schami. A mach ol chamoc ayic manto cꞌoch dꞌa 100 abꞌil chiꞌ, a yuj schucal spet chami.
21 A ebꞌ in chon̈abꞌ chiꞌ ol laj sbꞌo spat ebꞌ, ol cajnaj ebꞌ dꞌa yool. Ol yavej yuva ebꞌ, man̈ chꞌococ mach ol loan sat.
22 Man̈xo ton̈ejoc ol sbꞌoqꞌue spat ebꞌ, chꞌocxo mach ol aj dꞌa yool. Man̈ ol yavej yavbꞌen ebꞌ, chꞌocxopax mach ol loan sat. A ebꞌ in chon̈abꞌ chiꞌ, ol najatbꞌoc sqꞌuinal ebꞌ icha sqꞌuinal te teꞌ. A ebꞌ sicꞌbꞌilel vuuj chiꞌ, najtil ol yacꞌ tzalajbꞌoc scꞌol ebꞌ yedꞌ smunlajel.
23 A ebꞌ in chon̈abꞌ chiꞌ, man̈ nabꞌan̈ejoc ol munlaj ebꞌ, man̈ ol cham yuninal ebꞌ vanto sqꞌuibꞌi. Yujto a in chon̈abꞌ chiꞌ, a ebꞌ anima vacꞌnaccan in vachꞌcꞌolal dꞌa yibꞌan̈ a in Jehová in tic, a ebꞌ ay yin̈tilal ebꞌ. Icha chiꞌ ol aj pax ebꞌ yuninal ebꞌ.
24 Ayic manto in yavtej ebꞌ, toxo ix in tacꞌvi dꞌa ebꞌ, ayic manto lajvi yalan ebꞌ, toxo ix vabꞌ tas syal ebꞌ.
25 A nocꞌ oques yedꞌ nocꞌ calnel, junn̈ej ol va nocꞌ. A nocꞌ choj, a an̈ an̈cꞌultac ol scꞌux nocꞌ ichoc nocꞌ vacax. Axo nocꞌ chan, a lum pococ ol slo nocꞌ. A dꞌa in tzalan bꞌaj tzꞌoch ejmelal dꞌayin, malaj junoc tas ol yal yixtani. A in val svalaꞌ, xchi Jehová.