64
Mamin, comonoc tza jac satchaan̈ tzach emta dꞌa sat luum tic, yic tzꞌibꞌxi lum nivac vitz dꞌa ichan̈,2 icha tzꞌaj xejqꞌue a aꞌ yuj teꞌ cꞌacꞌ ov yajochi. Eman̈coti yic tzach yojtaquejel ebꞌ ayoch ajcꞌolal dꞌayach, yic tzꞌibꞌxiqꞌue nivac chon̈abꞌ dꞌa ichan̈ yuj xivelal.
3 Comonoc tza cꞌulej icha a cꞌulejnac dꞌa pecaꞌ. Ayic emnacul chiꞌ, a cꞌulannac tastac man̈ naanoc cuuj, te satubꞌtac yilji. A lum nivac vitz ibꞌxinacqꞌue lum dꞌa ichan̈.
4 Atax dꞌa pecaꞌ chiꞌ, malaj bꞌaj tzꞌabꞌchaji, malaj bꞌaj tzꞌilchaj junocxo dios scꞌulan icha tas tza cꞌulej yuj svachꞌiloc ebꞌ tzach acꞌanoch dꞌa scꞌool.
5 Dꞌa tzalajcꞌolal tza cha ebꞌ vachꞌn̈ej tas scꞌulej, naann̈ej yuj ebꞌ scꞌulan tas tza nibꞌej. A achxo tzacꞌcot yoval a cꞌol dꞌayon̈, yujto ix och co mul dꞌayach, sco cꞌulann̈ej chucal. ¿Tzatom yal co colchaji?
6 Co masanil, lajan on̈ dꞌa yol a sat icha mach man̈ vachꞌoc icha yalan ley. Masanil tas vachꞌ sco cꞌulej calani, lajan icha junoc cꞌapac cꞌapac mictac. Yuj co chucal, yuj chiꞌ lajan on̈ icha teꞌ taquin̈ xil teꞌ tzꞌicꞌjibꞌat yuj icꞌ.
7 Malaj junoc on̈ sco cꞌan a colval, maxtzac co nacot co cꞌoch dꞌayach, yujto tza cꞌubꞌejel a bꞌa dꞌayon̈, tzon̈ actancan dꞌa yol scꞌabꞌ co chucal.
8 Palta a ach tic Mamin Jehová, co mam ach. A on̈ tic, icha lum tzꞌacbꞌil lum caji, a achxo tic, ichato co tzꞌacumal aji, a ach a bꞌonac on̈ co masanil.
9 Mamin, mocabꞌ te cot oval dꞌayon̈. Man̈xoocabꞌ a nan̈ejcot co chucal. Ina to a chon̈abꞌ on̈.
10 A juntzan̈ chon̈abꞌ ic yaji, toxo ix can tzꞌinan, toxo ix lan̈chajcanem Jerusalén, man̈xalaj mach cajan dꞌay.
11 A a templo te vachꞌ yilji to icn̈ej yaji, aton bꞌaj ochnac ebꞌ co mam quicham ejmelal dꞌayach, toxo ix lajviem stzꞌabꞌati. A tas te nibꞌabꞌil cuuj, aton a templo chiꞌ, toxo ix lajvieli.
12 Mamin Jehová, ayic tzilan masanil juntzan̈ tic, ¿tom malaj tas ol a cꞌulej yuuj? ¿Tom ol acꞌn̈ejoch co yaelal?