A spac syacꞌ Jehová dꞌa ebꞌ ajcꞌool
63
—¿Mach jun scot dꞌa nivan chon̈abꞌ Bosra, dꞌa yol smacbꞌen Edom, chacchac spichul ayochi, te ayxo smay yilji, yedꞌnac val yip scoti? Ix tacꞌvi Jehová icha tic:—A in Jehová in tzin javi, ay in poder in colvaji. Svalanpaxi to ol in chꞌolbꞌitej yaj dꞌa stojolal, xchi.
2 —¿Tas yuj chacchac yilji a pichul, ichato ach tecꞌviel yal sat uva? xin chi dꞌay.
3 Ix yalani:
—Yujto ix in teqꞌuem juntzan̈ nación icha stecꞌjiel yal sat uva. A inn̈ej, malaj junocxo nación ix och vedꞌoc. Aycot voval ix in tecꞌanem ebꞌ vajcꞌool, yujto aycot yoval in cꞌool dꞌa ebꞌ. Icha chiꞌ ix aj yoch chititoc schiqꞌuil ebꞌ dꞌayin, ix chicꞌax in pichul tic.
4 Yujto ix in naꞌ to ix javi scꞌual in colanel in chon̈abꞌ, svacꞌanpax spac dꞌa ebꞌ ajcꞌool.
5 Ix in ecꞌ qꞌueleloc, tato ay mach scolvaj vedꞌoc. Palta ix satqꞌue in cꞌool, yujto malaj mach tzꞌoch vedꞌoc. Yuj chiꞌ a val yuj yoval in cꞌol ix in tecꞌbꞌan in bꞌa, yuj chiꞌ ix yal in colan in chon̈abꞌ in chꞌocoj.
6 Yedꞌ val yoval in cꞌool, ix in tecꞌanem masanil nación. Ix in satanel ebꞌ yedꞌ voval, ix bꞌey val schiqꞌuil ebꞌ vuj dꞌa sat luum, xchi Jehová.
A svachꞌcꞌolal Dios dꞌa Israel
7 In gana svaleli jantac tzon̈ xajanej Jehová, tzin bꞌitan val jantac tas ix scꞌulej cuuj. Tzon̈ xajanej a on̈ yin̈tilal on̈ Israel tic. Jantac tas ix scꞌulej cuuj, ix ocꞌxi scꞌol dꞌayon̈, yujto te xajan on̈ yuuj.
8 Ix yalan Jehová icha tic: A juntzan̈ anima tic, in chon̈abꞌ ebꞌ, vuninal ebꞌ, man̈xo ol meltzajoch ebꞌ ajcꞌolal dꞌayin, xchi. Yuj chiꞌ ix coljiel ebꞌ yuj Jehová chiꞌ
9 dꞌa masanil syaelal. Man̈ chꞌococ mach ix schecbꞌat scol ebꞌ, palta a val ix schꞌox sbꞌa icha ángel yic scolan ebꞌ. Yujto xajan ebꞌ yuuj, tzꞌocꞌ scꞌol dꞌa ebꞌ, yuj chiꞌ ix colji ebꞌ yuuj. Ix quetzjibꞌey ebꞌ yuuj, ichataxon scꞌulej yedꞌ ebꞌ.
10 Palta te pit ix yutej sbꞌa ebꞌ dꞌay, ix yacꞌan cus Yespíritu Jehová chiꞌ ebꞌ, aton Espíritu Axon̈ej Ochi. Yuj chiꞌ ix meltzajoch ajcꞌolal dꞌa ebꞌ, ix yacꞌan oval yedꞌ ebꞌ.
11 Yuj chiꞌ, ix snaancot ebꞌ tas ujinac dꞌa pecaꞌ, dꞌa stiempoal vin̈aj Moisés. Ix scꞌanbꞌan ebꞌ icha tic: ¿Bꞌajtil ay Jehová coljinac ebꞌ co mam quicham dꞌa aꞌ mar, stan̈vumal pax ebꞌ? ¿Bꞌajtil ay jun yacꞌnacoch Yespíritu Axon̈ej Och dꞌa ebꞌ?
12 Aton jun schꞌoxnac spoder dꞌa vin̈aj Moisés. A Jehová pojjinac snan̈al aꞌ mar dꞌa yichan̈ ebꞌ schon̈abꞌ, yic sbꞌinajn̈ej sbꞌi ebꞌ dꞌa juneln̈ej.
13 A icꞌannac ecꞌ ebꞌ schon̈abꞌ dꞌa yich aꞌ mar chiꞌ. Maj el n̈ernaj ebꞌ, icha yecꞌ nocꞌ chej dꞌa tzꞌinan luum, xchi ebꞌ.
14 A Yespíritu Jehová icꞌannac bꞌey ebꞌ schon̈abꞌ chiꞌ, yic syacꞌan yicꞌ yip ebꞌ, icha syacꞌ nocꞌ vacax tzꞌicꞌjiem vael dꞌa lum acꞌlictac. Icha chiꞌ yutejnac yicꞌan bꞌey ebꞌ schon̈abꞌ chiꞌ, yic sbꞌinaj yuj snivanil yelcꞌochi.
Lesal dꞌa Dios yuj scꞌanchaj colval
15 Mamin Jehová, ilon̈cot dꞌa jun edꞌtal to icn̈ej yaji, aton satchaan̈ bꞌaj cajan ach, bꞌaj man̈ jantacoc svachꞌil. ¿Bꞌaqꞌuin̈to ol a chꞌox a vachꞌcꞌolal yedꞌ ipalil chiꞌ? ¿Bꞌaqꞌuin̈ ol ocꞌxoc a cꞌool dꞌayon̈? ¿Mato ix lajvi a nivancꞌolal chiꞌ dꞌayon̈?
16 A ach tic, co Mam ach. Vachꞌchom a vin̈aj Abraham yedꞌ vin̈aj Israel man̈ on̈ yojtacoc ebꞌ, palta a ach tic co Mam ach, toxonton co Columal ach.
17 Mamin ¿tas yuj tzon̈ icꞌcanel dꞌa yol a bꞌe, tzacꞌan pitbꞌoquel co pensar yic man̈xa elcꞌoch dꞌayon̈? Acꞌxi a vachꞌcꞌolal dꞌayon̈ a checabꞌ on̈ tic, a on̈ yin̈tilal on̈ can ebꞌ a chon̈abꞌ to icn̈ej yaji.
18 A on̈ a chon̈abꞌ on̈ tic, sicꞌbꞌil on̈ el uuj, jayen̈ej abꞌil ix co caj lum co luum, axo ticnaic, a ebꞌ ayoch ajcꞌolal dꞌayon̈ ix tecꞌanem a templo.
19 Ichato malaj bꞌaj tzacꞌ yajalil dꞌayon̈, ichato malaj bꞌaj sbꞌinaji to ic on̈. Ichn̈ejtaꞌ caji.