62
Ix yalan Jehová icha tic:Yuj val to tzex in xajanej ex aj Sion, yuj chiꞌ man̈ ol in em numan. Yuj val to tzex in xajanej ex aj Jerusalén, yuj chiꞌ man̈ ol vicꞌlaj vip masanto ol checlajel e tojolal icha yic sqꞌuin̈ibꞌi, axo e colnabꞌil, ol checlajel icha yajoch scꞌacꞌal teꞌ taj dꞌa qꞌuicꞌalqꞌuinal.
2 Masanil nación ol och qꞌuelan yilan e tojolal. Masanil ebꞌ rey, ol och qꞌuelan ebꞌ yilan snivanil eyelcꞌochi. Yuj chiꞌ ol acꞌchajoch junxo eyacꞌ bꞌi. A in Jehová in tic ol vacꞌochi.
3 Icha scheclajel snivanil yelcꞌoch junoc vin̈ rey yuj scorona, icha chiꞌ ol aj vacꞌan checlaj snivanil velcꞌochi, yujto ayex ecꞌ dꞌa yol in cꞌabꞌ.
4 Man̈xo ol e cuch “Actabꞌilcani”, man̈xo ol alchajpax dꞌa e lum tic, “Satbꞌileli”, palta to ol e cuch: “Nibꞌabꞌil”. Axo lum e luum ol scuchcan: “Nupnajnac,” yujto nibꞌabꞌil ex vuuj. Yajal vaj dꞌa lum e luum tic.
5 Yujto icha val junoc vin̈ quelem snupnaj yedꞌ junoc ix cobꞌes, icha chiꞌ ol in aj eyedꞌoc, ol in ochxoc eyedꞌoc, ol in tzalaj eyedꞌoc, icha stzalaj junoc vin̈ quelem yedꞌ yetbꞌeyum, icha chiꞌ ol in tzalaj eyedꞌoc.
6 Ex aj Jerusalén, ix vacꞌcanoch e tan̈vumal dꞌa yibꞌan̈ smuroal e chon̈abꞌ. Dꞌa cꞌual dꞌacꞌval ol yal ebꞌ icha tic: A ex tzex avaj dꞌa Jehová, man̈ ex och vaan eyavaj dꞌay.
7 Man̈ e cha yicꞌ yip Jehová, masanto ol sbꞌoxiqꞌue Jerusalén tic, yic vachꞌ masanil ebꞌ anima dꞌa yolyibꞌan̈qꞌuinal tic, ol yal vachꞌ lolonel ebꞌ dꞌay, xcham ebꞌ, xchi Jehová.
8 A Jehová toxo ix yacꞌ stiꞌ, ol yaqꞌuelcꞌoch tas ix yal chiꞌ yuj spoder. Ix yalan icha tic: Man̈xa bꞌaqꞌuin̈ ol in cha svabꞌat e trigo ebꞌ ajcꞌool, man̈oc ebꞌ chꞌoc nacional ol ucꞌanbꞌat e vino, aton tastac tzeyicꞌ dꞌa e munlajel.
9 Palta to a ex val ol e mol sat eyavbꞌen, ol e vaani, ol eyalan vachꞌ lolonel dꞌayin yuuj. Ol e molanpax sat eyuva, ol eyucꞌan yal eyuva chiꞌ dꞌa yol yamaqꞌuil in templo, xchi Jehová.
10 Ex aj Jerusalén, elan̈ec dꞌa spuertail e chon̈abꞌ, bꞌoecbꞌat sbꞌe ebꞌ eyetchon̈abꞌ van sjaxi. Pan̈an tzeyutej bꞌaj chꞌolquixtac, tzeyicꞌanel qꞌuen qꞌueen dꞌa yol bꞌe chiꞌ. Tzeyacꞌanqꞌue junoc bandera yic schꞌoxan dꞌa juntzan̈xo nación bꞌajtil ay jun bꞌe chiꞌ.
11 A Jehová tzꞌalan dꞌa ebꞌ cajan bꞌaj slajvicꞌoch yolyibꞌan̈qꞌuinal tic: Alec dꞌa ebꞌ aj Sion icha tic: Ilecnabꞌ sjavi e Columal, yedꞌnac tas ix yicꞌ yuj smunlajel, xe chi, xchi Jehová.
12 A ebꞌ israel, ol alchajoc to schon̈abꞌ Dios yaj ebꞌ, sicꞌbꞌilel ebꞌ, aton masanil ebꞌ ix colji yuj Jehová. A Jerusalén ol scuch Chon̈abꞌ Nibꞌabꞌil, Man̈xo Actabꞌiloccani.