Yabꞌixal scolnabꞌil Israel
61
A Yespíritu Jehová Cajalil ayoch dꞌayin, yujto sicꞌbꞌil in el yuuj. Checbꞌil in cot yuuj, yic tzul valel vachꞌ abꞌix dꞌa ebꞌ mebꞌaꞌ, svacꞌan stecꞌanil ebꞌ man̈xa yip yuj cuscꞌolal, svalan dꞌa ebꞌ icha preso yaji to syal yel ebꞌ dꞌa libre.2 Svalanpaxeli to ix ja scꞌual co colchaj yuj Jehová co Diosal, scꞌual pax yacꞌanecꞌ co pac dꞌa ebꞌ cajcꞌool. Ix in checjicoti yic svacꞌan snivanil scꞌol ebꞌ cuscꞌolal yaji.
3 Tzin javipax vacꞌ tzalajcꞌolal dꞌa ebꞌ aj Sion cuscꞌolal yaji, aton ebꞌ syacꞌqꞌue qꞌuen ticꞌaqꞌuil taan̈ dꞌa sjolom, a tzalajcꞌolal svacꞌ sqꞌuexuloc oqꞌuel. A bꞌit yic aloj vachꞌ lolonel svacꞌcanoch sqꞌuexuloc ilcꞌolal. Lajan ol aj ebꞌ icha junoc teꞌ ji avabꞌil yuj Jehová, yic sbꞌeybꞌalej tojolal ebꞌ yuj yicꞌanchaan̈ Jehová chiꞌ ebꞌ.
4 A juntzan̈ chon̈abꞌ satnaqueli, ol sbꞌoxiqꞌue ebꞌ, ol sbꞌoanpaxqꞌue juntzan̈ pat ebꞌ macꞌbꞌilem lan̈naj dꞌa pecaꞌ.
5 Ex vetchon̈abꞌ, a ebꞌ chꞌoc nacional ol tan̈van nocꞌ e calnel, e munlajel yedꞌ eyavbꞌen uva.
6 Ol yalan ebꞌ to sacerdote ex Jehová, schecabꞌ ex co Diosal. Ol ex tzalaj yedꞌ sbꞌeyumal juntzan̈xo nación chiꞌ. Vachꞌ ol aj eyilji yuj tastac vachꞌ yilji ol yacꞌ ebꞌ dꞌayex.
7 A ex tic, icha val ix aj eyabꞌan syail, qꞌuixvelal yedꞌ bꞌuchval, icha pax chiꞌ ol aj e chaan e bꞌeyumal yedꞌ e tzalajcꞌolal, malaj slajvubꞌ.
8 Yujto a val tojolal snibꞌej Jehová, scot yoval yuj elcꞌal yedꞌ ixtoj anima. Yuj chiꞌ val dꞌa smojal ol aj spacan dꞌa ebꞌ ix ex ixtani. Ol lajvoc chiꞌ, ol sbꞌoan jun strato eyedꞌoc dꞌa masanil tiempo.
9 Ol bꞌinaj val eyin̈tilal dꞌa scal masanil chon̈abꞌ. Masanil mach ol ex ilanoc, ol nachajel yuj ebꞌ to a Jehová tzꞌacꞌan svachꞌcꞌolal dꞌayex.
10 Tzin te tzalaj val ticnaic yuj Jehová, tzin qꞌue val chaan̈ in tzalaj yuj in Diosal, yujto te vachꞌ ix yutej yacꞌan in colnabꞌil yedꞌ tojolal, ichato ix och in pichuloc yuuj. Icha svachꞌil tzꞌajoch spichul junoc vin̈ quelem yedꞌ junoc ix cobꞌes ayic snupnaj ebꞌ, icha chiꞌ in yutej.
11 Icha tzꞌaj sqꞌueul tas sqꞌuibꞌ dꞌa sat luum, ma icha yelta svol junoc te teꞌ, icha chiꞌ ol aj yacꞌan checlaj tojolal Jehová Cajal dꞌa yichan̈ masanil nación yuj yicꞌjichaan̈.