Sbꞌinajnaquil acꞌ Jerusalén
60
Ix yalan Jehová icha tic:Ex aj Jerusalén, qꞌuean̈ecxi vaan, te vachꞌ eyicoꞌ yujto scheclajxiqꞌue in tziquiquial dꞌa e cal.
2 Axo yolyibꞌan̈qꞌuinal tic, a qꞌuicꞌqꞌuinal ol musancanoc, ichato ol can juntzan̈xo nación dꞌa scal jun nivan qꞌuicꞌalqꞌuinal. A exxo tic, a in Jehová in tic ol vacꞌ saquilqꞌuinal dꞌayex, ol checlajel in tziquiquial dꞌa e cal.
3 A juntzan̈ nivac nación chiꞌ, ol javoc dꞌayex yuj e saquilqꞌuinal chiꞌ. A ebꞌ vin̈ rey, ol javoc ebꞌ vin̈ ul yil in tziquiquial ol checlaj chiꞌ.
4 Qꞌuean̈ec qꞌuelan, tzeyilan dꞌa e patic eyichan̈ to a masanil ebꞌ eyetchon̈abꞌ, ol laj smolbꞌej sbꞌa ebꞌ sjax dꞌayex. A ebꞌ eyal eyuninal, najat ol cot ebꞌ, mecꞌbꞌil ebꞌ ol ul acꞌjoccan ebꞌ dꞌayex.
5 Ayic ol eyilan icha chiꞌ, ol ex qꞌue jucnaj e tzalaji, ol ex te tzalaj val. Yujto ol laj yicꞌcot sbꞌeyumal juntzan̈ nación ay dꞌa scꞌaxepal aꞌ mar, ol ul yacꞌancan ebꞌ dꞌayex.
6 Ol majel sat e lum tic yuj jantac nocꞌ camello ol yicꞌcot ebꞌ aj Madián yedꞌ ebꞌ aj Efa. Ol javocpax masanil ebꞌ aj Sabá, yedꞌnac qꞌuen oro ebꞌ yedꞌ incienso. Ol yalanel vachꞌ lolonel ebꞌ dꞌayin Jehová in tic, yuj tas tzin cꞌulej.
7 Masanil nocꞌ calnel ay dꞌa Cedar, ol eyiquej nocꞌ. Masanil nocꞌ chꞌac calnel ay dꞌa Nebaiot, a nocꞌ ol eyacꞌlabꞌej, yic ol eyacꞌan nocꞌ silabꞌil dꞌa valtar, aton silabꞌ nibꞌabꞌil vuuj. Icha chiꞌ ol vutej, yic ay yelcꞌoch in templo dꞌayex.
8 Ol eyalan icha tic: ¿Tas juntzan̈ scot chiꞌ, icha scot asun, ma icha scꞌoch nocꞌ paramuch dꞌa yedꞌtal?
9 A jun ol eyil chiꞌ, aton teꞌ barco scot dꞌa scꞌaxepal aꞌ mar, bꞌabꞌel scot teꞌ yic Tarsis yuj teꞌ. Van yicꞌjicot ebꞌ eyuninal aycanbꞌat dꞌa najat yuj ebꞌ, yedꞌnac qꞌuen oro ebꞌ yedꞌ qꞌuen plata. Ol in icꞌjocchaan̈ a in Jehová e Diosal, A inxon̈ej Ochi. A in pax ol ex vacꞌ bꞌinajoc.
10 A ebꞌ chꞌoc nacional, a ebꞌ ol bꞌoanxiqꞌue smuroal e chon̈abꞌ, axo ebꞌ sreyal ebꞌ ol ex acꞌan servil. Vachꞌchom yuj yoval in cꞌool ix vacꞌoch eyaelal, axo ticnaic, yuj in vachꞌcꞌolal tzꞌocꞌxi in cꞌol dꞌayex.
11 A spuertail e chon̈abꞌ, jacann̈ej dꞌa cꞌualil yedꞌ dꞌacꞌvalil yic syicꞌcot sbꞌeyumal juntzan̈ nación chiꞌ dꞌayex, yic sjavipax sreyal ebꞌ dꞌa eyichan̈.
12 A juntzan̈ nivac nación, ma ebꞌ rey man̈ ol ex acꞌan servil, ol satjoquel ebꞌ. Man̈xa bꞌaj ol checlaj jabꞌoc ebꞌ.
13 A jantac sbꞌeyumal lum Líbano ol icꞌchajcot dꞌayex: Aton teꞌ taj, teꞌ cꞌubꞌtaj yedꞌ teꞌ tzicap. Ol och teꞌ svachꞌil yelvanubꞌoc in templo, yic ol vicꞌchaan̈ jun lugar chiꞌ bꞌaj ol in ajoc.
14 Masanil yin̈tilal ebꞌ ix ex ixtan chiꞌ, ol javoc ebꞌ yaqꞌuem sbꞌa dꞌayex. Masanil ebꞌ ix ex chacaneli, ol ul em cuman ebꞌ dꞌayex, ol yalan ebꞌ dꞌayex icha tic: A ex aj chon̈abꞌ Sion ex tic, yicn̈ej Jehová eyaji, aton sDiosal Israel Axon̈ej Ochi, xcham ebꞌ.
15 Vachꞌchom actabꞌil ex can dꞌa pecaꞌ, chacbꞌil ex eli, man̈xa mach tzꞌecꞌ bꞌaj ecꞌnac ex chiꞌ, palta axo ticnaic, ol vacꞌ eyicꞌjichaan̈ yedꞌ e bꞌinajnaquilal yuj masanil chon̈abꞌ dꞌa juneln̈ej.
16 A juntzan̈ nación chiꞌ, ol yacꞌ e vael ebꞌ te vachꞌ, axo ebꞌ sreyal ebꞌ, ol yicꞌcot sbꞌeyumal ebꞌ, ol ex yacꞌan servil ebꞌ, icha syutej junoc ix nunabꞌil yacꞌan chunoc yuneꞌ. Icha chiꞌ ol aj eyojtacaneli to a in Jehová e Diosal in, e Columal vaji, a in sDiosal in vin̈aj Jacob, tzex in coloꞌ.
17 Ol in qꞌuex masanil tas ay dꞌayex: A qꞌuen oro ol vacꞌ sqꞌuexuloc qꞌuen bronce, axo qꞌuen plata ol vacꞌ sqꞌuexuloc qꞌuen hierro. A qꞌuen bronce ol vacꞌ sqꞌuexuloc te teꞌ, axo qꞌuen hierro chiꞌ ol vacꞌ sqꞌuexuloc qꞌuen comon qꞌueen. A ebꞌ eyajalil, dꞌa stojolal ol ex schꞌolbꞌitej ebꞌ, yuj chiꞌ juncꞌolal ol ex ajoc.
18 A dꞌa e luum chiꞌ, man̈xa milojcham anima, oval yedꞌ jantac chucal ol ujoc. Man̈xa tas ol satel dꞌa yol e macbꞌen chiꞌ yuj oval. A in ol ex in col icha junoc muro, ol in eyicꞌchaan̈ yujto ix ex in coloꞌ.
19 Man̈xalaj ol och yoc cꞌu eyuuj, ma yoc qꞌuen uj dꞌacꞌvalil, yujto a in Jehová saquilqꞌuinal ol in aj dꞌayex dꞌa juneln̈ej. A in e Diosal in tic ol ex vacꞌ bꞌinajoc.
20 A jun saquilqꞌuinal ol vacꞌ dꞌayex chiꞌ, a ol ochcan sqꞌuexuloc yoc cꞌu yedꞌ yoc qꞌuen uj. A jun chiꞌ, malaj bꞌaqꞌuin̈ ol tupoc, yujto a in Jehová in saquilqꞌuinal ol in aj dꞌayex dꞌa juneln̈ej. Man̈xa bꞌaqꞌuin̈ ol ex cusoc.
21 Masanil ebꞌ eyetchon̈abꞌ, vachꞌn̈ej ol aj spensar ebꞌ. Ol yiquejpax slum ebꞌ dꞌa juneln̈ej. Lajan ol aj ebꞌ icha svol junoc teꞌ avbꞌen teꞌ avabꞌil vuuj. Ol in cꞌulej jun chiꞌ yuj vicꞌjichaan̈.
22 A ebꞌ quenn̈ej sbꞌisul dꞌa e cal, ol qꞌuibꞌ val sbꞌisul ebꞌ, te tecꞌan ol aj ebꞌ icha junoc nivan chon̈abꞌ. Ayic ol cꞌoch stiempoal yelcꞌoch juntzan̈ tic, a in val Jehová in ol vaqꞌuelcꞌoch dꞌa elan̈chamel, xchi Jehová chiꞌ.