A syaelal Israel yuj schucal
59
Tocval tzꞌel yip spoder Jehová, yuj chiꞌ maxtzac yal scolvaji, tocval ix chacan̈bꞌi Jehová, yuj chiꞌ maxtzac yabꞌ e tevi, maay.2 A chucal tze cꞌulej, a chiꞌ ayecꞌ dꞌa scal e nan̈al yedꞌ Dios. A juntzan̈ e mul chiꞌ, a tzꞌecꞌ macan dꞌa e cal yedꞌ Dios chiꞌ, yuj chiꞌ maxtzac yabꞌ tas tzeyalaꞌ.
3 A ex tic, chicꞌtac e cꞌabꞌ e milancham anima, mictac e cꞌabꞌ e cꞌulan chucal. Axon̈ej es yedꞌ chucal tzꞌelta dꞌa yol e tiꞌ.
4 Malaj junoc ex vachꞌ tzeyutej e bꞌa. Max e chꞌolbꞌitej yaj ebꞌ anima dꞌa stojolal, ma dꞌa stzolal. A tas malaj yelcꞌochi yedꞌ esal lolonel, a tzeyacꞌlabꞌej ayic sbꞌo yaj eyoval. Tze cꞌulan chucal, yujto a chiꞌ ayecꞌ dꞌa e pensar.
5 A tas nabꞌil eyuuj chiꞌ, lajan val icha sn̈olobꞌ nocꞌ chan. A mach sloan sn̈olobꞌ nocꞌ chan chiꞌ, schamn̈ej. Ayic smacꞌji pojoc, a nocꞌ cotac ajavchan tzꞌelta dꞌa yool. An̈ejaꞌ tas nabꞌil eyuj chiꞌ, icha schꞌal nocꞌ xim yaji.
6 A schꞌal nocꞌ xim chiꞌ, max yal-laj sbꞌo pichul yedꞌoc, malaj mach spich sbꞌa yedꞌ tas sbꞌo nocꞌ chiꞌ. Icha schꞌal nocꞌ xim chiꞌ, icha chiꞌ juntzan̈ chucal tze cꞌulej, malaj jabꞌoc tas tzeyicꞌ dꞌay.
7 Tzex bꞌat lemnaj dꞌa scal chucal. Elan̈chamel tze milcham ebꞌ anima malaj smul. An̈ej dꞌa chucal ayoch e pensar, a bꞌaj tzex eqꞌui, jantac tastac tze satcaneli.
8 An̈ej oval tzeyacꞌaꞌ, malaj jabꞌoc tojolal scheclaj dꞌa tas tze cꞌulej. A e bꞌeybꞌal chiꞌ, juneln̈ej man̈ vachꞌoc. A ebꞌ tzꞌoch tzacꞌan eyuuj, malaj jabꞌoc juncꞌolal tzꞌilchaj yuj ebꞌ dꞌayex.
9 Yuj chiꞌ syalan ebꞌ anima icha tic: Malaj mach stecꞌbꞌan sbꞌa cuuj, malaj mach tzon̈ colanel dꞌa yol scꞌabꞌ ebꞌ tzon̈ ixtani. Sco tan̈vej tzalajcꞌolal, palta axo cuscꞌolal oyan och dꞌa co patic. Sco tan̈vej bꞌaqꞌuin̈ tzon̈ colchajel dꞌa yol scꞌabꞌ ebꞌ tzon̈ ixtani, palta malaj mach tzon̈ colani.
10 Toxon̈ej sco machlej bꞌaj tzon̈ eqꞌui, icha yecꞌ machmon junoc mach max uji yilan dꞌa sat pat. A dꞌa chimcꞌualil tzon̈ telvi, ichato dꞌacꞌvalil ayon̈eqꞌui. Vachꞌchom tecꞌan on̈ scabꞌi, palta ichato chamnac on̈xo.
11 Ay bꞌaj scot coval, sn̈iii yol co jaj icha nocꞌ oso, mato tzon̈ cꞌacvi icha nocꞌ paramuch. Sco tan̈vej co chꞌolbꞌitaj dꞌa stojolal, palta malaj bꞌaqꞌuin̈ sbꞌo caji. Sco tan̈vej co colji, palta najat yajcanel dꞌayon̈.
12 Mamin Jehová, yel ix co pitej co bꞌa dꞌayach. A co mul chiꞌ tzꞌicꞌancot dꞌa quibꞌan̈. Chequel yaj co pitalil, cojtac co mul chiꞌ.
13 Ach co Diosal, te pit scutej co bꞌa dꞌayach, max ach co cꞌanabꞌajejlaj. Max co nibꞌejoch tzacꞌan co bꞌa uuj. An̈ej val chucal yedꞌ ixtoj anima sco cꞌan co cꞌulej. Nabꞌil cuuj tas tzꞌaj cacꞌan es yedꞌ quixtan ebꞌ quetanimail.
14 Sco chaquel bꞌaj sbꞌo yaj ebꞌ quetanimail. A tojolal, najat yajcanbꞌat cuuj. A tas yel, man̈xalaj mach schaan yabꞌ bꞌaj smolbꞌej sbꞌa ebꞌ anima. Axo tojolal chiꞌ, maxtzac checlaj bꞌaj ay.
15 Man̈xa mach tzꞌalan tas yel, axo ebꞌ snibꞌej yactancan chucal, tzꞌicꞌjiecꞌ tastac ay dꞌa ebꞌ, xchi ebꞌ anima.
Ol colvaj Dios dꞌa ebꞌ schon̈abꞌ
A Jehová max scha scꞌol juntzan̈ tic, yujto maxtzac chꞌolbꞌitaj ebꞌ anima dꞌa stojolal.
16 Toxon̈ej sat scꞌol Jehová ayic syilani to malaj mach syacꞌlej sbꞌoan yaj jun tic. Yuj chiꞌ syacꞌoch sbꞌa scolan ebꞌ yedꞌ spoder, ol yacꞌ ganar scolan ebꞌ.
17 Icha ebꞌ soldado ayoch spichul yic oval, icha chiꞌ ol aj sjavi Jehová yedꞌ yoval scꞌool, yic syacꞌan spac dꞌa ebꞌ ixtum anima. A stojolal, icha qꞌuen maclabꞌ n̈iꞌ cꞌol yaji. Axo scolnabꞌil, lajan icha qꞌuen xumpil.
18 Ol spacan dꞌa junjun mach, ato syalaꞌ tas scꞌulej. Ol yacꞌanoch syaelal ebꞌ ayoch ajcꞌolal dꞌay. A ebꞌ schichon scꞌol dꞌay, aton ebꞌ cajan dꞌa scꞌaxepal aꞌ mar, ol yacꞌ spac dꞌa ebꞌ dꞌa smojal.
19 Masanil ebꞌ anima dꞌa yolyibꞌan̈qꞌuinal tic, bꞌaj sqꞌueul cꞌu, masanto bꞌaj tzꞌem cꞌu, ayic ol yilanoch stziquiquial Jehová ebꞌ, ol xiv ebꞌ, yujto ol ja icha val junoc aꞌ elumaꞌ, ichato pechbꞌil yuj junoc oval icꞌ.
20 A Jehová tzꞌalani to ol javoc scol ebꞌ aj Sion, aton ebꞌ yin̈tilal Jacob sna sbꞌa yuj schucal.
21 Syalan Jehová icha tic: A ticnaic tzin bꞌocan jun in trato eyedꞌoc, svacꞌancan in tiꞌ to a Vespíritu yedꞌ in cꞌaybꞌubꞌal svacꞌcan dꞌayex, ol cann̈ej eyedꞌoc. Ol eyalancan dꞌa ebꞌ eyuninal yedꞌ dꞌa ebꞌ eyin̈tilal ol eln̈ej, yic tze cꞌanabꞌajej dꞌa juneln̈ej, xchi Jehová.