A tzecꞌojcꞌolal
58
Ix yalan Jehová dꞌayin icha tic:Avajan̈ dꞌa chaan̈, man̈ ach xiv avaji. Te chaan̈ tzꞌel av icha spuji junoc qꞌuen trompeta. Al dꞌa ebꞌ yin̈tilal Jacob tic to te pit ebꞌ, te chuc ebꞌ.
2 Junjun cꞌu scomon och ebꞌ ejmelal dꞌayin. Scomon tzalaj ebꞌ, snibꞌan ebꞌ yojtaquejel in bꞌeybꞌal, icha junoc chon̈abꞌil anima sbꞌeybꞌalan tojolal, ichato malaj bꞌaj syiqꞌuel spensar ebꞌ dꞌa in checnabꞌil, ichato scꞌan juntzan̈ checnabꞌil ebꞌ yic tojolal dꞌayin, schꞌoxan ebꞌ to stzalaj ebꞌ sjavi dꞌayin.
3 Ijan scot yoval ebꞌ dꞌayin syalan ebꞌ icha tic: Nabꞌan̈ej tzon̈ comon och tzecꞌojcꞌolal dꞌayach, tocval tzon̈ ilaꞌ. Nabꞌan̈ej squixtej co bꞌa coch ejmelal dꞌayach, tocval tzon̈ a naꞌa, xchi ebꞌ. Svalan icha tic: Yel toni, ayic tzex och dꞌa tzecꞌojcꞌolal chiꞌ, an̈ej tas tze nibꞌej, a chiꞌ tze cꞌulej, tzeyixtan ebꞌ e munlajvum.
4 Ayic tzex comon och dꞌa tzecꞌojcꞌolal chiꞌ, an̈ej telajbꞌail yedꞌ oval tzeyacꞌaꞌ, tze macꞌlan e bꞌa yuj e chuc pensaril. Tocval ol vabꞌ e lesal dꞌa jun e tzecꞌojcꞌolal tzeyacꞌ chiꞌ.
5 ¿Tom a e naani to tzin tzalaj yedꞌ tas tzeyutej e bꞌa chiꞌ? A jun tze cꞌulej chiꞌ cuscꞌolal, tzex comon em n̈ojan icha spacchaj teꞌ aj, tzex comon ecꞌ jichan dꞌa yibꞌan̈ qꞌuen ticꞌaqꞌuil taan̈ yedꞌ pichul ya svaꞌi. ¿Tom a jun chiꞌ tzeyacꞌ scuch tzecꞌojcꞌolal te vachꞌ dꞌa yol in sat e naani?
6 Palta man̈ ichoc taꞌ. Ol val dꞌayex to a tzecꞌojcꞌolal scha in cꞌool, aton stzolal tic: Colequelta ebꞌ anima ayoch dꞌa yol scꞌabꞌ ebꞌ chuc spensar. Man̈xo eyixtej ebꞌ smunlaj dꞌayex, actejequel ebꞌ tzꞌixtaj chiꞌ, man̈xo eyixtej ebꞌ.
7 A ebꞌ anima scham yuj vejel, aqꞌuec svael ebꞌ. Axo ebꞌ malaj spat, aqꞌuec sposado ebꞌ dꞌa e pat. A ebꞌ malaj spichul, aqꞌuecoch spichul ebꞌ, man̈ eyactej eyacꞌan snivanil scꞌol ebꞌ eyetchon̈abꞌ.
8 Tato icha chiꞌ tzeyutej e bꞌa, yaln̈ej bꞌaj ol checlaj in vachꞌcꞌolal dꞌayex, icha tzꞌaj sqꞌuin̈ibꞌi dꞌa junxo cꞌu. Elan̈chamel ol ex colchajoc. A in e tojolal vaji, bꞌabꞌel in bꞌat eyuuj, axo in tziquiquial, tzacꞌan eyuuj.
9 Yuj chiꞌ tato ol ex avaj dꞌayin, elan̈chamel ol in tacꞌvoc dꞌayex. Tato ol el eyav e cꞌanan in colval, ol valan dꞌayex icha tic: Ina in tic, xin chama. Tzeyiqꞌuel juntzan̈ chucal chiꞌ dꞌa e cal. Man̈ e suy slumal ebꞌ eyetanimail, man̈xo e naqꞌue esal lolonel dꞌa spatic ebꞌ.
10 Tato tzeyacꞌ svael ebꞌ ay svejel, tzex colvaj dꞌa ebꞌ ay tas tzꞌoch yuuj, tato icha chiꞌ, ol checlaj e vachꞌil dꞌa scal anima icha saquilqꞌuinal dꞌa scal qꞌuicꞌalqꞌuinal. Ol ex checlajel icha yoc cꞌu dꞌa chimcꞌualil dꞌa scal qꞌuicꞌalqꞌuinal chiꞌ.
11 Tato icha chiꞌ, ol ex in cuchbꞌejn̈ej. Jantac e vael ol vacꞌ dꞌa lum tzꞌinan luum. Ol vacꞌan yip e nivanil, lajan ol ex aj icha junoc tas avabꞌil ayn̈ejoch yalil, ma icha junoc sjaj a aꞌ malaj bꞌaqꞌuin̈ stupi.
12 Ol e bꞌoxiqꞌue e chon̈abꞌ dꞌa yedꞌtal bꞌaj jubꞌilemi, aton dꞌa yibꞌan̈ yich aycanem dꞌa pecaꞌ. Ol alchaj dꞌayex to bꞌoumexxiqꞌue muro lan̈chajnac, bꞌoumexxiqꞌue pat lan̈chajnaquemi.
Tas tzꞌalji yuj scꞌual icꞌoj ip
13 A in Jehová in tic svalaꞌ: Tato man̈ comonoc tzeyutejbꞌat scꞌual icꞌoj ip, malaj e munlajel tze bꞌo dꞌa jun cꞌu vic yaj chiꞌ, tato tzex tzalaj paxi yujn̈ej to ay yelcꞌoch jun cꞌu chiꞌ dꞌayex, max eyal comon lolonel,
14 tato icha chiꞌ, ol ex tzalaj vedꞌoc. A in ol vacꞌ snivanil eyelcꞌoch dꞌa masanil chon̈abꞌ. Ol eyacꞌ tzalajbꞌoc e cꞌool dꞌa lum luum vacꞌnac e macbꞌenoc dꞌa e mam eyicham aj Jacob. A in ton Jehová in svalcan jun tic.