57
Ayic scham ebꞌ anima vachꞌ spensar, malaj mach snaan ebꞌ. Ayic satem ebꞌ vachꞌ sbꞌeybꞌal chiꞌ, malaj mach snachajel yuuj to ayic scham ebꞌ chiꞌ, scolchajcanel ebꞌ dꞌa scal yaelal.2 A ebꞌ vachꞌ sbꞌeybꞌal chiꞌ, juncꞌolal yaj ebꞌ, van yicꞌan yip ebꞌ bꞌaj scꞌoch chiꞌ.
Ay yoval scꞌol Jehová dꞌa ejmelal dꞌa comon dios
3 Ix yalan Jehová icha tic: Cotan̈ec dꞌayin a ex tze bꞌeybꞌalej chucal, a ex ton tze bꞌeybꞌalej ajchumal, ex tzex em ajmulal.
4 ¿Mach ebꞌ tze bꞌuchuꞌ? ¿Mach ebꞌ tzeyedꞌtej sat, tzꞌelta jabꞌan eyacꞌ tze chacaneli? A ex tic te chuc ex, te esalvum ex.
5 A dꞌa yichtac teꞌ ji yedꞌ te teꞌ cꞌayum xiil, ataꞌ tze cꞌulej ajmulal. Tzeyacꞌanpax ebꞌ eyuninal silabꞌil dꞌa e diosal dꞌa scaltac qꞌuen qꞌueen dꞌa stitac aꞌ cotac aꞌ sbꞌeyi.
6 Ex israel, scha val e cꞌol eyoch ejmelal dꞌa qꞌuen qꞌueen n̈eleli sat dꞌa yoltac aꞌ cotac aꞌ sbꞌeyi, a juntzan̈ chiꞌ ix e sicꞌcanel e diosaloc. Aton dꞌa juntzan̈ chiꞌ tze sequem vino, tzeyacꞌan sat eyavbꞌen silabꞌil dꞌay. ¿Am e naani to man̈ ol vacꞌoch eyaelal yuj juntzan̈ tas tze cꞌulej chiꞌ?
7 A dꞌa lum jolomtac vitz te chaan̈ ay steꞌal, ataꞌ tze bꞌo e vaynubꞌ, tze n̈usanpax e silabꞌ.
8 A dꞌa yoloch e puerta, ataꞌ tzeyacꞌoch yechel e diosal yajbꞌentac yilji. A inxo tic, tzin bꞌatcan satcꞌolal eyuuj. Tze quichanel bꞌeran e bꞌa, tzex ecꞌ jichan dꞌa sat e chꞌat levan sat. Tzeyacꞌan e trato e mulan yedꞌ ebꞌ tze nibꞌejochi, tzex vay yedꞌ ebꞌ.
9 Tzeyicꞌanbꞌat aceite yedꞌ jantac perfume, tzex bꞌat lemnaj dꞌa jun yechel comon dios scuch Moloc, tzex och ejmelal dꞌay. Tze checanbꞌat ebꞌ e checabꞌ dꞌa najat bꞌat sayanecꞌ juntzan̈xo e diosal, masanto tzꞌemcꞌoch ebꞌ bꞌaj ay ebꞌ chamnac.
10 Tzex cꞌunbꞌi eyecꞌ dꞌa najat chiꞌ, palta max nachajel jabꞌoc eyuuj to malaj yelcꞌoch jun tze cꞌulej chiꞌ. Yujto te nibꞌabꞌil jun tze sayecꞌ chiꞌ, yuj chiꞌ tzꞌochxi eyip, tze sayanxi.
11 ¿Mach juntzan̈ ebꞌ bꞌaj tzex xivi to nivan yelcꞌoch chiꞌ dꞌayex, yuj chiꞌ tzin eyactejcani, tzin bꞌat satcꞌolal eyuuj? ¿Tom yujto man̈xa tas svalaꞌ, yuj chiꞌ man̈xa velcꞌoch dꞌayex?
12 A ticnaic, ol vacꞌ checlaj juntzan̈ e bꞌeybꞌal te vachꞌ e naan chiꞌ, palta man̈ ol ex colchajlaj yuuj.
13 Ayic ol el eyav e cꞌanan in colval, ol valan dꞌayex: Aocabꞌ e comon diosal chiꞌ tzex colani, xin chama. A masanil juntzan̈ chiꞌ, ol icꞌchajbꞌat yuj icꞌ, an̈ej yedꞌ jun pusoc icꞌ chiꞌ ol bꞌatoc. Axo pax ebꞌ tzin acꞌanoch yipoc scꞌool jun, ol cajnajn̈ej ebꞌ dꞌa in chon̈abꞌ tic, ol ajn̈ej ebꞌ dꞌa lum tzalan vicn̈ej yaji, xchi Jehová.
A ebꞌ israel sna sbꞌa
14 Ol abꞌjoc yalchaj icha tic: Bꞌoec jun bꞌe, te pan̈an tzeyutej, iqꞌuequel tastac ayem dꞌa yol bꞌe chiꞌ yic vachꞌ tzꞌecꞌ in chon̈abꞌ, xchama.
15 Yujto a Dios Axon̈ej nivan Yelcꞌochi, Ayn̈ej ecꞌ dꞌa juneln̈ej, scuchan pax Axon̈ej Ochi, a tzꞌalan icha tic: A in tic, cajan in dꞌa lugar te chaan̈ to vicn̈ej yaji, palta ay in pax ecꞌ yedꞌ ebꞌ emnaquilal yaji yedꞌ ebꞌ sna sbꞌa scꞌool yuj schucal, a in sviptzitej ebꞌ.
16 Man̈xo ol cot voval dꞌa in chon̈abꞌ tic, man̈xo ol vacꞌn̈ejcot voval dꞌa ebꞌ dꞌa juneln̈ej, talaj a juntzan̈ anima bꞌobꞌil vuj tic, schabꞌaxqꞌue scꞌol ebꞌ dꞌayin.
17 Yuj smul ebꞌ israel tic yic sayann̈ej scomon diosal ebꞌ, ix cot voval dꞌa ebꞌ, ix vacꞌanoch syaelal ebꞌ, ix in paticanel ebꞌ. Palta ix spitejn̈ej val sbꞌa ebꞌ, ix scꞌulan ebꞌ icha tas snibꞌej.
18 Ix vil val sbꞌeybꞌal ebꞌ, palta ol van̈tej ebꞌ, ol vacꞌan yicꞌ yip ebꞌ. Ol in tan̈van ebꞌ, ol vacꞌan snivanil scꞌol ebꞌ scus yuj smul.
19 Ol valan dꞌa ebꞌ icha tic: A ex najat cajan ex yedꞌ ex lacꞌan ayex, juncꞌolalocabꞌ eyaji, xin chama. Yujto a in ol van̈tej in chon̈abꞌ tic.
20 Palta axo ebꞌ chuc sbꞌeybꞌal jun, lajan ebꞌ icha aꞌ mar scot bꞌalbꞌon sat, max ochlaj vaan, syicꞌancot jantac cꞌalem.
21 A ebꞌ scꞌulan chucal, malaj jabꞌoc vachꞌil ol scha ebꞌ, xchi Jehová.