A colnabꞌil tzꞌaltaj dꞌa masanil anima
56
Ix yalan Jehová icha tic:Bꞌeybꞌalejec tojolal, aocabꞌ tas vachꞌ tze cꞌulej, yujto toxo val ol ex in coleli. Ol in chꞌoxel in poder in colvaji.
2 Te vachꞌ yic ebꞌ scꞌanabꞌajan juntzan̈ checnabꞌil tic, sbꞌeybꞌalan ebꞌ icha val yaji, aton ebꞌ nivan yelcꞌoch scꞌual icꞌoj ip dꞌay, max yixtejbꞌat ebꞌ, aton ebꞌ syailan sbꞌa, max scꞌulej chucal ebꞌ, xchi Jehová.
3 Tato ay ebꞌ chꞌoc nacional syacꞌoch sbꞌa dꞌa yol scꞌabꞌ Jehová, mocabꞌ yal ebꞌ icha tic: A Jehová max in chaanoch dꞌa scal schon̈abꞌ tic. An̈ejtonaꞌ ebꞌ vin̈ malaj yuninal, mocabꞌ yal ebꞌ vin̈ icha tic: A in tic lajan in icha junoc teꞌ taquin̈ teꞌ.
4 A Jehová tzꞌalan icha tic: Tato a ebꞌ vin̈ malaj yuninal chiꞌ nivan yelcꞌoch scꞌual icꞌoj ip dꞌay, scꞌanabꞌajan pax ebꞌ vin̈ tas tzin nibꞌej, tojol syutej sbꞌa ebꞌ vin̈ dꞌa in trato,
5 ay jun tas te vachꞌ ol vacꞌ dꞌa ebꞌ vin̈ dꞌa yichan̈ to ay yuninal, ma yisil. A jun chiꞌ, to ol bꞌinajn̈ej ebꞌ vin̈ dꞌa in templo yedꞌ dꞌa scal in chon̈abꞌ. Ol vacꞌanpax jun sbꞌi ebꞌ vin̈ dꞌa juneln̈ej, malaj bꞌaqꞌuin̈ ol sateloc.
6 Axo pax ebꞌ chꞌoc chon̈abꞌil syacꞌoch sbꞌa dꞌa yol in cꞌabꞌ, yic tzin yacꞌan servil ebꞌ, tzꞌochpax ebꞌ ejmelal dꞌayin, tzin sxajanej ebꞌ, scꞌanabꞌajan pax scꞌual icꞌoj ip ebꞌ, tojol syutej sbꞌa ebꞌ dꞌa in trato, ol in chaoch ebꞌ dꞌa scal in chon̈abꞌ.
7 Ol vicꞌcot ebꞌ dꞌa jun in tzalan vicn̈ej yaji. Ol vacꞌan tzalajbꞌoc scꞌol ebꞌ dꞌa spatil bꞌaj tzꞌoch lesal dꞌayin. Ol in cha silabꞌ ebꞌ sn̈ustzꞌa dꞌa yibꞌan̈ valtar, yujto a in templo tic, ol alchaj yuuj to spatil lesal yaj dꞌa masanil chon̈abꞌ.
8 A in Jehová Yajal in dꞌa Smasanil, a in tzin molbꞌejcot ebꞌ israel aycanbꞌat dꞌa juntzan̈ chꞌoc nacional, a in svalaꞌ: Ol vicꞌcot juntzan̈ ebꞌ chꞌoc nacional yic junn̈ej tzꞌaj ebꞌ yedꞌ ebꞌ israel molbꞌilxo vuuj, xchi Jehová.
A schucal pensar ebꞌ yajalil chon̈abꞌ
9 Ix yalan Jehová icha tic: Ex chꞌoc nacional, cotan̈ec icha nocꞌ chium nocꞌ. Cotan̈ec milval, ul satequel in chon̈abꞌ tic, icha syacꞌ nocꞌ caltacteꞌal nocꞌ sjavi, schianbꞌat nocꞌ calnel.
10 Yujto a ebꞌ stan̈vumal in chon̈abꞌ tic, ichato maxtzac yal yilan ebꞌ, maxtzac nachajel yuj ebꞌ tas scꞌulej. Lajan ebꞌ icha nocꞌ tzꞌiꞌ max chivaji. Jichanecꞌ ebꞌ tzꞌecꞌ cꞌu. An̈ej vayan̈ sgana ebꞌ scꞌulej.
11 Lajan ebꞌ icha nocꞌ tzꞌiꞌ tzꞌochn̈ej svejel, malaj bꞌaqꞌuin̈ sbꞌudꞌji. A ebꞌ yilumal in chon̈abꞌ tic, max nachajel jabꞌoc yuj ebꞌ, an̈ej tas sgana ebꞌ sayeqꞌui.
12 Syalan ebꞌ icha tic: Coyec bꞌat co sayec an̈ an̈, a an̈ te ov scuqꞌuejec, yic sqꞌue val an̈ dꞌa co jolom. Scucꞌanpax an̈ qꞌuicꞌan icha sco cꞌulej ticnaic, mato ol te ecꞌ yibꞌan̈ cucꞌan an̈ jun, xchi ebꞌ.