Avtabꞌil masanil anima yuj Jehová
55
Ix yalan Jehová icha tic:Masanil ex stacji e tiꞌ, cotan̈ec, ul uqꞌuec a aꞌ. A ex malaj e tumin, cotan̈ec ul chaec tas tze va dꞌa nabꞌan̈ej, ul chaec yal uva yedꞌ lech man̈ tupbꞌiloc.
2 ¿Tas yuj tze comon lajej e tumin dꞌa tas man̈ vaeloc? ¿Tas yuj tze comon lajej e tojol tze cha dꞌa tas to max bꞌudꞌji e cꞌol yuuj? Abꞌec val sicꞌlabꞌil tas ol valaꞌ: Tato tze cꞌanabꞌajej tas svalaꞌ, ol e va vael te vachꞌ, ol ex bꞌudꞌjoc val sicꞌlabꞌil.
3 Cotan̈ec dꞌayin, maclejec val eyabꞌ tas svalaꞌ, ol ex ajn̈ejecꞌoc. Ol in bꞌo junoc in trato eyedꞌoc dꞌa juneln̈ej yujto tzex in xajanej, yic tzꞌelcꞌoch in tiꞌ vacꞌnac dꞌa vin̈aj rey David.
4 A in vacꞌnacoch vin̈aj David chiꞌ testigoal dꞌa juntzan̈xo nación, yic scuchbꞌan vin̈, ma yic syacꞌan yajalil vin̈ dꞌay.
5 Ol eyavtejcot ebꞌ anima man̈ eyojtacoc. A ebꞌ anima chiꞌ elan̈chamel ol ja lemnaj ebꞌ dꞌayex, yujto a in Jehová e Diosal in, A inxon̈ej Ochi, a in ol ex vacꞌ icꞌjocchaan̈, xchi Jehová.
6 Aqꞌuecoch e bꞌa dꞌa yol scꞌabꞌ Jehová, yacbꞌan tzato yal eyavaj dꞌay. Avajan̈ec dꞌay, yacbꞌan lacꞌanto ayeqꞌui.
7 A ex chuc e bꞌeybꞌal yedꞌ ex chuc e pensar, actejeccan juntzan̈ e chucal chiꞌ. Meltzajan̈ec dꞌa Jehová. Ol ocꞌxoc scꞌol dꞌayex, ol ex yacꞌ nivancꞌolal co Diosal.
8 Ix yalan Jehová icha tic: A tas nabꞌil vuuj, man̈ lajanoc yedꞌ tas tze naꞌa. A tas tzin cꞌulej, man̈ lajanoc yedꞌ tas tze cꞌulej.
9 A in pensar yedꞌ tas tzin cꞌulej chiꞌ man̈ lajanoc icha eyicoꞌ, yujto yel val te ecꞌbꞌalxo tas tzin naꞌ chiꞌ dꞌa yichan̈ schaan̈il yajqꞌue satchaan̈ dꞌa yibꞌan̈ lum luum tic.
10 A yaxn̈abꞌ yedꞌ qꞌuen sacbꞌacom tzꞌemta dꞌa satchaan̈, max meltzajlaj dꞌa ichn̈ej taꞌ, palta to schꞌayxican lum luum yuuj yic vachꞌ sqꞌueul masanil tas tzꞌavchaj dꞌa luum. Syacꞌan sat, tzꞌelta yin̈atil yic syal yavchajxi, syacꞌanpax svael ebꞌ anima.
11 Icha yaxn̈abꞌ chiꞌ, icha chiꞌ yaj in lolonel, max meltzajlaj dꞌayin dꞌa ichn̈ej taꞌ, palta to sbꞌocan tas nabꞌil vuuj, tzꞌelpaxcꞌoch tas tzin nibꞌej.
12 Tzalajcꞌolal ol aj eyelta bꞌaj ayex ecꞌ presoal, juncꞌolal ol aj e meltzaj dꞌa e chon̈abꞌ. Masanil lum vitz, lum tzalquixtac, ichato ol qꞌue val sjaj lum dꞌa chaan̈ yuj tzalajcꞌolal. A teꞌ nivac teꞌ, icha val to ol stzꞌit scꞌabꞌ teꞌ stzalaji.
13 A lum bꞌaj ay teꞌ qꞌuiix, a teꞌ cꞌubꞌtaj ol qꞌuibꞌoc. A lum bꞌaj ay teꞌ sac qꞌuiix, a teꞌ arrayán ol qꞌuibꞌ sqꞌuexuloc teꞌ. Ol in cꞌulej juntzan̈ tic yic sbꞌinaj in bꞌi a in Jehová in tic, yic tzin nachajn̈ejcot dꞌa juneln̈ej, xchi Jehová.