Xajann̈ej ebꞌ israel yuj Jehová
54
Ix yalan Jehová icha tic dꞌa Jerusalén:Ex aj Jerusalén, qꞌuean̈ecchaan̈ e bꞌitan dꞌa tzalajcꞌolal. A dꞌa pecaꞌ lajan e chon̈abꞌ icha junoc ix ix max unevilaj, actabꞌilcan yuj yetbꞌeyum. Axo ticnaic, lajan icha junoc ix tzijtum yuneꞌ ix alji, ecꞌbꞌal sbꞌisul yuneꞌ ix dꞌa yichan̈ junoc ix ix ayn̈ejecꞌ vin̈ yetbꞌeyum yedꞌoc.*
2 Aqꞌuec levanbꞌoc e macbꞌen bꞌaj cajan ex, man̈ ex xiv e levbꞌitani. Icha junoc mach slevbꞌitan smantiado, sjuclitej schꞌan̈al, smacꞌan tzatzbꞌoc yestacail, icha chiꞌ tze cꞌulej.
3 Yujto ol levanbꞌoc e macbꞌen chiꞌ, yuj chiꞌ ol eyicꞌcanecꞌ slum ebꞌ anima cajan dꞌa e patic eyichan̈. A ebꞌ eyin̈tilal ol acꞌan ganar juntzan̈xo nación, ol cajnaj ebꞌ dꞌa juntzan̈ chon̈abꞌ cannac tzꞌinan.
4 Ex aj Jerusalén, man̈ ex xivoc, man̈xo ol ex can dꞌa qꞌuixvelal, man̈xo emnaquiloc ol ex utajoc. Man̈xo ol e nacot tas ajnac yel e qꞌuixvelal dꞌa pecaꞌ, ayic ex actajcan icha junoc ix ix man̈xa yetbꞌeyum.
5 Yujto a in in bꞌonac ex, icha eyetbꞌeyum vaji. A in bꞌi Jehová Yajal dꞌa Smasanil. E Columal vaji, e Diosal a inxon̈ej Ochi, sDiosal in pax masanil anima.
6 A e chon̈abꞌ tic, lajan icha junoc ix cobꞌes ix actabꞌilcan yuj yetbꞌeyum, cuscꞌolal yajcan ix. Icha chiꞌ ajnaccan e chon̈abꞌ tic, axo ticnaic, A in e Diosal in tzex vavtejxi.
7 Ex aj Jerusalén, quenn̈ej tiempoal ix ex vactejcani, axo ticnaic, tzex in chaanxi yujto te xajan ex vuuj.
8 Ix cot voval dꞌayex jun tiempoal, ix in cꞌubꞌejel in bꞌa dꞌayex, palta yujto tzex in xajanej dꞌa juneln̈ej, yuj chiꞌ ix ocꞌxi in cꞌol dꞌayex, a in ton Jehová e Columal vaji, a in svalaꞌ.
9 Icha val vutejnac vacꞌan in tiꞌ dꞌa vin̈aj Noé to man̈xa bꞌaqꞌuin̈ ol jax jun oval aꞌ mucjinac yolyibꞌan̈qꞌuinal tic, icha chiꞌ tzꞌaj vacꞌan in tiꞌ ticnaic, man̈xo ol cot voval dꞌayex junelxo, man̈xo ol ex in tumej.
10 Vachꞌchom sqꞌuexmaj yedꞌtal lum nivac vitz, tzꞌem lan̈naj lum tzalquixtac, palta malaj bꞌaqꞌuin̈ ol vactej ex in xajanani. Malaj bꞌaqꞌuin̈ ol lajvoc in trato ix valaꞌ to ayn̈ej juncꞌolal dꞌa in cal eyedꞌoc. A in Jehová in svalaꞌ.
A acꞌ Jerusalén
11 Ix yalanxi Jehová icha tic: Obꞌiltac ex, ex aj Jerusalén. Ix eyabꞌ val syail yuj tas ix ecꞌ dꞌa eyibꞌan̈, malaj val junoc mach ix acꞌan snivanil e cꞌool. Axo ticnaic ol vacꞌcanem e chon̈abꞌ tic dꞌa yibꞌan̈ qꞌuen qꞌueen vachꞌ yilji, ol vacꞌancanem yich dꞌa yibꞌan̈ qꞌuen zafiro.
12 A yelvanubꞌ e chon̈abꞌ, ol in bꞌo yedꞌ qꞌuen rubí, axo spuertail, ol in bꞌo yedꞌ qꞌuen berilo, axo smuroal ol in bꞌo yedꞌ qꞌuen qꞌueen te vachꞌ yilji.
13 Ol in cꞌaybꞌej ebꞌ eyuninal yic vachꞌ ol aj yelcꞌoch ebꞌ.
14 A tojolal, ol yicꞌn̈ej yipoc dꞌa e cal, ol ex colchajcanel dꞌa yol scꞌabꞌ ebꞌ anima tzex ixtani, ebꞌ tzex xibꞌtani. Man̈xa mach ol ex xibꞌtanoc.
15 Tato ay mach ol javoc yacꞌ oval eyedꞌoc, man̈oc in svacꞌcot ebꞌ, yuj chiꞌ ol eyacꞌn̈ej ganar ebꞌ.
16 Ilecnabꞌi, a in ix in bꞌo vin̈ tenum qꞌueen, syacꞌoch scꞌacꞌal teꞌ tzacꞌacꞌ vin̈ yic sbꞌoan yamcꞌabꞌ vin̈ yic oval. A in pax ix in bꞌo ebꞌ satanel anima yedꞌ juntzan̈ syamcꞌabꞌ vin̈ chiꞌ.
17 Palta malaj junoc yamcꞌabꞌ yic oval ol yal ex sataneli. A ebꞌ tzꞌacꞌanoch tas dꞌa eyibꞌan̈, numanxon̈ej ol ajcan ebꞌ eyuuj. Aton juntzan̈ tic svacꞌ dꞌa ebꞌ tzin acꞌan servil. A in ol ex in coloꞌ, xchi Jehová.