53
Ol yal Israel icha tic: ¿Toc ay mach tzꞌacꞌanoch dꞌa scꞌol tas scaleli? ¿Toc ay mach snachajel yuuj to a spoder Jehová scheclaj dꞌa jun abꞌix tic? xcham ebꞌ.
2 Snibꞌej Jehová to a jun schecabꞌ chiꞌ sqꞌuibꞌ icha svol junoc te teꞌ tzꞌem schꞌan̈al yibꞌ dꞌa taquin̈ luum. Man̈ nibꞌabꞌiloc yilji, malaj tas vachꞌ squiloch dꞌay.
3 A ebꞌ anima, ol sbꞌuch jun checabꞌ chiꞌ ebꞌ, ol spatiquejel ebꞌ. Ol acꞌjococh yaelal dꞌa yibꞌan̈ yuj ebꞌ, ol techaj yuuj, yujto cꞌajan yabꞌan syail. Icha junoc mach man̈xo smojoc yiljiochi, ol paticajeloc. Malaj ol elcꞌoch jun checabꞌ chiꞌ dꞌayon̈.
4 A co naani to a Dios tzꞌacꞌanoch yaelal dꞌa yibꞌan̈, syacꞌanpaxcan dꞌa emnaquilal, palta man̈ ichoctaꞌ. A co yaelal a on̈ tic ol acꞌjococh dꞌa yibꞌan̈, ol yabꞌ syail co qꞌuexuloc.
5 Ol tecjoquecꞌ qꞌuen dꞌa snivanil yuj co pitalil, ol yabꞌan val syail yuj co chucal. Yuj syaelal ol yabꞌ chiꞌ, ol ochxi juncꞌolal dꞌa co cal yedꞌ Dios. Yuj yechnaj chiꞌ, ol yacꞌxi co qꞌuinal.
6 Co masanil ix on̈ saclemcanbꞌat icha nocꞌ calnel. Junjun on̈ ix co naꞌ tas bꞌeal bꞌaj ix co nibꞌej bꞌaj ix on̈ bꞌatcani, axo Jehová ol acꞌancanoch co mul co masanil dꞌa yibꞌan̈ jun schecabꞌ chiꞌ.
7 Ol acꞌjoc val och syaelal yuj ebꞌ anima, emnaquilal ol aj yuj ebꞌ, palta malaj tas ol yalaꞌ. Ol icꞌjocbꞌat yuj ebꞌ, icha tzꞌaj yicꞌjibꞌat nocꞌ calnel bꞌaj smiljichamoc. Malaj tas ol yalaꞌ, numann̈ej ol ajoc, icha nocꞌ calnel sjoxchaji.
8 Ol icꞌchajelta dꞌa preso yic schꞌolbꞌitaji, ol acꞌjococh chamel dꞌa yibꞌan̈. Malaj mach ol och ilcꞌolal yuj schamel chiꞌ. Ol icꞌchajel dꞌa yolyibꞌan̈qꞌuinal tic yuj co mul a on̈ schon̈abꞌ on̈ tic. Cuuj ol yabꞌ syail.
9 Malaj val jabꞌoc chucal ol scꞌulej, malaj jabꞌoc es ol elta dꞌa stiꞌ. Vachꞌchom icha chiꞌ, a snaan ebꞌ anima to ol mucchaj dꞌa scal ebꞌ chuc, palta axo dꞌa scal ebꞌ bꞌeyum ol mucchajoc.
10 A Jehová tzꞌalan icha tic: Ol vacꞌ yabꞌ syail in checabꞌ icha yaj in naani. Ol yacꞌoch sbꞌa silabꞌil dꞌa yol scꞌabꞌ chamel yic tzꞌacꞌjican lajvoc smul masanil anima. Yuj chiꞌ ol pitzvoccan dꞌa juneln̈ej, ol yil ebꞌ yin̈tilal. Yuuj, ol elcancꞌoch tas nabꞌil vuuj.
11 Ayic toxo ix lajviecꞌ juntzan̈ yaelal chiꞌ dꞌa yibꞌan̈, ol tzalaj yuj spac jun yaelal chiꞌ to man̈ nabꞌan̈ejoc ix yabꞌ syail. Tzijtum ebꞌ anima ol ochcan vachꞌil yuj yojtacanel in checabꞌ chiꞌ ebꞌ, yujto ol icꞌjoccanel smul ebꞌ yuuj.
12 Yuj chiꞌ ol vacꞌ yopisio dꞌa scal ebꞌ nivac yelcꞌochi. Ay yalan yic yedꞌ ebꞌ yacꞌan ganar oval, yujto ix yacꞌoch sbꞌa dꞌa yol scꞌabꞌ chamel. Icha val tzꞌutaj ebꞌ scꞌulan chucal, icha chiꞌ ix utaji. Ix sbꞌec sbꞌa yuj smul masanil anima, ix tevi yuj ebꞌ yic tzꞌacꞌjican lajvoc smul ebꞌ chiꞌ, xchi Jehová.