Ol actajel Jerusalén
52
Ex aj Sion schon̈abꞌ Dios, aqꞌuequel e vayan̈, qꞌuean̈ec vaan, tecꞌbꞌejec e bꞌa. Chꞌoxequel svachꞌil eyilji, yujto man̈xa bꞌaqꞌuin̈ ol jax ebꞌ chꞌoc nacional chꞌoc sdiosal yacꞌ chucal dꞌayex.2 Qꞌuean̈ec vaan ex aj Jerusalén, maqꞌuequel pococ dꞌayex, ol ex emxoc cꞌojan dꞌa e despacho eyacꞌan yajalil. Ex aj Sion, ex ix ex xidꞌecꞌ dꞌa chꞌoc nacional, iqꞌuequel tas tzecꞌbꞌiloch dꞌa e jaj.
3 A Jehová Cajal tzꞌalan icha tic: Malaj val jabꞌoc tumin ix in cha dꞌa e patic ayic ix ex icꞌchajbꞌat checabꞌoc. An̈ejtonaꞌ, malaj pax tumin ol vacꞌaꞌ yic tzex vicꞌanxi meltzajoc.
4 A in chon̈abꞌ tic, bꞌatnac dꞌa Egipto dꞌa pecaꞌ, chꞌoc chon̈abꞌil ajnac yecꞌ ebꞌ taꞌ. Axo ticnaic ix ixtaj ebꞌ yuj ebꞌ aj Asiria, vachꞌchom malaj jabꞌoc yuuj.
5 Axo ticnaic, ¿tas smoj tzin cꞌulej? Dꞌa ichn̈ej taꞌ ix icꞌjibꞌat in chon̈abꞌ tic dꞌa Babilonia. A ebꞌ tzꞌacꞌan yajalil dꞌa yibꞌan̈ ebꞌ, syicꞌchaan̈ sbꞌa ebꞌ, max yactej ebꞌ in sbꞌuchani.
6 Yuj chiꞌ, ol cꞌoch scꞌual, ol yojtaquejel in chon̈abꞌ tic to Dios in, ol nachajel yuj ebꞌ to a in ix in lolon dꞌa ebꞌ, xchi Jehová.
7 Jantac svachꞌil quilan dꞌa tzalquixtac, ayic sjavi junoc mach tzꞌalan vachꞌ abꞌix. Yedꞌnac yabꞌixal juncꞌolal, syalanpax yabꞌixal colnabꞌil, syalan icha tic: Ex aj Sion, a e Diosal van yoch Reyal, xchi.
8 Abꞌec, a ebꞌ stan̈vumal e chon̈abꞌ, tzꞌel yav ebꞌ, jun lajan tzꞌaj sqꞌue n̈ilnaj ebꞌ yel yav yuj tzalajcꞌolal, yujto syil val ebꞌ sjax Jehová dꞌa Sion.
9 Ex aj Jerusalén juvinaccan e chon̈abꞌ, elocabꞌ eyav e bꞌitan dꞌa tzalajcꞌolal, yujto ol ocꞌxoc scꞌol Jehová dꞌayex, ol scolanxi Jerusalén.
10 Yujto ol schꞌox spoder Jehová yil juntzan̈xo nación. Masanil anima dꞌa yolyibꞌan̈qꞌuinal tic, ol yojtaquejel ebꞌ to a Dios on̈ colanxi.
11 Elan̈ec, elan̈ecta dꞌa yol scꞌabꞌ ebꞌ aj Babilonia. A ex eyedꞌnac yamcꞌabꞌ yic stemplo Jehová, man̈ eyam tas man̈ vachꞌoc, man̈ eyacꞌbꞌat e bꞌa dꞌa scal chucal.
12 Man̈ scꞌacꞌaliloc, man̈ elelaloc ol ex elta, yujto a Jehová co Diosal ol oymaj dꞌa e patictac, ol ex stan̈vani.
Syaelal jun Schecabꞌ Jehová
13 Ix yalan Jehová icha tic: A jun in Checabꞌ tic vachꞌn̈ej ol elcꞌochoc, ol icꞌjoc val chaan̈, ol bꞌinaj val.
14 Tzijtum mach ol sat scꞌol yilani, yujto ol ixtax yilji, man̈xo animaoc ol aj yilji yuj tas ol utajoc.
15 Icha pax chiꞌ jantac nación, ol sat scꞌol yilani ayic ol icꞌjocchaan̈. A ebꞌ rey toxon̈ej ol och qꞌuelan ebꞌ, yujto ol yil ebꞌ, ol nachajel yuj ebꞌ tas to manta bꞌaj ix yabꞌ ebꞌ yalji, xchi Jehová.