Lolonel yic snivanil scꞌol Jerusalén
51
A Jehová tzꞌalan icha tic:A ex tze nibꞌej e bꞌeybꞌalej tojolal, tze nibꞌej tzex javi dꞌayin, abꞌec val tas ol valaꞌ: Ilecnabꞌ bꞌaj cotnac eyin̈tilal, bꞌaj pax cotnac yin̈tilal ebꞌ e mam eyicham.
2 Ina vin̈ e mam eyicham aj Abraham yedꞌ ix e nun chichim ix Sara, malaj yuninal ebꞌ ayic vavtannac ebꞌ, palta vacꞌnac in vachꞌcꞌolal dꞌa ebꞌ, tzijtum ix aj yin̈tilal ebꞌ.
3 Ol vacꞌ in vachꞌcꞌolal dꞌa Sion, aton jun chon̈abꞌ macꞌbꞌilem lan̈najoc. A lum taquin̈ luum, ol yaxbꞌoccan sat luum, icha lum Edén ol aj luum. Yuj chiꞌ ol tzalaj ebꞌ cajan taꞌ, ol bꞌitan ebꞌ, ol yacꞌan yuj diosal ebꞌ dꞌayin.
4 Ex in chon̈abꞌ, maclejec eyabꞌ tas ol valaꞌ, abꞌec ex junjun chon̈abꞌ: Ol valel in cꞌaybꞌubꞌal yedꞌ in checnabꞌil. Icha saquilqꞌuinal ol aj dꞌayex.
5 Lacꞌanxo sja scꞌual in chꞌolbꞌitani, van sjapax scꞌual yic tzin colvaji. A yedꞌ in poder ol vacꞌan yajalil dꞌa yibꞌan̈ juntzan̈ chon̈abꞌ. A juntzan̈ chon̈abꞌ ay dꞌa stitac aꞌ mar, ol yacꞌoch in poder ebꞌ yipoc scꞌool.
6 Qꞌuean̈ec qꞌuelan dꞌa satchaan̈, tzex empax qꞌuelan dꞌa sat luum tic. A satchaan̈ chiꞌ, ol satem icha satem teꞌ tabꞌ, axo sat lum tic, ol cꞌabꞌoc icha scꞌabꞌi junoc pichul. A ebꞌ anima cajan dꞌa sat lum tic, ol satel ebꞌ icha satel nocꞌ us. Palta a colnabꞌil svacꞌaꞌ ay dꞌa juneln̈ej. A in tojolal malaj slajvubꞌ.
7 A ex eyojtac tojolal, ex tzeyacꞌoch in checnabꞌil dꞌa e cꞌool, abꞌec: Man̈ ex xiv yuj sbꞌuchval lolonel ebꞌ anima dꞌayex. Mocabꞌ chabꞌax e cꞌool yuj tas syal ebꞌ chiꞌ,
8 yujto ol satel ebꞌ icha junoc pichul ijtacxo, ma icha tzꞌaj junoc lana pichul scꞌuxjibꞌat yuj nocꞌ ij. Palta a in tojolal yedꞌ in colval ayn̈ejecꞌ dꞌa juneln̈ej, xchi Jehová.
9 Mamin Jehová, colvajan̈, cotan̈ yedꞌ a poder, icha a cꞌulejnac dꞌa pecaꞌ. A ach chocꞌ utejnac nocꞌ nivan nocꞌ dꞌa yol aꞌ mar, aton nocꞌ Rahab.
10 A ach a jacnac aꞌ mar, aton aꞌ te jul yich, a dꞌa sjulal yich aꞌ mar chiꞌ, icha bꞌe utejnac yic tzꞌecꞌ ebꞌ colbꞌil uuj.
11 Ichaton chiꞌ ol aj smeltzaj ebꞌ colbꞌilxo el uj Mamin Jehová. Ol javoc ebꞌ dꞌa Sion tic yedꞌ bꞌit yic tzalajcꞌolal. Ol tzetzon sat ebꞌ stzalaji, ol satel oqꞌuel yedꞌ cuscꞌolal.
12 A Jehová tzꞌalan icha tic: A in Jehová in svacꞌ eyip, ¿tas yuj tzex xiv dꞌa ebꞌ anima chamelbꞌa yaji, to lajan ebꞌ icha an̈ an̈cꞌultac cꞌun stacjieli?
13 A in Jehová in, a in in bꞌonac ex. A in in jen̈bꞌejnacbꞌat satchaan̈, in bꞌoannaquem lum luum tic dꞌa yedꞌtal. ¿Tom ix in bꞌatcan satcꞌolal eyuuj, yuj chiꞌ tzex xiv dꞌa jun tzex ixtani, jun snaan ex sataneli? Palta man̈ ex xivoc, a in ol in satel yoval scꞌol jun tzex ixtan chiꞌ.
14 A ebꞌ syabꞌ syail bꞌaj tzꞌixtaj chiꞌ, elan̈chamel ol coljoc ebꞌ. Man̈ ol cham ebꞌ dꞌa yol preso, man̈ ol yacꞌ vejel ebꞌ.
15 A in Jehová e Diosal in, a in bꞌi, Jehová Yajal dꞌa Smasanil. A in svacꞌqꞌue pon̈oljoc sat aꞌ mar.
16 A in in jen̈bꞌejnacbꞌat satchaan̈, in bꞌoannacpaxem lum luum tic dꞌa yedꞌtal. A in svacꞌ eyalel in lolonel, tzex in colanel yedꞌ in poder. A in sval dꞌa Sion: A ex tic in chon̈abꞌ ex, xin chi, xchi Jehová.
17 Aqꞌuequel e vayan̈ ex aj Jerusalén, qꞌuean̈ec vaan. Ix eyabꞌ val syail yuj yoval scꞌol Jehová ix yacꞌcot dꞌa eyibꞌan̈, palta toxo ix ecꞌbꞌati. Lajan ex aj icha junoc mach satel scꞌol yucꞌan an̈ an̈, man̈xalaj jabꞌoc an̈ chiꞌ syactejcan dꞌa yol yedꞌtal. 18 A dꞌa scal ebꞌ eyuninal ix eyil qꞌuibꞌoc, malaj junoc ebꞌ ix chꞌoxan bꞌe dꞌayex, malaj junoc ebꞌ ix ex quetzanbꞌati.
19 Aton cha macan̈ tas ix javi dꞌa eyibꞌan̈ tic: Ix macꞌchajem lan̈naj e chon̈abꞌ, ix champax ebꞌ cajan dꞌay yuj vejel yuj oval. ¿Machto val ol ocꞌ scꞌol dꞌayex? ¿Machto val ol acꞌan snivanil e cꞌool?
20 Toxo ix el yip ebꞌ eyuninal, toxo ix telvi ebꞌ icha nocꞌ cꞌultaquil chej scan dꞌa chꞌan̈ yaal. Toxon̈ej ix can teljabꞌ ebꞌ dꞌa schiquintac calle, yujto ix yabꞌ val syail yoval scꞌol Jehová e Diosal ebꞌ, yuj scachji ebꞌ yuuj.
21 Ex aj Jerusalén, van eyabꞌan val syail, icha ucꞌum an̈ eyeqꞌui, palta man̈ ex ucꞌumoc pax an̈.
22 A Jehová Cajal co Diosal paxi, aꞌ tzꞌalan icha tic: A in Jehová e Diosal in tzex in coloꞌ, a in ton sval icha tic: Ol viqꞌuecꞌ scopail yoval in cꞌol chiꞌ dꞌayex, man̈xa bꞌaqꞌuin̈ ol eyabꞌxi syail yuuj.
23 A dꞌa ebꞌ ixtannac ex, ataꞌ ol vacꞌ jun scopail yoval in cꞌol chiꞌ, aton dꞌa ebꞌ aljinac dꞌayex icha tic: Eman̈ec lachan dꞌa sat luum to ol on̈ bꞌeyecꞌ dꞌa eyibꞌan̈, xchi ebꞌ. Emnac ex lachan dꞌa sat lum chiꞌ, ecꞌnac tecꞌton ebꞌ dꞌa eyibꞌan̈ icha lum pococ, xchi Jehová.