50
A Jehová tzꞌalan icha tic dꞌa schon̈abꞌ:Ex israel, ¿tom tze naꞌa to a in ix ex in pechbꞌat icha junoc vin̈ spechanbꞌat yetbꞌeyum? Tato icha chiꞌ, ¿bꞌajtil ay yumal puclajbꞌail ix in bꞌo chiꞌ eyedꞌoc? ¿Tom a in ix ex in chon̈bꞌat checabꞌoc? Tato icha chiꞌ ¿mach bꞌaj ay in bꞌoc, yuj chiꞌ ix ex in chon̈bꞌati? A ex tic, ix ex icꞌjibꞌat dꞌa chꞌoc nacional yuj e mul, yuj e chucal.
2 ¿Tas yuj ayic ix in javi, malaj mach ix vilaꞌ? ¿Tas yuj ayic ix ex vavtani malaj mach ix in tacꞌvani? ¿Tom max techaj vuj ex in colan e naani? ¿Tom max yal ex vacꞌanel dꞌa libre? Naec val to cꞌocbꞌil junoc bꞌelan̈ lolonel svalaꞌ, stupem aꞌ mar, axo bꞌaj sbꞌey aꞌ nivac aꞌ, taquin̈ tzꞌajcani, axo nocꞌ chay, xcham nocꞌ yuj taquin̈tial, scꞌabꞌat nocꞌ yuj man̈ aꞌil.
3 A in svacꞌ qꞌuicꞌbꞌoquel satchaan̈, icha ebꞌ scus yuj schamnac, xchi Jehová.
Scꞌanabꞌajej jun Schecabꞌ Jehová
4 A jun schecabꞌ Jehová chiꞌ tzꞌalan icha tic: A Jehová Vajalil, a ix acꞌan jelanbꞌoc in loloni yic vachꞌ svacꞌ stecꞌanil ebꞌ cꞌunbꞌelal yaji. Junjun qꞌuin̈ibꞌalil syacꞌan in nibꞌej yic svabꞌ tas syacꞌ in cꞌaybꞌej.
5 A Jehová Vajalil ix acꞌan sjelanil in pensar, ix in cꞌanabꞌajejn̈ej, man̈ pitoc ix vutej in bꞌa.
6 Ix vacꞌ yich in patic smacꞌ ebꞌ ajcꞌool. Malaj tas sval dꞌa ebꞌ stzucanel xil in tiꞌ. Maj in cꞌubꞌejel in sat dꞌa ebꞌ tzin bꞌuchani yedꞌ ebꞌ stzubꞌan in sat.
7 A Jehová Yajal, a scolvaj vedꞌoc, yuj chiꞌ maj chabꞌax in cꞌol yuj tas tzin yutej ebꞌ chiꞌ. Tecꞌan ix vutej in bꞌa vacꞌan techajoc, yujto vojtac to man̈ ol el in qꞌuixvelal.
8 A jun tzin colani, ayecꞌ dꞌa in tzꞌey. Tato ay mach tzꞌacꞌanoch dꞌa vibꞌan̈, tzin bꞌat yedꞌoc dꞌa yichan̈ vin̈ tzin chꞌolbꞌitani. A junoc ay chucal syal dꞌa in patic, cotocabꞌ dꞌa in tzꞌey tic, syalani.
9 A Jehová Yajal, aꞌ scolvaj vedꞌoc. ¿Mach ol yal yacꞌanoch junoc tas dꞌa vibꞌan̈? Masanil ebꞌ ayoch ajcꞌolal dꞌayin, ol lajvoquel ebꞌ icha junoc pichul ijtacxo, xchi jun schecabꞌ Jehová chiꞌ.
10 A ex ay yelcꞌoch Jehová dꞌa yol e sat, tzeyabꞌanpax tas syal schecabꞌ: Tato tzex bꞌey dꞌa qꞌuicꞌalqꞌuinal, tato malaj tas tzꞌacꞌan sacqꞌuinal dꞌayex, aqꞌuecoch Jehová yipoc e cꞌool, tzex bꞌeyn̈ej yedꞌoc.
11 A exxo tzeyacꞌoch scꞌacꞌal juntzan̈ teꞌ yic syacꞌ yoc dꞌayex, an̈ejaꞌ dꞌa yoc chiꞌ tzex bꞌeyi. A Jehová ol acꞌancot jun yaelal dꞌa eyibꞌan̈, toxon̈ej ol ex emcan jichan dꞌa scal eyaelal chiꞌ.