A schecabꞌ Jehová sacqꞌuinal yaj dꞌa masanil nación
49
A jun schecabꞌ Jehová tzꞌalan icha tic:Ex anima cajan dꞌa stitac aꞌ mar, abꞌec tas ol valaꞌ. Ex anima te najat ayex, maclejec eyabꞌi: A Jehová avtannac in ayic manto in alji. Yalnaccanel in bꞌi ayic cuchbꞌil into och yuj in nun.
2 A tas svalaꞌ lajan icha qꞌuen espada te jay ye, icha chiꞌ ajnaccan yuj Dios. Scꞌubꞌejnac in el dꞌa yalan̈ scꞌabꞌ. Icha junoc jul-labꞌ te jay sn̈iꞌ, icha chiꞌ yutejnac in, scꞌubꞌejnac in dꞌa yol yedꞌtal sjul-labꞌ.
3 Yalannac dꞌayin icha tic: Ach Israel in checabꞌ ach, uuj ol checlaj in vachꞌil, xchi dꞌayin.
4 Palta ix in naani to nabꞌan̈ej ix in munlaji. Nabꞌan̈ej ix el vip, malaj tas ix vicꞌaꞌ, xin chi. Palta vojtac to chequel yaji tas vaj dꞌa yichan̈ Jehová. A spac in munlajel chiꞌ, ayecꞌ dꞌa yol scꞌabꞌ.
5 Axo ticnaic jun, toxo ix in cha snivanil velcꞌoch dꞌa yichan̈ Jehová in Diosal, a tzꞌacꞌan vip. Ayinto ecꞌ dꞌa yol scꞌol in nun ix snaani to tzin och schecabꞌoc, yic svicꞌan meltzaj ebꞌ israel yin̈tilal Jacob junelxo dꞌay.
6 Ix yalan Jehová dꞌayin icha tic: In checabꞌ ach yic tza tojolbꞌitanxi ebꞌ yin̈tilal Jacob, tzicꞌanxi meltzaj ebꞌ israel cannacto tic dꞌayin. Palta man̈ocn̈ej yuj chiꞌ ix ach in sicꞌcaneli, palta yic tzach vacꞌoch saquilqꞌuinalil dꞌa juntzan̈xo nación masanto bꞌaj slajvicꞌoch yolyibꞌan̈qꞌuinal, yic scolchaj ebꞌ vuuj, xchi dꞌayin, xchi jun schecabꞌ chiꞌ.
7 A Jehová Scolumal Israel, Dios Axon̈ej Ochi, slolon dꞌa schecabꞌ, aton jun paticabꞌileli, yajbꞌil yuj masanil nación, checabꞌ pax yajoch dꞌa ebꞌ yajal. Syalan icha tic: Ayic ol ach yilan ebꞌ yajal, ol qꞌue vaan ebꞌ, ol em n̈ojan ebꞌ dꞌa ichan̈, yujto a in Jehová sDiosal in Israel, A inxon̈ej Ochi, ix ach in siqꞌueli, svacꞌanelcꞌoch tas valnac, xchi Jehová.
Ol bꞌochajxiqꞌue Jerusalén
8 Syalan Jehová dꞌa schecabꞌ icha tic: Ayic ol cꞌoch stiempoal in chꞌoxan in vachꞌcꞌolal, ol ach in coloꞌ, ol in pacan tas ix a cꞌan dꞌayin. Ol ach in tan̈vej, ol ach vacꞌoch yic tzacꞌanelcꞌoch in trato yedꞌ masanil chon̈abꞌ, yic sbꞌochajxiqꞌue in chon̈abꞌ, yic tza pojanxiecꞌ smacbꞌen ebꞌ dꞌa lum luum cannac tzꞌinan.
9 Tzin checan al dꞌa ebꞌ icha to preso yaj dꞌa qꞌuicꞌalqꞌuinal icha tic: Elan̈eccan dꞌa libre, xa chi. Ol ilchaj tastac tzꞌoch yuj ebꞌ, icha nocꞌ calnel yax bꞌaj stan̈vaj va dꞌa titac bꞌe, axo dꞌa lum taquin̈ sat, ayxo tas sva nocꞌ.
10 Man̈xo ol yacꞌ vejel ebꞌ yedꞌ taquin̈tial, man̈xo ol yabꞌ syail ebꞌ yuj scꞌacꞌal yoc cꞌu, yujto a in tzin xajanej ebꞌ, ol vicꞌbꞌat ebꞌ bꞌaj ay sjajtac a aꞌ.
11 Ol in jac jun bꞌe dꞌa jolomtac vitz, te vachꞌ ol aj in bꞌoan sbꞌeal in chon̈abꞌ, xchi Jehová.
12 Ilecnabꞌ scot in chon̈abꞌ dꞌa najat, ay ebꞌ scot dꞌa norte, ay pax ebꞌ scot bꞌaj tzꞌem cꞌu, ay pax ebꞌ scot dꞌa yol yic Sinim.
13 Avajocabꞌ satchaan̈ yedꞌ sat luum tic dꞌa tzalajcꞌolal. Yedꞌ lum nivac vitz elocabꞌ yav lum yuj tzalajcꞌolal, yujto a Jehová van yacꞌan snivanil scꞌol schon̈abꞌ. Toxo ix ocꞌ scꞌol dꞌa ebꞌ ayoch dꞌa syaelal.
14 Syalan ebꞌ aj Sion icha tic: Ix on̈ yactejcan Jehová, ix on̈ bꞌatcan satcꞌolal yuj Cajalil, xchi ebꞌ.
15 Palta syalanxi Jehová icha tic: A junoc ix nunabꞌil, ¿tocval sbꞌat satcꞌolal yuneꞌ ix yuuj? Vachꞌchom sbꞌat satcꞌolal yuj ix jun, palta a in tic man̈ ol ex bꞌat satcꞌolal vuuj.
16 Ichato tzꞌibꞌabꞌil e bꞌi dꞌa yol in cꞌabꞌ, yuj chiꞌ naan exn̈ej vuuj.
17 Elan̈chamel ol bꞌochajxiqꞌue smuroal e chon̈abꞌ, axo ebꞌ ajcꞌol pojjinaquemi, ebꞌ satannaqueli, vanxo yel ebꞌ.
18 Ex aj Sion, ilecnabꞌ dꞌa e patic eyichan̈, a ebꞌ icꞌbꞌilbꞌat dꞌa chꞌoc nacional, van smolbꞌanxi sbꞌa ebꞌ yic sjax ebꞌ eyedꞌoc.
A in Jehová in tzin loc in bꞌi svalani to ol eyicꞌchaan̈ e bꞌa yuj ebꞌ eyetchon̈abꞌ chiꞌ. Icha val stzalaj junoc ix cobꞌes yuj yelvanubꞌ spichul ayic snupnaji, icha chiꞌ ol aj e tzalaj yuj ebꞌ van sjax chiꞌ.
19 Yujto a e chon̈abꞌ tic macꞌbꞌilcanem lan̈najoc, cuseltac yajcani. Axo ticnaic, man̈xo ol yabꞌlaj lum scajan ebꞌ anima chiꞌ. A ebꞌ macꞌjinaccanem lan̈naj chiꞌ, najatxo ay ebꞌ.
20 A ebꞌ yuninal ebꞌ aljinac dꞌa chꞌoc nacional chiꞌ, ol yal ebꞌ dꞌayex icha tic: Te jabꞌn̈ej jun lum luum tic dꞌayon̈, aqꞌuec co luum bꞌaj tzon̈ cajnaji, xcham ebꞌ.
21 Ol e naan icha tic: ¿Mach ay yuninal juntzan̈ ebꞌ tic? A on̈ tic man̈xalaj cuninal. Maxtzac yalpaxlaj yalji ebꞌ, icꞌbꞌil on̈ bꞌat dꞌa jun chꞌoc nacional, chacbꞌil on̈ eli. ¿Mach ix ilan qꞌuibꞌ ebꞌ cuninal tic? ¿Bꞌajtil ix cot ebꞌ? xe chama.
22 A in Jehová Eyajal in ol val dꞌa juntzan̈xo nación, ol vicꞌanpaxchaan̈ in bandera yil ebꞌ, yic ol icꞌjoccot ebꞌ eyuninal chiꞌ yuj ebꞌ, ol ul acꞌjoccan ebꞌ.
23 A ebꞌ yajal, icha e mam ol aj ebꞌ, axo ebꞌ ix yetbꞌeyum ebꞌ, icha e nun ol aj ebꞌ ix. Ol em n̈ojan ebꞌ yajal chiꞌ dꞌa sat luum dꞌa eyichan̈, emnaquil ol aj ebꞌ yic tzex yicꞌanchaan̈ ebꞌ. Ataꞌ ol nachajel eyuuj to a in Jehová in, a inn̈ej Dios in. A ebꞌ tzin acꞌanoch yipoc scꞌool, man̈ ol can ebꞌ dꞌa qꞌuixvelal, xchi Jehová.
24 A junoc vin̈ vinac te ay yip, ¿tzam yal stocꞌjiecꞌ masanil tas ix yicꞌ vin̈ dꞌa oval? ¿Tzam yal stocꞌjicanecꞌ junoc presovum dꞌa junoc yajal te ov?
25 A Jehová tzꞌalan icha tic: A dꞌa ebꞌ te ay yip ol in tocꞌcanecꞌ ebꞌ presovum. A dꞌa ebꞌ yajal ecꞌbꞌal te ov, ol in tocꞌcanecꞌ tastac ix yicꞌ ebꞌ dꞌa oval. Yujto a in ol vacꞌ oval yedꞌ ebꞌ eyajcꞌol chiꞌ, ol in colan ebꞌ eyetchon̈abꞌ chiꞌ.
26 A in ol vacꞌ scꞌulej ebꞌ ix ex ixtan chiꞌ, to ol smil-lajcham sbꞌa ebꞌ. Ol och ebꞌ icha ucꞌuman̈il yuj scot yoval bꞌaj ol smil-lajcham sbꞌa chiꞌ. Yuj chiꞌ ol yojtaquejel masanil anima to a in ton val Jehová e Columal in. A in sDiosal in vin̈aj Jacob to Syal Vuj Smasanil, xchi Jehová.