Syal Jehová yuj tas ol ujoc
48
A Jehová tzꞌalan icha tic:Abꞌec val jun tic ex yin̈tilal Jacob, ex tze cuch Israel, yin̈tilal ex pax Judá. Tze loc in bꞌi a in Jehová in tic, tzeyalani to tzex och ejmelal dꞌayin e Diosal in, palta man̈ yeloc tzeyalaꞌ, chabꞌsatil tzex loloni.
2 Tzeyalani to aj chon̈abꞌ ex dꞌa in chon̈abꞌ vicn̈ej yaji. Tzin eyacꞌanoch yipoc e cꞌool eyalani, a in ton Jehová e Diosal in Yajal in dꞌa Smasanil.
3 Ayocto valannaccan yuj tas ix uji tic. A in val ix vacꞌ eyojtaquejeli. Elan̈chamel ix laj elcꞌoch tas valnaccan chiꞌ.
4 Vojtac to te pit ex, max eyiqꞌuem e bꞌa, max ex qꞌuixvi jabꞌoc dꞌa vichan̈.
5 Ayocto valannaccan dꞌayex ayic manto uji juntzan̈ tic. Yuj chiꞌ max yal eyalan icha tic yuj juntzan̈ e comon dios nabꞌa teꞌ, ma qꞌueen: A co diosal tic ix naan jun tic, a ix acꞌan elcꞌochi, man̈ xe chioc.
6 A ex tic eyabꞌnac masanil tas valnaccan chiꞌ. Scham val e naan yuuj, tzeyalaneli to yel valnac. Axo ticnaic ol vacꞌ eyojtaquejel juntzan̈xo tas cꞌubꞌeltac yaji, juntzan̈ man̈ eyojtacoc.
7 Aton tas to ato ticnaic svalaꞌ, man̈ valnacoc dꞌa pecaꞌ, juntzan̈ tas to malaj bꞌaj eyabꞌnac specal yalji masanto ticnaic. Yuj chiꞌ man̈ ol yal eyalani to eyojtacxo.
8 Yel toni, a jun tic manta bꞌaj eyabꞌnac, manto eyojtacoc, an̈ejaꞌ manto eyabꞌpax ticnaic. Yujto vojtactaxoni to max e cꞌanabꞌajej, pit ex yictax ex alji.
9 Palta ay in nivancꞌolal dꞌayex, yuj chiꞌ ix in yamoch vaan yoval in cꞌol dꞌa eyibꞌan̈ yuj in bꞌinajnaquil. Maj ex in sateli yic man̈ chucoc tzꞌaj in bꞌinaji.
10 Naec to ix ex in sacbꞌitej, man̈ ichoc tzꞌaj qꞌuen plata dꞌa cal cꞌacꞌ, palta aton yedꞌ yaelal ix ex vacꞌ proval.
11 Yuj vicꞌjichaan̈, icha chiꞌ ex vutej, yic man̈ chucoc tzꞌaj yalchaj in bꞌi. A aloj vachꞌ lolonel smoj yalji dꞌayin, max in cha alchaj dꞌa junocxo, xchi Jehová.
A Jehová ol colan schon̈abꞌ
12 Icha tic yalan Jehová: Ex israel yin̈tilal Jacob, abꞌec val tas ol valaꞌ: A ex sicꞌbꞌil ex el vuuj. A inn̈ej ton Dios in, bꞌabꞌel vaj dꞌa smasanil, slajvubꞌ in paxi.
13 A in vacꞌnaccanem lum luum tic dꞌa yedꞌtal, in jen̈bꞌannacbꞌat satchaan̈ yedꞌ in poder. Ton̈ej valnac sbꞌi juntzan̈ tic, spitzvinacchaan̈.
14 Molbꞌejec e bꞌa e masanil, tzeyabꞌan tas ol valaꞌ: ¿Mach val junoc comon dios ayocto yalannac to a jun vin̈ vinac sicꞌbꞌilel vuuj, a vin̈ ol cꞌulan masanil tas nabꞌilxo vuj dꞌa yibꞌan̈ Babilonia to a yipalil ol satanel ebꞌ caldeo?
15 A in ol vavtejcot vin̈, ol javoc vin̈, yaln̈ej bꞌaj ol bꞌat vin̈, ol yacꞌn̈ej ganar vin̈.
16 Nitzeccot e bꞌa dꞌayin, abꞌec tas ol valaꞌ: Yictax ix in yamanoch in lolon dꞌa ebꞌ anima, cꞌunn̈ej snachajel tas svalaꞌ, axo tzꞌelcꞌoch tas sval chiꞌ, ayinn̈ej ecꞌ taꞌ, xchi Jehová.
A ticnaic jun, checbꞌil in cot yuj Jehová Yajal, yic tzin lolon yuj spoder Yespíritu.
17 A Jehová Dios, co Columal a on̈ israel on̈ tic Axon̈ej Ochi, a tzꞌalan icha tic: A in Jehová e Diosal in, a in tzin chꞌox dꞌayex tas ol och e vachꞌiloc, a in tzin chꞌox bꞌe bꞌaj smoj tzex bꞌati.
18 Comonoc val ix e cꞌanabꞌajej in checnabꞌil, tato icha chiꞌ a vachꞌilal tze chaꞌa tzam qꞌuen̈ej chaan̈ icha aꞌ nivac aꞌ max tupi, axo e colnabꞌil tzam jan̈ej icha scotn̈ej bꞌalaljoc sat aꞌ mar.
19 Man̈xom bꞌischajbꞌenoc ebꞌ eyin̈tilal, icha yarenail stiꞌ aꞌ mar. Maj am viqꞌuemta e bꞌisul, maj am in bꞌat mican dꞌayex, xchi Jehová.
20 Syalanxi Jehová icha tic: Elan̈ec dꞌa Babilonia, elan̈ec elelal dꞌa scal ebꞌ aj Caldea. Alequel jun abꞌix tic yedꞌ av yic tzalajcꞌolal. Tzeyacꞌan ojtacajel masanto bꞌaj slajvicꞌoch yolyibꞌan̈qꞌuinal tic. Tzeyalan icha tic: A Jehová on̈ colanel dꞌa yol scꞌabꞌ Babilonia, a on̈ yin̈til on̈ Jacob, aton jun schecabꞌ, xe chi, xchi Jehová.
21 Ayic yecꞌnac ebꞌ co mam quicham dꞌa taquin̈ luum yuj Jehová, man̈ tacjinacoc stiꞌ ebꞌ, yujto a Jehová chiꞌ pojjinac qꞌuen tenam, yelnaccot chulnaj aꞌ nivac aꞌ sbꞌeyi.
22 Axo pax ebꞌ scꞌulan chucal, malaj jabꞌoc vachꞌil ol scha ebꞌ, xchi Jehová.