Acꞌbꞌil ganar Babilonia
47
Icha tic yalan Jehová yuj Babilonia:Eman̈cot dꞌa a despacho ach Babilonia, eman̈ cꞌojan dꞌa cal pococ. A dꞌa pecaꞌ lajan ach icha junoc ix cobꞌes mantalaj vinac syicꞌaꞌ. Axo ticnaic man̈xo ol alchajoc to yuneꞌ cobꞌes ya ilabꞌil ach. A ticnaic checabꞌ achxo.
2 Ochan̈ dꞌa qꞌuen chaꞌ, jax ixim trigo, iqꞌuel smusil a sat, tocꞌqꞌue a cꞌapac dꞌa a xubꞌ yic tzach cꞌaxpaj dꞌa yol a aꞌ.
3 Iljocabꞌ a nivanil bꞌeranel chiꞌ, ilchajocabꞌ a nivanil qꞌuixvelal yilji. A jun chiꞌ ol vacꞌ spacoc dꞌayach, malaj junoc mach edꞌnac bꞌaj ol ocꞌ in cꞌool, xchi Jehová.
4 A co Columal a on̈ israel on̈ tic, co Diosal Axon̈ej Ochi, Jehová Yajal dꞌa Smasanil, a tzꞌalan icha tic:
5 Ex caldeo, eman̈ec cꞌojan dꞌa cuseltaquil dꞌa cal qꞌuicꞌalqꞌuinal. Man̈xa bꞌaqꞌuin̈ ol ex bꞌinaj yajalil dꞌa juntzan̈xo nivac nación.
6 Ayic aycot voval dꞌa in chon̈abꞌ, ix vactejcan ebꞌ, ichato man̈ in chon̈abꞌoc ebꞌ. Ix vacꞌoch ebꞌ dꞌa qꞌuixvelal, ix vacꞌancanoch ebꞌ dꞌa yol e cꞌabꞌ, maj ocꞌ e cꞌol dꞌa ebꞌ. Ipan ebꞌ ichamtac animaxo ya ix eyutej.
7 Ix eyalanpax icha tic: A on̈ tic yajal on̈ dꞌa masanil tiempo, xe chi. Malaj jabꞌoc tas ix e naꞌ tas ol ex ajelcꞌochoc.
8 Yuj chiꞌ ach chon̈abꞌ Babilonia, abꞌ val tas ol valaꞌ: Lajan ach icha syutej sbꞌoan sbꞌa junoc ix ajmul ix. Te juncꞌolalxo ajeqꞌui, tza naan dꞌa a pensar to malaj junocxo mach lajan icha ach tic. Tza naani to malaj bꞌaqꞌuin̈ ol ach can icha junoc ix ix chamnac yetbꞌeyum, malaj bꞌaqꞌuin̈ pax ol ach can man̈ uninal a naani.
9 Vachꞌchom jantac ebꞌ ajchum yedꞌ ebꞌ ajbꞌaal, palta man̈xo ol ach coljoc yuj ebꞌ ayic ol ja lemnaj cha macan̈ chiꞌ dꞌa ibꞌan̈, aton junixtaquil yedꞌ man̈ uninal. Junn̈ej cꞌual ol javoc lemnaj juntzan̈ chiꞌ dꞌayach.
10 A a naani to vachꞌn̈ej ajecꞌ dꞌa a chucal chiꞌ, malaj mach tzꞌilan tas tza cꞌulej. A tas ojtac yedꞌ a jelanil tzach acꞌan musansatil. Tza naani to a achn̈ej, malaj junocxo.
11 Palta ol ja val jun yaelal dꞌa ibꞌan̈, man̈xo ol yal a yamanoch vaan yedꞌ ebꞌ ajbꞌaal chiꞌ. Ayic ol javoc jun yaelal chiꞌ, man̈xo ol yal a cachani. Ol javoc lemnaj dꞌa ibꞌan̈ ayic man̈ naanoc uuj.
12 Bꞌeybꞌalej ajchumal yedꞌ ajbꞌaalil chiꞌ, aton juntzan̈ chiꞌ a cꞌaybꞌejnac yictax cobꞌes ach. Ol vilaꞌ tato olto och yopisio uuj, ol vilaꞌ tato olto xiv ebꞌ anima dꞌayach yuuj.
13 Tzijtum ebꞌ acꞌum razón ix smolbꞌej sbꞌa edꞌoc, ix ach tzactzajcꞌoch yedꞌ ebꞌ. Javocabꞌ ebꞌ schuman yedꞌ qꞌuen cꞌanal chiꞌ ticnaic. Ayic syilan qꞌuen cꞌanal chiꞌ ebꞌ, snachajel yuj ebꞌ yalani. A ebꞌ tzꞌalan tas tzuji dꞌa junjun uj, javocabꞌ ebꞌ ach scol ticnaic.
14 Palta lajan ol aj ebꞌ icha yoc ixim trigo, a cꞌacꞌ ol n̈usantzꞌa ebꞌ. Man̈xo ol yal scolan sbꞌa ebꞌ dꞌa cal cꞌacꞌ chiꞌ. A jun cꞌacꞌ chiꞌ te ov, man̈ lajanoc icha junoc comon cꞌacꞌ scan stzacꞌaqꞌuil tzon̈ em cꞌojan tzon̈ cꞌaxni dꞌa stiꞌ.
15 Icha chiꞌ ol ajelcꞌoch ebꞌ a colvajum chiꞌ, aton ebꞌ bꞌaj ix a cꞌanbꞌejn̈ej yictax ach cotochi. Ol ach actajcan yuj ebꞌ smasanil, junjun ebꞌ ol bꞌatcan dꞌa sbꞌeal satnaquil, man̈xa junoc mach ol ach colanoc, xchi Jehová.