46
A sdiosal ebꞌ aj Babilonia scuch Bel, qꞌuixvelal ix ajcani, axo sdiosal ebꞌ aj Nebo, man̈xalaj yelcꞌochi. A juntzan̈ comon dios chiꞌ, ix tzecꞌjioch dꞌa yibꞌan̈ yicatz nocꞌ bꞌuru al yaji, cꞌunbꞌinac nocꞌ.2 A juntzan̈ comon dios chiꞌ, man̈xa jabꞌoc yopisio, maj yal scolan sbꞌa, ix icꞌchajbꞌat dꞌa chꞌoc nacional.
3 Ix yalan Jehová icha tic: Maclejec eyabꞌ tas sval ex yin̈tilal Jacob, jantac exto cannac ex dꞌa Israel tic, cuchbꞌilexn̈ej vuuj ayic manto ex alji. Ix ex in chelbꞌeyecꞌoc.
4 Ichan̈ej chiꞌ ol in cꞌulej eyedꞌoc, ayic ol ex och icham animail, sacxo xil e jolom, ayinn̈ej och eyedꞌoc. A in in bꞌonac ex, ol ex in tan̈vejn̈ej. Ol in ochn̈ej eyedꞌoc, ol ex in coln̈ej.
5 ¿Mach junoc syal in e lajbꞌan yedꞌoc? ¿Mach junoc lajan vedꞌoc e naani?
6 Ay ebꞌ syicꞌqꞌueta qꞌuen oro dꞌa yol yedꞌtal, syechtan qꞌuen plata dꞌa yol echlabꞌ, syacꞌan qꞌuen ebꞌ dꞌa junoc vin̈ jelan sbꞌoani yic sbꞌo junoc sdiosal ebꞌ dꞌa qꞌueen. Axo sbꞌoelcꞌochi, tzꞌoch ebꞌ ejmelal dꞌay, syalan sbꞌa ebꞌ dꞌay.
7 Syacꞌanqꞌue ebꞌ dꞌa sjolom sjen̈jabꞌ, syicꞌanbꞌat ebꞌ. Syacꞌanqꞌue ebꞌ dꞌa sat junoc smexa. Scanxon̈ej checꞌan taꞌ, maxtzac ibꞌxi. Vachꞌchom jantac yavajoch ebꞌ ay yic chiꞌ dꞌay, palta max tacꞌvi, max colji ebꞌ yuuj dꞌa syaelal.
8 Naeccot jun tic ex anima pit, scham val e naancoti yic max bꞌat satcꞌolal eyuuj tastac in cꞌulejnac.
9 Naeccot tas ujinac dꞌa pecataxo to A inn̈ej Dios in, malaj junocxo, malaj junocxo dios lajan vedꞌoc.
10 A in valnaccan dꞌa yictax yichbꞌanil tas ol ujoc dꞌa slajvubꞌ. Ayocto valannaccani tastac toto ol ujoc. Masanil tas nabꞌil vuuj ol in cꞌulejn̈ej.
11 Ol vavtejcot jun vinac dꞌa najat bꞌaj sjavi cꞌu, ol ja jucnaj icha junoc nocꞌ chꞌacbꞌa. A tas nabꞌil vuuj, a chiꞌ ol vacꞌ scꞌulej. Icha vutejnac valani, icha chiꞌ ol ujoc.
12 Ex anima pit, mach ex najat eyajcanel dꞌa tojolal, abꞌec tas ol valaꞌ.
13 A colnabꞌil svacꞌaꞌ toxo val tzꞌelcꞌoch vuuj, man̈xo ol ecꞌ tiempo in colan chon̈abꞌ Sion, ol bꞌinajxoc Israel tic vuuj, xchi Jehová.