A yopisio vin̈aj Ciro yuj Jehová
45
A Jehová ix sicꞌanoch vin̈aj Ciro reyal. A ol cuchbꞌan vin̈ yic ol yacꞌan ganar juntzan̈ nivac nación vin̈, ol yicꞌanecꞌ yopisio juntzan̈ ebꞌ vin̈ sreyal nación chiꞌ vin̈. A Jehová chiꞌ ol acꞌan jacchaj spuertail juntzan̈ nivac chon̈abꞌ dꞌa vin̈aj Ciro chiꞌ, malaj junoc mach ol yal smacani. Yuj chiꞌ syalan Jehová icha tic:2 A in val ol in bꞌabꞌlaj dꞌa ichan̈, ol vacꞌ pan̈anbꞌoc lum luum chaan̈. Ol in macꞌpoj juntzan̈ puerta nabꞌa bronce, ol in bꞌijchitanbꞌat qꞌuen hierro ayoch yijchuloc.
3 A juntzan̈ bꞌeyumal cꞌubꞌaneli yedꞌ tas elcꞌaltac yaji, ol vacꞌ dꞌayach, yic vachꞌ tzojtaquejeli to a in ton Jehová in, sDiosal in Israel, ix ach vavtej dꞌa a bꞌi.
4 Yuj val to tzin xajanej ebꞌ yin̈tilal vin̈ in checabꞌ aj Jacob, aton chon̈abꞌ Israel sicꞌbꞌilel vuuj, yuj chiꞌ tzach vavtej yic tzach bꞌinaji vachꞌchom man̈ in ojtacoc.
5 A inn̈ej Jehová in, malaj junocxo. Malaj junocxo Dios. A inn̈ej toni. Vachꞌchom man̈ in ojtacoc, palta a in ol vacꞌ ip
6 yic vachꞌ syojtaquejel masanil anima ay dꞌa stojolal bꞌaj sjavi cꞌu, masanto bꞌaj tzꞌem cꞌu to A inn̈ej Jehová in, malaj junocxo.
7 A in in bꞌonac saquilqꞌuinal yedꞌ qꞌuicꞌalqꞌuinal. A in svacꞌ juncꞌolal, svacꞌanpax yaelal. A in ton Jehová in tzin cꞌulej juntzan̈ tic.
Te ecꞌbꞌalxo spoder Dios
8 A in ol vacꞌcot tojolal dꞌa satchaan̈, icha yem yal acꞌval, icha yem n̈abꞌ dꞌa cal asun, ol schaan lum luum tic yemuli. Checlajocabꞌ colnabꞌil icha sat te avbꞌen teꞌ, ayocabꞌ tojolal icha tzꞌaj spojel teꞌ xumac. A in ol vacꞌ ujoc jun tic, xchi Jehová.
9 A mach syacꞌ oval yedꞌ mach bꞌojinac, lajan val icha lum tzꞌacbꞌil lum cꞌun spoji. Tocval syal lum tzꞌacbꞌil lum chiꞌ dꞌa mach stzꞌacani ¿Tas tza cꞌulej? A ach tic, man̈ ojtacoc a munlaji, man̈ xchioc luum.
10 An̈ejtonaꞌ, tom smoj syal ebꞌ uninabꞌil dꞌa smam snun icha tic: ¿Tas yuj icha tic cajcan eyuuj? tom xchi ebꞌ.
11 A Jehová co Diosal a on̈ israel on̈ tic, Axon̈ej Ochi, a bꞌojinac on̈, a tzꞌalan icha tic: ¿Tom ay eyalan eyic e cꞌanbꞌan dꞌayin yuj tas tzin cꞌulej eyedꞌoc? ¿Tom a ex ol eyal tas ol in cꞌulej?
12 A in in bꞌonac lum luum tic yedꞌ masanil mach cajan dꞌay. A in in jen̈bꞌejnacbꞌat satchaan̈ yedꞌ in poder, valannac to scheclaj masanil qꞌuen cꞌanal.
13 Dꞌa stojolal ol vutej ayic ol vacꞌanoch vin̈aj Ciro dꞌa yopisio. A in ol in bꞌobꞌat bꞌe dꞌa yichan̈ vin̈ yic ol yacꞌ ganar vin̈. A vin̈ ol bꞌoanxiqꞌue in chon̈abꞌ Jerusalén. Axo ebꞌ in chon̈abꞌ icꞌbꞌilbꞌat dꞌa chꞌoc nacional, ol acꞌjoquel ebꞌ dꞌa libre yuj vin̈ dꞌa nabꞌan̈ej. Malaj stojol ol scꞌan vin̈ dꞌa ebꞌ, malaj spac ol acꞌchaj dꞌa vin̈, a in Jehová Yajal in dꞌa Smasanil svalcan jun tic, xchi Jehová.
14 Syalanxi Jehová dꞌa ebꞌ israel icha tic: A tastac ay dꞌa ebꞌ aj Egipto yedꞌ dꞌa ebꞌ aj Etiopía, eyic ol ajcanoc. A ebꞌ aj Sabá chaan̈ steel, ol yacꞌoch sbꞌa ebꞌ dꞌa yol e cꞌabꞌ. Ol ochcan ebꞌ e checabꞌoc. Ayoch qꞌuen cadena dꞌa ebꞌ ol och tzacꞌan ebꞌ eyuuj, ol em cuman ebꞌ dꞌa eyichan̈, ol yalan ebꞌ icha tic: Val yel junn̈ej ton val Dios, malaj junocxo. Aton jun Dios chiꞌ ayecꞌ eyedꞌoc, xcham ebꞌ, xchi Jehová.
15 Yelton val Dios ach, max ach quilochlaj, palta co Columal aj a on̈ israel on̈ tic.
16 Masanil ebꞌ sbꞌoan yechel comon dios, qꞌuixvelal ol aj ebꞌ, ol bꞌatcan ebꞌ.
17 A on̈xo pax israel on̈ tic jun, a ach ol on̈ a col dꞌa juneln̈ej. Malaj bꞌaqꞌuin̈ emnaquilal, ma qꞌuixvelal ol on̈ ajcanoc.
18 Mamin Jehová, a ach a bꞌonac satchaan̈, a ach a bꞌonaccanem lum luum tic dꞌa yedꞌtal. Maj a bꞌolaj lum yic malaj tas ay dꞌa sat, palta a bꞌonac luum yic scajchaji. A ach tzal icha tic: A inn̈ej Jehová in, malaj junocxo.
19 A in tic, man̈ elcꞌaltacoc tzin loloni, man̈oc pax dꞌa qꞌuicꞌalqꞌuinal dꞌa yoltac lum luum. Malaj tas valnac dꞌa ebꞌ yin̈tilal Jacob icha tic: Man̈ in e comon sayejeqꞌui, man̈ xin chioc dꞌa ebꞌ. A in Jehová in tic, an̈ej tas yel yedꞌ tas tojol svalaꞌ, xa chi.
A Jehová yedꞌ juntzan̈ comon dios
20 Syalan Jehová icha tic: Masanil ex ayextoecꞌ dꞌa junjun nación, molbꞌejec e bꞌa, cotan̈ec. Malaj jabꞌoc e pensar, a te teꞌ tzeyacꞌoch e diosaloc, tze bꞌachan bꞌeyecꞌoc, tzex och ejmelal dꞌa jun dios max yal scolvaji.
21 Lolonan̈ec, alec tastac tze na chiꞌ dꞌayin, al-lajec eyabꞌ junjun ex. ¿Mach aljinaccan juntzan̈ tic yictax yichbꞌanil? ¿Mach aljinaccan dꞌa pecaꞌ? ¿Tom man̈oc in Jehová in valnaccan juntzan̈ tic jun? Malaj junocxo Dios. A inn̈ej toni. A inn̈ej ton svaqꞌuelcꞌoch tas svalaꞌ, Colvajvum in paxi.
22 Jantac ex cajan ex bꞌaj slajvicꞌoch lum luum tic, ojtaquejec in eli, ol ex in coloꞌ, yujto A inn̈ej Dios in, malaj junocxo.
23 A in val svacꞌ in tiꞌ to yel tas svalaꞌ, man̈ ol in qꞌuex tas sval tic. Ol em cuman masanil anima dꞌa vichan̈, ol in yojtacanel ebꞌ.
24 Ol yalan ebꞌ smasanil dꞌayin icha tic: A achn̈ejton Jehová tojol ach, ay a poder, xcham ebꞌ. Axo masanil ebꞌ ajcꞌol yajoch dꞌayin, ol qꞌuixvoccan ebꞌ.
25 Vuujn̈ej ol colchaj masanil ebꞌ yin̈tilal Israel, ol yacꞌan tzalajbꞌoc scꞌol ebꞌ, xchi Jehová.