An̈ej Jehová Dios
44
Syalan Jehová icha tic:Ex israel, yin̈tilal Jacob, maclejec eyabꞌ tas svalaꞌ, yujto in checabꞌ ex, sicꞌbꞌil ex el vuuj.
2 A in Jehová in tic ix ex in bꞌoꞌo ayic manto ex alji, a in tzin colvaj eyedꞌoc. Man̈ ex xiv ex aj Jesurún,* ex yin̈tilal Jacob, in checabꞌ ex, sicꞌbꞌil ex el vuuj.
3 Yujto ol vaqꞌuel yoc a aꞌ dꞌa taquin̈ luum, ol bꞌey aꞌ dꞌa lum taquin̈ sat. Ol vacꞌoch Vespíritu dꞌa ebꞌ eyin̈tilal, ol vacꞌan in vachꞌcꞌolal dꞌa ebꞌ.
4 Icha val sqꞌuibꞌ an̈ an̈cꞌultac ayoch yalil, icha chiꞌ ol aj sqꞌuibꞌ ebꞌ. Icha sqꞌuibꞌ teꞌ bꞌacmam dꞌa stitac a aꞌ sbꞌeyi, icha chiꞌ ol aj ebꞌ.
5 A dꞌa scal ebꞌ, ay mach ol alan icha tic: A in tic, yic in Jehová, xchama. Ay pax mach ol alan icha tic: Yin̈tilal in Jacob, xchama. Ay pax mach ol tzꞌibꞌanoch dꞌa scꞌabꞌ icha tic: Yic in val Jehová, xchama. Ol yacꞌanoch Israel sjolomoc sbꞌi, xchi Jehová.
6 A Jehová Rey, Scolumal Israel, Yajal dꞌa Smasanil, aꞌ tzꞌalan icha tic: A in ton bꞌabꞌel vaj dꞌa smasanil, slajvubꞌ in paxi. A inn̈ej Dios in, malaj junocxo.
7 ¿Mach val junoc lajan vedꞌoc? Tato ay, lolonocabꞌi, yalocabꞌ dꞌayin tas yaji. ¿Tocval ay junocxo mach ayocto yalannaccani tastac ujinac yedꞌ tas toto ol ujoc? Tato ay, yalocabꞌi tas toto ol ujoc chiꞌ.
8 Man̈ ex xivoc, tecꞌan tzeyutej e bꞌa. A ex tic in testigo ex to valnac juntzan̈ tic dꞌa pecataxo. ¿Tocval ay junocxo dios ma junocxo colvajvum? A inn̈ej toni, malaj junocxo vojtac, xchi Jehová.
A yoval scꞌol Jehová dꞌa comon dios
9 A val ebꞌ sbꞌoan yechel juntzan̈ comon dios, malaj jabꞌoc yelcꞌoch ebꞌ. Malaj pax jabꞌoc yelcꞌoch juntzan̈ yechel comon dios xajanej ebꞌ chiꞌ. A ebꞌ tzꞌoch ejmelal dꞌa juntzan̈ comon dios chiꞌ, max ujilaj yilan ebꞌ, malaj spensar ebꞌ. Yuj chiꞌ qꞌuixvelal ol ajcan ebꞌ yuuj. 10 A ebꞌ sbꞌoan junoc yechel comon dios yedꞌ qꞌuen qꞌueen, tzꞌoch ebꞌ ejmelal dꞌay, dios yalan ebꞌ, palta nabꞌan̈ej syixtej sbꞌa ebꞌ. 11 Masanil ebꞌ tzꞌoch ejmelal dꞌa juntzan̈ yechel chiꞌ, ol qꞌuixvoccan ebꞌ, yujto a ebꞌ sbꞌoan juntzan̈ yechel chiꞌ, animan̈ej ebꞌ. Tato smolbꞌej sbꞌa ebꞌ smasanil dꞌa vichan̈ yic tzin chꞌolbꞌitan ebꞌ, ol qꞌuixvoc val ebꞌ, ol xivcanqꞌue ebꞌ.
12 Ilecnabꞌi, a vin̈ bꞌoum qꞌueen, syicꞌcot qꞌuen syamcꞌabꞌ vin̈, axo yic toxo ix chacxil qꞌuen qꞌueen chiꞌ dꞌa cal cꞌacꞌ, stenan qꞌuen vin̈ yedꞌ qꞌuen martillo yic stojolbꞌioch yechel chiꞌ. Yedꞌ val yip scꞌabꞌ vin̈ stenani. Palta tato malaj tas sva vin̈, tzꞌoch svejel vin̈, stacjipax stiꞌ vin̈, tzꞌel yip vin̈.
13 Ilecnabꞌpax junoc vin̈ n̈icum teꞌ sbꞌoan junoc yechel: Syechtej teꞌ vin̈ yedꞌ junoc echlabꞌ, syacꞌanoch yechel teꞌ vin̈ yedꞌ teꞌ slápiz yedꞌ jun tzꞌacꞌanoch yechel, setan setan tzꞌaji. Syamanoch vin̈ smunlaj yedꞌ qꞌuen tzꞌucubꞌ. Icha chiꞌ tzꞌaj sbꞌoan jun yechel chiꞌ vin̈, icha anima vachꞌ yilji, icha chiꞌ tzꞌajelcꞌochi. Slajvi chiꞌ syacꞌanoch vin̈ dꞌa yol spat.
14 A junoc vin̈ n̈icum teꞌ chiꞌ, sbꞌat vin̈ schꞌac teꞌ cꞌuteꞌ, ma teꞌ tzicap, ma teꞌ ji, aton teꞌ sqꞌuibꞌ dꞌa caltac teꞌ. Mato jun, syavej junoc teꞌ taj vin̈, axo n̈abꞌ tzꞌicꞌan sqꞌuibꞌ teꞌ. Nivan tzꞌaj teꞌ yic vachꞌ sbꞌo comon dios chiꞌ dꞌa teꞌ. 15 Aton dꞌa teꞌ tzꞌelta teꞌ scꞌatzitz vin̈, syacꞌanoch scꞌacꞌ vin̈ yedꞌ teꞌ bꞌaj scꞌaxni. Sbꞌoanpax svael vin̈ yedꞌ teꞌ cꞌacꞌ chiꞌ. Axo yedꞌ jabꞌocxo teꞌ, sbꞌo junoc yechel sdiosal vin̈, tzꞌoch ijan vin̈ yoch ejmelal dꞌay.
16 Aton yedꞌ teꞌ cꞌatzitz chiꞌ syacꞌoch scꞌacꞌ vin̈, sbꞌolan schibꞌej vin̈, sva vin̈, sbꞌudꞌji val vin̈ sicꞌlabꞌil yuj sbꞌolbꞌil chibꞌej chiꞌ. Scꞌaxni vin̈ dꞌa teꞌ, syalan vin̈ icha tic: Te vachꞌ in aj in qꞌuixnaj dꞌa ti cꞌacꞌ tic, xchi vin̈. 17 Axo yedꞌ jabꞌocxo teꞌ scan chiꞌ, sbꞌoanpax junoc yechel scomon diosal vin̈, tzꞌoch ijan vin̈ yem n̈ojan ejmelal dꞌay. Stevioch vin̈ dꞌay icha tic: Col in, yujto in diosal ach, xchi vin̈ dꞌa teꞌ.
18 A val juntzan̈ anima chiꞌ, malaj spensar ebꞌ, max nachaj jabꞌoc yuj ebꞌ. Macan sat ebꞌ, max uji yilan ebꞌ, macan spensar ebꞌ, max nachaj yuj ebꞌ. 19 Man̈ chamoc snaan ebꞌ, max nachaj jabꞌoc yuj ebꞌ, max yal ebꞌ icha tic: A dꞌa nan̈alxo te teꞌ tic ix vacꞌoch in cꞌacꞌ, ix vacꞌan cꞌanbꞌoc in pan, ix in bꞌolpax in chibꞌej dꞌa stzacꞌaqꞌuil teꞌ, ix in vaꞌi. Man̈ smojoc tzin bꞌo junoc yechel comon dios yajbꞌentac yedꞌ jabꞌocxo teꞌ tic. Man̈ smojoc tzin och ejmelal dꞌa jun teꞌ yibꞌ teꞌ tic, man̈ xchioc jabꞌoc ebꞌ. 20 A ebꞌ icha chiꞌ scꞌulej, ichato a qꞌuen ticꞌaqꞌuil taan̈ slo ebꞌ. Juvinaquel spensar ebꞌ, satnac ebꞌ, man̈ ol yal scolan sbꞌa ebꞌ. Man̈ naanoc yalan ebꞌ icha tic: A tas bꞌobꞌil yuj in cꞌabꞌ tic, nabꞌa esn̈ej, man̈ xchioc ebꞌ.
A Jehová tzꞌacꞌan nivancꞌolal Israel
21 Ex israel, yin̈tilal Jacob, naeccoti to in checabꞌ ex, a in in bꞌonac ex yic tzex och in checabꞌoc, mocabꞌ in bꞌat satcꞌolal eyuuj.
22 A in ix in satel e paltail icha satem yal acꞌval. Ix in satel e mul icha val tzꞌaj satem asun. Cotan̈ecxi dꞌayin, yujto ix ex in coloꞌ, xchi Jehová.
23 A satchan̈, elocabꞌ yav sbꞌitan dꞌa tzalajcꞌolal yuj tas ix scꞌulej Jehová. A nivac jul dꞌa sat luum tic, avajocabꞌi. A lum nivac vitz yedꞌ lum tzalquixtac, bꞌitanocabꞌ luum dꞌa tzalajcꞌolal yujto ix schꞌox stziquiquial Jehová ayic ix scolan ebꞌ israel yin̈tilal Jacob.
24 A Jehová co Columal tzꞌalan icha tic: A in ton Jehová in, ix ex in bꞌoꞌo ayic manto ex alji, a in in bꞌonac masanil tastac. A in in jen̈bꞌejnacbꞌat satchaan̈, vacꞌannacpaxcan em lum luum tic dꞌa yedꞌtal, ¿tom ay junocxo mach colvajnac vedꞌoc?
25 A in tzin tenecꞌ tas syal ebꞌ ajchum, tzin juanpaxbꞌat spensar ebꞌ naumel lolonel. Svacꞌan somchajel spensar ebꞌ aj pensar, squistalaxcan ebꞌ vuuj.
26 Palta a in svaqꞌuelcꞌoch tas syal ebꞌ in checabꞌ, yic vachꞌ tzꞌajelcꞌoch tas syal ebꞌ chiꞌ. A in svalaꞌ to a Jerusalén ol cajnajxoc, axo juntzan̈ chon̈abꞌ dꞌa yol yic Judá, ol bꞌochajxoc dꞌa yedꞌtal bꞌaj juvinaquel chiꞌ.
27 A in syal valan dꞌa aꞌ mar to stup aꞌ. Masanil yoctac aꞌ tzꞌeli, svacꞌ tupoc.
28 A in sval dꞌa vin̈aj Ciro icha tic: Ach Ciro, a ach ayach och yilumaloc in chon̈abꞌ. A ach ol a bꞌo masanil tas tzin nibꞌej. Ol alan dꞌa Jerusalén: Ol ach bꞌochajxiqꞌueoc, ol acꞌchajxiem yich templo, xa chi, xin chi dꞌa vin̈, xchi Jehová.