An̈ej Jehová Colvajum
43
Axo ticnaic ex israel, yin̈tilal Jacob, abꞌec. A Jehová bꞌojinac ex, aꞌ tzꞌalan icha tic: Man̈ ex xivoc, in colnac ex, ix ex vavtej val dꞌa e bꞌi, yujto vic ex.2 Ayic ol ex ecꞌ dꞌa yol a aꞌ, ayinecꞌ eyedꞌoc. Ayic ol ex ecꞌ dꞌa aꞌ nivac aꞌ, man̈ ol e jicꞌ aꞌ. Ayic ol ex ecꞌ dꞌa scal teꞌ cꞌacꞌ, man̈ ol ex tzꞌabꞌatoc.
3 A in Jehová in, e Diosal in, e Columal vaji. A inxon̈ej Ochi, a in vacꞌlabꞌejnac Egipto, Etiopía yedꞌ Seba e tojoloc.
4 A ebꞌ anima dꞌa juntzan̈xo nación svacꞌcham e qꞌuexuloc, yic vachꞌ tzex colchajcani, yujto te vachꞌ ex vilani, te nivan eyelcꞌoch dꞌayin, tzex in xajanejpaxi.
5 Man̈ ex xivoc, ayinecꞌ eyedꞌoc. Ol in molbꞌejcot ebꞌ eyetchon̈abꞌ dꞌa stojolal bꞌaj sjavi cꞌu yedꞌ bꞌaj tzꞌem cꞌu, junxon̈ej ol ex ajoc.
6 Ol val dꞌa juntzan̈ chon̈abꞌ ay dꞌa stojolal norte icha tic: Chaec meltzaj ebꞌ, xin chama. Ol valpax dꞌa juntzan̈ chon̈abꞌ ay dꞌa sur: Man̈ eyamoch vaan ebꞌ. Iqꞌueccot ebꞌ vuninal yedꞌ ebꞌ visil aycanbꞌat dꞌa najat chiꞌ, bꞌaj slajvicꞌoch yolyibꞌan̈qꞌuinal tic,
7 aton ebꞌ ayoch in bꞌi dꞌay. A in in bꞌonac ebꞌ, yic tzin yicꞌanchaan̈ ebꞌ, xin chama.
8 Iqꞌueccot ebꞌ in chon̈abꞌ dꞌa tic. Ay yol sat ebꞌ, palta max yil-laj ebꞌ, ay schiquin ebꞌ, palta max yabꞌlaj ebꞌ.
9 Molbꞌejec e bꞌa ex nivac chon̈abꞌ, junn̈ej tzex aj ex chon̈abꞌ. ¿Mach e diosal aljinac tas van yuji tic? ¿Mach ebꞌ ayocto yalannaccan yuj tastac ujinacxo? Yicꞌocabꞌcot stestigo ebꞌ tato yel yalnac ebꞌ, yic vachꞌ tzꞌojtacajeli to yel tas yalnac ebꞌ chiꞌ, xchi Jehová.
10 A Jehová tzꞌalanxi icha tic: A ex israel ex tic, in testigo ex, in checabꞌ ex, sicꞌbꞌil ex el vuuj, yic vachꞌ tzin eyojtaquejeli, tzin eyacꞌanoch yipoc e cꞌool. Nachajocabꞌpaxel eyuuj to A inn̈ej Dios in. Malaj junocxo dios ecꞌnacxo, ma toto ol javoc.
11 A inn̈ej Jehová in, malaj junoc mach syal scolvaji.
12 A in valnac to ol ex in coloꞌ, in testigo eyaji to ix elcꞌoch jun chiꞌ. Man̈oc junoc comon dios aljinac.
13 Dꞌa juneln̈ej toxonton Dios in. Malaj junoc mach syal scolanel sbꞌa dꞌa yol in cꞌabꞌ, malaj mach syal stenanecꞌ tas tzin cꞌulej, xchi Dios.
14 A Jehová co Diosal a on̈ israel on̈ tic, Axon̈ej Ochi, jun ix on̈ acꞌanel libre, aꞌ tzꞌalan icha tic: Ol in checbꞌat ebꞌ soldado yacꞌ oval dꞌa Babilonia yic ol ex in colani. Ol bꞌat ebꞌ caldeo chiꞌ elelal dꞌa yol juntzan̈ barco syicꞌchaan̈ sbꞌa ebꞌ yedꞌoc.*
15 Ex israel, a in Jehová in in bꞌonac ex. E Diosal in, A inxon̈ej Ochi, e reyal in paxi, xchi Jehová.
16 A Jehová jacannac jun bꞌe dꞌa yol aꞌ mar, aton jun bꞌe ecꞌnac dꞌa snan̈al aꞌ.
17 Yacꞌannac elta jun nivan n̈ilan̈ ebꞌ soldado yedꞌnac scarruaje yedꞌ nocꞌ chej, palta satnaquel ebꞌ yuuj. Satnaquel ebꞌ smasanil, man̈xalaj ebꞌ cannac. Satnaquem ebꞌ icha stup scꞌacꞌal candil.
18 A ticnaic syal Jehová dꞌa schon̈abꞌ icha tic: Man̈xo e nacot tas ecꞌnacbꞌati, man̈xo e nacot tas ujinacxo.
19 Palta ay tas toto ol in cꞌulej, ol eyilaꞌ to ol ujoc juntzan̈ chiꞌ ticnaic. Ay val jun bꞌe ol in jac dꞌa taquin̈ luum, ol qꞌueul a nivac aꞌ bꞌaj taquin̈taxon sat.
20 Ol in yicꞌchaan̈ nocꞌ caltacteꞌal nocꞌ, nocꞌ oques yedꞌ nocꞌ avestruz, yujto ol vacꞌ qꞌueul a aꞌ dꞌa lum taquin̈ lum chiꞌ. Ol laj bꞌey aꞌ bꞌaj taquin̈taxon sat yic tzeyucꞌ aꞌ ex in chon̈abꞌ ex sicꞌbꞌil ex el vuuj tic.
21 Bꞌobꞌil ex vuuj, yic tzeyal vachꞌ lolonel dꞌayin.
22 Palta ex israel, yin̈tilal Jacob, majxo eyavtej in bꞌi, a tas ix e cꞌulej, to ix ex tzactzaj vedꞌoc.
23 Majxo eyacꞌ nocꞌ calnel silabꞌil dꞌayin, man̈xa velcꞌoch dꞌayex yedꞌ e silabꞌ chiꞌ. Maj in cꞌann̈ej ofrenda dꞌayex, maj ex vacꞌ pural eyacꞌan incienso dꞌayin.
24 Maj e manlaj te teꞌ sumumi sjabꞌ yic tzeyacꞌ ofrendail dꞌayin. Maj eyacꞌ tzalajbꞌoc in cꞌool yedꞌ xepual nocꞌ nocꞌ ix eyacꞌ silabꞌil. Palta an̈ej val chucal tze cꞌulej, in tzactzaj val yuuj. Tze tzuntzejcot voval yuj jantac chucal tze cꞌulej chiꞌ.
25 Palta a in tic, yuj val snivanil velcꞌochi, yuj chiꞌ tzin sucsat e chucal chiꞌ, man̈xa bꞌaqꞌuin̈ ol in nacot e mul chiꞌ.
26 Tato ay val tas tze naꞌ dꞌa vibꞌan̈ jun, co bꞌoec yaj ticnaic. Aleccoti, ol checlajoc tato malaj e mul.
27 A jun vin̈ e bꞌabꞌel mam icham, ochnac smul vin̈. Axo ebꞌ e cꞌaybꞌumal, meltzajnacoch ebꞌ ajcꞌolal dꞌayin.
28 Yuj chiꞌ, ol vacꞌ qꞌuixvelal ebꞌ yajalil e templo a ex chon̈abꞌ Israel ex tic. Ex yin̈tilal Jacob, ol ex vactejcani yic tzex satjieli yedꞌ eyixtaji, xchi Jehová.