A jun schecabꞌ Jehová
42
Syalanxi Jehová icha tic:A jun tic in checabꞌ, ayin och yedꞌoc, a in in sicꞌnaqueli, tzin tzalaj val yedꞌoc. Ol vacꞌoch Vespíritu dꞌay, yic schꞌolbꞌitej masanil nivac chon̈abꞌ dꞌa stojolal.
2 Man̈ ol avajoc, man̈ ol abꞌchaj yel yav dꞌa yoltac calle.
3 Ay ebꞌ te ilbꞌaj cꞌool, icha teꞌ aj scan̈chaji, ma ichoc scꞌapaquil candil van stupi. Palta ol colvaj in checabꞌ chiꞌ dꞌa ebꞌ, man̈ ol svachꞌ ixtej ebꞌ, tojol ol yutoc schꞌolbꞌitan tas yaj ebꞌ.
4 Man̈ ol el yip, man̈ ol chabꞌax scꞌool. Ol chꞌolbꞌitaj masanil anima dꞌa stojolal yuuj dꞌa sat lum tic. A juntzan̈ chon̈abꞌ dꞌa stitac aꞌ mar, ol smaclej yabꞌ cꞌaybꞌubꞌal ebꞌ ol yacꞌaꞌ, xchi Jehová.
5 A Jehová Dios bꞌoannac satchaan̈, yacꞌannacbꞌat jen̈an. Aꞌ ix bꞌoan lum luum yedꞌ masanil tastac sqꞌuibꞌ dꞌa sat luum. A tzꞌacꞌan co qꞌuinal, syacꞌanpax quicꞌ. Syalan dꞌa jun schecabꞌ chiꞌ icha tic:
6 A in Jehová in tic, ix ach vavtej yic tza chꞌolbꞌitej masanil anima dꞌa sat luum tic dꞌa stojolal. Ol in och edꞌoc. A ach ol ach vacꞌlabꞌej yuj jun in trato ol in bꞌo yedꞌ ebꞌ anima smasanil. Ol ach vacꞌoch colvajvumal dꞌa ebꞌ chꞌoc nacional.
7 Ol a jac sat ebꞌ max uji yilani, ol a colanelta ebꞌ ayoch dꞌa preso, aton ebꞌ aycanbꞌat dꞌa cal qꞌuicꞌalqꞌuinal.
8 A in ton Jehová in, aton in bꞌi tic, man̈ ol in cha aljoc vachꞌ lolonel dꞌa junocxo mach yuj tas in bꞌonac, man̈ ol in cha icꞌjocchaan̈ yechel comon dios in qꞌuexuloc.
9 Ilecnabꞌ tas ix aj yelcꞌoch masanil tas valnaccani. Axo ticnaic, ay juntzan̈xo tas acꞌto ol val dꞌayex. Ayocto svalancan dꞌayex yacbꞌan manto ujoc, xchi Dios.
Bꞌit yic aloj vachꞌ lolonel dꞌa Dios
10 Bꞌitejec junoc acꞌ bꞌit dꞌa Jehová e masanil ex ayex bꞌaj slajvicꞌoch lum luum tic, ex tzex ecꞌ dꞌa yibꞌan̈ aꞌ mar, nocꞌ nocꞌ ay dꞌa aꞌ yedꞌ ex pax cajan ex dꞌa stitac aꞌ mar chiꞌ, bꞌitanan̈ec dꞌa Dios.
11 Tzalajocabꞌ ebꞌ yin̈tilal Cedar cajan dꞌa scampamento dꞌa tzꞌinan luum. A ebꞌ aj chon̈abꞌ Sela, bꞌitanocabꞌ ebꞌ dꞌa tzalajcꞌolal, qꞌueocabꞌ sjaj ebꞌ sbꞌitan dꞌa lum jolomtac vitz.
12 A ebꞌ ay dꞌa stitac aꞌ mar, yalocabꞌ vachꞌ lolonel ebꞌ dꞌa Jehová.
13 Ol elta Jehová icha junoc acꞌum oval, ol yacꞌan oval yedꞌ val yoval scꞌool icha junoc soldado. Ol el yav yacꞌan oval, ol acꞌjoc ganar ebꞌ ajcꞌol chiꞌ yuuj.
14 A Jehová tzꞌalan icha tic: Najtil numann̈ej vaji, malaj tas svalaꞌ. Axo ticnaic, ol el vav icha junoc ix ix van yaj yuneꞌ, scꞌacvi ix, sicꞌsicꞌan ix.
15 Ol laj in satel lum vitz yedꞌ lum tzalquixtac. Ol vacꞌan tacjoquel masanil tas yaax dꞌa sat lum tic. Ol vacꞌan tup aꞌ nivac aꞌ sbꞌeyi. Ol ochcan lum taquin̈ lumal, ol laj tupcan aꞌ scan dꞌa yedꞌtal.
16 A ebꞌ max ujilaj yilani, ol vicꞌbꞌat ebꞌ dꞌa juntzan̈ bꞌe man̈ yojtacoc. A qꞌuicꞌalqꞌuinal, ol vacꞌ meltzajoch saquilqꞌuinalil dꞌa ebꞌ. Axo pacꞌquiltac, pan̈anxo ol vutejcani. Aton juntzan̈ tic ol vacꞌn̈ejelcꞌochi.
17 A ebꞌ tzꞌacꞌanoch comon dios yipoc scꞌool yedꞌ ebꞌ tzꞌalan dꞌa juntzan̈ yechel icha tic: Co diosal ex, xchi ebꞌ, a ebꞌ chiꞌ qꞌuixvelal ol laj paxcan ebꞌ.
A spitalil ebꞌ israel
18 Ex max eyabꞌi, abꞌec. Ex max uji eyilani, ilec ticnaic.
19 Malaj mach juneln̈ej max ilan icha in checabꞌ sicꞌbꞌilel vuuj, malaj mach juneln̈ej max chaan yabꞌ icha yalumalel in lolonel checbꞌil vuuj.
20 Ex israel, te ayn̈ej tas schꞌoxji eyilaꞌ, palta max eyacꞌoch dꞌa e cꞌool eyilani. Syal eyabꞌani, palta max e cha eyabꞌi, xchi Jehová.
21 Ix snibꞌej scꞌol Jehová schꞌoxanel stojolal, yuj chiꞌ ix yacꞌ scꞌaybꞌubꞌal te vachꞌ dꞌa schon̈abꞌ.
22 Palta yuj spitalil jun chon̈abꞌ tic ix elcꞌajbꞌat tastac ay dꞌay yuj ebꞌ ajcꞌool. Ix icꞌjibꞌat ebꞌ dꞌa chꞌoc nacional, ix acꞌchajem ebꞌ dꞌa yol jul, ix och pax ebꞌ dꞌa preso. Ix ixtaj ebꞌ, man̈xa mach ix colan ebꞌ. Ix elcꞌajbꞌat ebꞌ, man̈xa mach ix icꞌanecꞌ ebꞌ dꞌa ebꞌ ix elcꞌanbꞌat chiꞌ.
23 Palta ¿mach ex bꞌecan e cꞌol e maclan eyabꞌ tas ol val tic? ¿Mach ex bꞌecan e cꞌol e chaann̈ej eyabꞌi? Abꞌec tas ol val tic:
24 ¿Mach ix chaan acꞌjoc ganar ebꞌ israel yin̈tilal Jacob, ayic ix elcꞌajbꞌat tastac ay dꞌa ebꞌ? ¿Tom man̈oc Jehová? Atoni, yujto ix och smul ebꞌ dꞌay. Maj yal scꞌol ebꞌ ix sbꞌeybꞌalej sbꞌeybꞌal, maj scꞌanabꞌajej pax scꞌaybꞌubꞌal Jehová chiꞌ ebꞌ.
25 Yuj val chiꞌ jun, ix cot yoval Jehová dꞌa ebꞌ, ix acꞌjioch syaelal ebꞌ. Ix javi jun oval icha sqꞌue n̈iln̈on teꞌ cꞌacꞌ dꞌa yibꞌan̈ ebꞌ, palta man̈ yujoc chiꞌ ix sna sbꞌa ebꞌ.