Ol coljoc Israel yuj Dios
41
Syal Dios icha tic:Abꞌec ex anima cajan dꞌa stiꞌ aꞌ mar, numan tzex aj dꞌa vichan̈. Tecꞌbꞌejec e bꞌa ex nivac chon̈abꞌ, cotan̈ec, junn̈ej tzon̈ ajec. Ol ex lolonoc, ol in lolonpax a in tic.
2 ¿Mach ol acꞌan checlaj jun rey dꞌa stojolal bꞌaj sjavi cꞌu, jun ol acꞌann̈ej ganar oval? ¿Mach ol acꞌanoch nivac chon̈abꞌ dꞌa yol scꞌabꞌ, yic ol yacꞌanem sbꞌa ebꞌ dꞌay? A yedꞌ yespada jun rey chiꞌ yedꞌ sjul-labꞌ ol sactzipanbꞌat ebꞌ icha sbꞌat smatzꞌil ixim trigo yuj icꞌ.
3 Ol el juntzan̈xo ebꞌ rey elelal dꞌa yichan̈ jun rey chiꞌ. Palta tzalajcꞌolal ol bꞌatn̈ej, ichato man̈ ol em yoc dꞌa sat luum.
4 ¿Mach ol acꞌan elcꞌoch juntzan̈ tic? ¿Mach najinaquelta masanil tastac ujinac dꞌa yichbꞌanil? A in ton Jehová in, a in in bꞌonac. A inn̈ej Dios in, bꞌabꞌel vaj dꞌa smasanil, slajvubꞌ in paxi.
5 A juntzan̈ chon̈abꞌ ay dꞌa stitac aꞌ mar, ol yil ebꞌ, ol xiv ebꞌ yilani. Masanil ebꞌ cajan bꞌaj slajvicꞌoch lum luum tic, ol ibꞌxocqꞌue ebꞌ yuj xivelal yuj tas ol in cꞌulej yedꞌ jun rey chiꞌ, xchi Dios. Ol smolbꞌej sbꞌa ebꞌ anima.
6 Junjun ebꞌ ol laj scuchbꞌejcot sbꞌa, ol yacꞌan yip ebꞌ.
7 A ebꞌ jelan sbꞌoan yechel tastac, a ebꞌ scuchbꞌan ebꞌ smunlaj dꞌa qꞌuen plata. Axo ebꞌ smunlaj dꞌa qꞌuen martillo, a ebꞌ scuchbꞌan ebꞌ stenvi qꞌueen dꞌa qꞌuen tenlabꞌ, syalan ebꞌ: Te vachꞌ qꞌuen co niplabꞌ qꞌueen tic, xchi ebꞌ. Elan̈chamel slavuxej juntzan̈ yechel chiꞌ ebꞌ, yic stzatzbꞌi, yic max telvi.
8 Syalan Jehová icha tic: Ex israel yin̈tilal Jacob, abꞌec tas svalaꞌ: In checabꞌ val eyaji, sicꞌbꞌil ex el vuuj, yin̈tilal ex can vin̈ vamigo aj Abraham.
9 A in ton vicꞌnac ex cot bꞌaj slajvicꞌoch lum luum tic, ex vavtannaccot bꞌaj te najat eyajcanbꞌati. Valannac dꞌayex to in checabꞌ ex. A in in sicꞌnac ex eli, malaj bꞌaj tzex in patiquejeli.
10 Man̈ ex xivoc, ayinecꞌ eyedꞌoc. Man̈ ex och ilcꞌolal, yujto a in ton tic e Diosal in. A in svacꞌ eyip, a in tzex in coloꞌ. A in tzex in yamoch vaan yedꞌ vip svacꞌlabꞌej dꞌa tojolal.
11 Masanil ebꞌ schichon scꞌol dꞌayex, qꞌuixvelal ol ajcan ebꞌ, emnaquilal ol ajcan ebꞌ. A ebꞌ tzꞌacꞌan yip yacꞌan oval eyedꞌoc, ol satcanel ebꞌ.
12 Olto e say ebꞌ ayoch ajcꞌolal dꞌayex, palta man̈xo ol ilchaj ebꞌ eyuuj. A ebꞌ tzꞌacꞌantaxon oval eyedꞌoc, ol cann̈ej ebꞌ icha junoc tas malajtaxoni.
13 Yujto a in Jehová in tic, e Diosal in. A in ix ex in quetz bꞌeyoc. A in ton ix val dꞌayex: Man̈ ex xivoc, ol in och eyedꞌoc, xin chi.
14 Ex israel yin̈tilal Jacob, vachꞌchom quenn̈ej e bꞌisul, malaj eyip, palta man̈ ex xivoc, ol in och eyedꞌoc. A in ton e Diosal in A inxon̈ej Ochi, e Columal in.
15 Ol ex vacꞌoch icha junoc qꞌuen icꞌumel sat trigo acꞌto te ay ye. Ol laj e macꞌpoj lum nivac vitz, pococ ol ajcan lum eyuuj. A lum tzalquixtac, chocꞌ ol eyutejcan lum icha smatzꞌil ixim trigo.
16 Ol e tzipqꞌue lum dꞌa cal icꞌ, axo icꞌ chiꞌ ol icꞌanbꞌat luum. Ol saclemcanbꞌat luum yuj chacxuxum icꞌ. Yuj chiꞌ, ol ex tzalaj dꞌayin Jehová in tic. Ol eyicꞌchaan̈ e bꞌa vuuj, a in ton e Diosal in A inxon̈ej Ochi.
17 A ebꞌ anima mebꞌaꞌ malaj tas ay dꞌay, say a aꞌ ebꞌ, max chaxlaj aꞌ yuj ebꞌ. Van scham ebꞌ yuj taquin̈tial. Palta a inxo Jehová in tic, ol in colvaj dꞌa ebꞌ, man̈ ol vactejcan ebꞌ a in e Diosal in a ex israel ex tic.
18 A dꞌa lum jolomtac vitz taquin̈ sat, ol laj vacꞌqꞌueul a nivac aꞌ sbꞌeyi, axo dꞌa snan̈altac lum acꞌlic, ol laj qꞌueul sjaj aꞌ cotac aꞌ. A lum taquin̈ sat, sitzꞌatac ol ajcan luum. Axo dꞌa lum taquin̈ luum, ol laj qꞌueul aꞌ cotac aꞌ sbꞌeyi.
19 A dꞌa lum taquin̈ lum chiꞌ ol vavej teꞌ cꞌuteꞌ, teꞌ acacia, teꞌ arrayán yedꞌ teꞌ olivo. A dꞌa lum taquin̈ sat chiꞌ ol vacꞌ qꞌuibꞌ teꞌ cꞌubꞌtaj, teꞌ taj yedꞌ teꞌ tzicap,
20 yic vachꞌ syil masanil anima, snachajpaxel yuj ebꞌ to a in ton Jehová in ix in bꞌo juntzan̈ tic yedꞌ in poder, a in e Diosal in, A inxon̈ej Ochi, a in ix in bꞌoꞌo.
Malaj tas syal yuj juntzan̈ comon dios
21 A Jehová sReyal ebꞌ yin̈tilal Jacob, a tzꞌalan icha tic: Cotan̈ec ex comon dios, chꞌoxec e jelanil, chꞌoxec tas tzꞌaj e colan e bꞌa.
22 Cotan̈ec, ul alec dꞌayon̈ tastac toto ol ujoc. Alec dꞌayon̈ tas syalelcꞌoch tastac ujinacxo, ol co cha cabꞌi, yic vachꞌ ol quilaꞌ tas ol aj slajvielcꞌochi.
23 Tato yel dios ex, alec dꞌayon̈ tas toto ol ujoc chiꞌ, yic scojtaquejeli to dios ex. Chꞌoxec val quilaꞌ tas syal eyuuj chiꞌ, taxon̈ej vachꞌ, ma chuc, yic sat co cꞌool quilani, yic tzon̈ xivqꞌuei.
24 Palta a ex val tic, bꞌalaj malaj jabꞌoc eyelcꞌochi, malaj tas syal eyuuj. A ebꞌ syaqꞌuem sbꞌa dꞌayex, paticabꞌilel ebꞌ.
25 Ol vacꞌ checlaj jun mach dꞌa norte, ol vavtejcot dꞌa stojolal bꞌaj sjavi cꞌu, ol yalan sbꞌa dꞌayin. Aꞌ ol tecꞌanem ebꞌ yajal, icha stecꞌji lum socꞌom yuj vin̈ tzꞌacum luum, icha chiꞌ ol aj ebꞌ.
26 ¿Tom ay junoc ex ix eyalel yabꞌixal jun tic dꞌa yictax yichbꞌanil, yic scabꞌ a on̈ tic? ¿Tom ay junoc ex ayocto ix eyalancani, yic vachꞌ scalaꞌ to yel tzeyalaꞌ? Malaj junoc ex comon dios ex tic ix eyal tas ol ujoc chiꞌ, malaj anima ix abꞌan eyalani.
27 Atax dꞌa yichbꞌanil, a in Jehová in tic ix val jun abꞌix tic dꞌa Sion. A in ix in checbꞌat jun in checabꞌ dꞌa Jerusalén yic bꞌat yal vachꞌ abꞌix, to ol meltzajxoc ebꞌ anima dꞌa schon̈abꞌ chiꞌ.
28 Tzin maclej vilaꞌ, tocval ay junoc comon dios sjavi, malaj junoc ebꞌ syal yacꞌan in razón, malaj junoc syal spacan tas tzin cꞌanbꞌej.
29 Malaj junoc ebꞌ ay yelcꞌoch jabꞌoc, malaj tas syal sbꞌoan ebꞌ, yuj chiꞌ juneln̈ej malaj jabꞌoc yopisio juntzan̈ yechel bꞌobꞌil chiꞌ, xchi Dios.