Tzꞌacꞌji snivanil scꞌol ebꞌ aj Jerusalén
40
A Jehová co Diosal tzꞌalan icha tic:Aqꞌuec snivanil scꞌol in chon̈abꞌ.
2 Vachꞌ tzeyutej e lolon dꞌa ebꞌ aj Jerusalén, tzeyalan dꞌa ebꞌ to man̈xa bꞌaqꞌuin̈ ol och ebꞌ checabꞌoc, toxo ix stupel spitalil ebꞌ yedꞌ schucal, toxo ix scha syaelal ebꞌ ix vacꞌ icha val dꞌa smojal, xchi Jehová.
3 Ay jun av tzꞌochi, syalan icha tic: Bꞌoec junoc sbꞌe Jehová dꞌa tzꞌinan luum, tojol tzeyutej e bꞌoan jun bꞌe dꞌa co Diosal, levan tzeyutej e bꞌoan dꞌa lum malaj jabꞌoc tas tzꞌel dꞌa sat.
4 Bꞌudꞌec lum chꞌolquixtac, aqꞌuec pan̈anbꞌoc masanil lum vitz yedꞌ lum tzalquixtac. Tojolbꞌitejec sat lum sattac vitz yedꞌ opquiltac, acꞌlictac tzeyutejcan sat luum.
5 Ichato chiꞌ ol schꞌoxan Jehová to nivan yelcꞌochi, masanil anima ol ilanoc. A val Jehová ix alani, xchi jun av chiꞌ.
6 Ay jun av ix alan icha tic. Avajan̈, xchi. Ix in cꞌanbꞌan dꞌay: ¿Tas ol vutej avaj in bꞌa? xin chi dꞌay. Ix tacꞌvi, ix yalani: Aleli to a sqꞌuinal masanil ebꞌ anima, lajan icha an̈ an̈cꞌultac cꞌun stacji. Elan̈chamel tzꞌecꞌbꞌat svachꞌil yilji ebꞌ icha val tzꞌaj yecꞌbꞌat svachꞌil yilji an̈ xumaac ay dꞌa lum pan̈quiltac.
7 A an̈ an̈cꞌultac, val ticnaic stacjiel an̈, axo xumaquil an̈, tzꞌel bꞌulnajoc ayic tzꞌecꞌ yicꞌal Jehová dꞌa scal an̈. Yel, a ex anima ex tic, lajan ex icha an̈ an̈cꞌultac chiꞌ.
8 A an̈ an̈cꞌultac, stacjiel an̈, slaj pucbꞌat xumaquil an̈, palta axo val slolonel co Diosal, ayn̈ejecꞌ dꞌa juneln̈ej, xa chi, xchi dꞌayin.
9 Ex aj Sion, qꞌuean̈ec dꞌa sjolom jun lum vitz. Te chaan̈ tzex avaj taꞌ, yic tzeyalanel vachꞌ abꞌix. Ex aj Jerusalén, man̈ ex xiv eyavaji, alec dꞌa junjun chon̈abꞌ yic Judá: Ina yajecꞌ co Diosal dꞌa tic, xe chi.
10 A Jehová Dios van sjavi yedꞌ spoder. Yuj spoder chiꞌ syicꞌanem sbꞌa masanil anima dꞌay, yedꞌnac spac tas ix yicꞌ dꞌa smunlajel.
11 Ol javoc icha junoc tan̈vum calnel stan̈van nocꞌ scalnel, schelanqꞌue nocꞌ yunetac calnel chiꞌ dꞌa sn̈iꞌ scꞌool, syailan nocꞌ toto ix aj yuneꞌ.
Malaj mach lajan icha sDiosal Israel
12 ¿Mach junoc ix echtan aꞌ mar yedꞌ yol scꞌabꞌ yedꞌ yechtan satchaan̈ yedꞌ yiximal scꞌabꞌ? ¿Mach junoc ix echtan masanil spococal lum luum dꞌa yol junoc echlabꞌ? ¿Mach junoc ix echtan yalil masanil lum vitz yedꞌ lum tzalquixtac? Aton Jehová.
13 ¿Tom ay junoc mach scꞌaybꞌan Jehová, ma tzꞌalan yabꞌi?
14 ¿Tom ay junoc mach ix acꞌan srazón Jehová, ma ix jacan spensar? ¿Tom ay junoc mach ix cꞌaybꞌani yic schꞌolbꞌitan dꞌa stojolal? ¿Tom ay junoc mach ix chꞌoxani yic snaani? ¿Tom ay junoc mach ix cꞌaybꞌan dꞌa jelanil?
15 A dꞌa yol sat Jehová, a juntzan̈ nivac chon̈abꞌ, lajan icha junoc dꞌujan̈ a aꞌ tzꞌem dꞌa yedꞌtal, ma icha val jabꞌoc lum pococ dꞌa yol junoc echlabꞌ. A juntzan̈ lum luum ay dꞌa snan̈al aꞌ mar, lajan icha junoc qꞌuen cꞌaj qꞌueen.
16 Masanil nocꞌ nocꞌ ay dꞌa Líbano, max tzacꞌvanlaj nocꞌ yacꞌchaj silabꞌil dꞌa Jehová chiꞌ yedꞌ masanil te teꞌ ay taꞌ, max yabꞌpaxlaj teꞌ yoch scꞌatzitzaloc nocꞌ silabꞌ chiꞌ.
17 Masanil juntzan̈ nivac chon̈abꞌ, malaj jabꞌoc yelcꞌoch dꞌa yol sat Jehová, malaj jabꞌoc yopisio dꞌay.
18 ¿Mach junoc syal e lajbꞌan Dios yedꞌoc? ¿Tas junoc yechel syal e lajbꞌan yedꞌoc?
19 A Dios, man̈ lajanoc yedꞌ junoc yechel comon dios. A ebꞌ sbꞌoan juntzan̈ yechel chiꞌ syaqꞌuem ebꞌ dꞌa yol smoldeal, axo junoc tenum qꞌueen tzꞌacꞌanoch qꞌuen oro dꞌa spatic, sbꞌoanoch qꞌuen plata yelvanubꞌoc.
20 A junoc mach max techaj sbꞌoan yechel dꞌa qꞌuen oro chiꞌ, say te teꞌ pit scꞌai. Syacꞌan teꞌ dꞌa junoc vin̈ bꞌoum teꞌ te jelan, yic sbꞌoan junoc yechel chiꞌ vin̈. Vachꞌ syutejqꞌue lin̈an vin̈, yic max telvi.
21 ¿Tom man̈ eyojtacoc a ex tic? ¿Tom malaj mach ix alan eyabꞌi? ¿Tom malaj mach aljinac dꞌayex dꞌa yictax yichbꞌanil? ¿Tom malaj mach ix ex cꞌaybꞌani yictax sbꞌonac yolyibꞌan̈qꞌuinal tic?
22 A sdespacho Dios ayqꞌue dꞌa yibꞌan̈ satchaan̈, aton satchaan̈ chiꞌ jen̈anbꞌat dꞌa yibꞌan̈ lum luum tic. Ayic tzon̈ yilanemta Jehová a on̈ anima on̈ dꞌa sat lum tic, lajan on̈ icha nocꞌ chil. A Dios chiꞌ ix jen̈bꞌanbꞌat satchaan̈ chiꞌ icha junoc cꞌapac, ix slichꞌanbꞌat icha junoc mantiado bꞌaj tzꞌaj anima.
23 A yuj Jehová man̈xa tzꞌajcan yelcꞌoch ebꞌ nivac vinac, syacꞌan satem ebꞌ yajal dꞌa sat luum tic.
24 Lajan ebꞌ yajal chiꞌ icha an̈ unin an̈cꞌultac toto tzꞌavchaji, vanto yem schꞌan̈al yibꞌ dꞌa yol luum. Tato syacꞌbꞌat yicꞌ Jehová dꞌa yibꞌan̈ an̈, stacjiel an̈, tzꞌicꞌjibꞌat an̈ yuj chacxuxum icꞌ icha yoc trigo. Icha chiꞌ tzꞌaj ebꞌ yajal chiꞌ.
25 A Jehová Dios Axon̈ej Ochi, a scꞌanbꞌani: ¿Mach yedꞌ syal in e lajbꞌani? ¿Tocval ay mach lajan vedꞌoc? xchi.
26 Qꞌuean̈ec qꞌuelan dꞌa satchaan̈, ¿tom man̈oc Dios ix bꞌoan masanil juntzan̈ chiꞌ? Aton ix bꞌoani. Aꞌ ix bꞌoancanoch junjun qꞌuen cꞌanal dꞌa yedꞌtal, syavtan junjun qꞌuen dꞌa sbꞌi. Malaj junoc qꞌuen sati, yujto te nivan spoder Jehová chiꞌ.
27 Ex israel, yin̈tilal Jacob, ¿tas yuj tzeyalubꞌtan̈ej tzeyalan icha tic? A Jehová max cot qꞌuelan dꞌayon̈ yuj tas tzon̈ icꞌani, ¿tocval tzꞌoch ilcꞌolal cuuj? xe chi.
28 ¿Tom man̈ eyojtacoc? ¿Tom manta bꞌaj tzeyabꞌi? A Jehová Dios, ayn̈ejecꞌ dꞌa juneln̈ej. Aꞌ ix bꞌoan yolyibꞌan̈qꞌuinal tic. Malaj bꞌaj tzꞌel yip, malaj bꞌaj scꞌunbꞌi. Man̈xa yalnabꞌil sjelanil.
29 A tzꞌacꞌan yip ebꞌ cꞌunbꞌinac, axo ebꞌ malaj yip, a tzꞌacꞌan stecꞌanil ebꞌ.
30 A ebꞌ quelemtac, scꞌunbꞌi ebꞌ, tzꞌel yip ebꞌ. A ebꞌ te ay yip, stelvipax ebꞌ.
31 Palta a val ebꞌ an̈ej Jehová ayoch yipoc scꞌool, tzꞌochn̈ej yip ebꞌ. Te tecꞌan ebꞌ icha nocꞌ nivac chꞌacbꞌa sqꞌue jen̈naj yedꞌ yip dꞌa chaan̈, scarelavi ebꞌ, palta max cꞌunbꞌilaj ebꞌ, sbꞌey ebꞌ, palta max el-laj yip ebꞌ.