Ebꞌ checabꞌ ix checjicot dꞌa Babilonia
39
A dꞌa jun tiempoal chiꞌ, a vin̈aj Merodac-baladán, sreyal Babilonia, yuninal vin̈aj Baladán, ix yabꞌ vin̈ yalji to penaayaxnac vin̈aj Ezequías chiꞌ, palta bꞌoxnacxi scꞌol vin̈. Yuj chiꞌ ix scheccot juntzan̈ ebꞌ schecabꞌ vin̈ yic tzul yacꞌancan ebꞌ tas ix tzꞌibꞌejcot vin̈ rey chiꞌ yedꞌ silabꞌ. 2 Ix te tzalaj vin̈aj Ezequías chiꞌ yujto ix javi ebꞌ. Ix schꞌoxan masanil sbꞌeyumal vin̈ dꞌa ebꞌ, aton qꞌuen plata, qꞌuen oro, perfume, aceite te vachꞌ, bꞌaj molan masanil yamcꞌabꞌ yic oval yedꞌ masanil tastac ay dꞌa yedꞌtal bꞌaj molbꞌabꞌil. Man̈xa junoc tas ay dꞌa spalacio vin̈ yedꞌ masanil tas ay dꞌa yol smacbꞌen vin̈ maj schꞌox dꞌa ebꞌ vin̈. 3 Axo yic ix paxcan ebꞌ vin̈, ix in bꞌat a in Isaías in tic schecabꞌ Dios vil vin̈aj rey Ezequías chiꞌ, ix in cꞌanbꞌan icha tic:—¿Bꞌajtil ix cot juntzan̈ ebꞌ vin̈ vinac chiꞌ? ¿Tas ix ul yal ebꞌ vin̈ dꞌayach? xin chi.
Ix yalan vin̈ icha tic:
—A dꞌa jun chon̈abꞌ te najat ix cot ebꞌ vin̈, aton Babilonia, xchi vin̈.
4 Ix in cꞌanbꞌanxi dꞌa vin̈:
—¿Tas ix ul yil ebꞌ vin̈ dꞌa a palacio tic? xin chi.
Ix yalan vin̈ dꞌayin:
—Masanil tas ay dꞌa in palacio tic ix yil ebꞌ vin̈, ix in chꞌoxan masanil tastac molbꞌabꞌil vuuj, xchi vin̈.
5 Ix valan dꞌa vin̈ icha tic:
—Abꞌ val tas syal Jehová Yajal dꞌa Smasanil: 6 Ol cꞌoch scꞌual, masanil tas ay dꞌa a palacio tic yedꞌ jantac tas ix smolbꞌejcan ebꞌ a mam icham yedꞌ icoꞌ, ol icꞌchajbꞌat masanil dꞌa Babilonia chiꞌ. 7 An̈ejtonaꞌ ebꞌ in̈tilal, ol icꞌjocbꞌat ebꞌ dꞌa Babilonia chiꞌ, ol icꞌchajel sn̈olobꞌ sqꞌueen ebꞌ, ol ochcan ebꞌ yacꞌumaloc servil vin̈ rey chiꞌ dꞌa spalacio, xin chi.
8 Ix yalan vin̈ icha tic:
—A jun lolonel ix schec Jehová al tic dꞌayin, te vachꞌ yaji, xchi vin̈. Yujto ix sna vin̈ icha tic: Yacbꞌan pitzan in to, juncꞌolal caji, malaj tas ol in icꞌanoc, xchi vin̈.