—Toxo ix yal Jehová to tzalcani tas ol ajcan masanil tas ay dꞌayach, yujto ol ach chamn̈ej, man̈xo ol ach bꞌoxoc, xchi vin̈ dꞌa vin̈.

2 Yuj chiꞌ ix sutmajoch vin̈aj Ezequías chiꞌ dꞌa sat pat, ix lesalvi vin̈ dꞌa Jehová, ix yalan vin̈: 3 Mamin Jehová, tzin tevi dꞌayach to tzin a nacot yuj tas ix vutej ach vacꞌan servil yedꞌ in cꞌanabꞌajan dꞌayach dꞌa val yel. Ix in cꞌulej tas scha a cꞌool, xchi vin̈. Ix ocꞌ val vin̈ sicꞌlabꞌil.

4 Axo ix aji, ayic manto val elcꞌoch vin̈aj Isaías dꞌa snan̈al yamaqꞌuil spat vin̈ rey chiꞌ, ix lolonpax Jehová dꞌa vin̈, ix yalani: 5 Meltzajan̈, bꞌat al dꞌa vin̈aj Ezequías yajal in chon̈abꞌ: Icha tic yalan Jehová co Diosal, sDiosal pax vin̈ a mam icham aj David: Toxo ix vabꞌ a lesal, ix vil yel yal a sat oqꞌui. Ol vacꞌ bꞌoxoc a cꞌool, axo chabꞌej syalxo a bꞌat dꞌa templo. 6 Olto vacꞌ 15-ocxo abꞌil a qꞌuinal. Ol ach in coln̈ej yedꞌ chon̈abꞌ Jerusalén tic dꞌa yol scꞌabꞌ vin̈ sreyal Asiria. A in ol in tan̈vej chon̈abꞌ tic, yuj snivanil velcꞌochi, yuj pax in tiꞌ vacꞌnac dꞌa vin̈ in checabꞌ aj David, xchi Jehová, xchi vin̈aj Isaías chiꞌ.

7 Ix schecan vin̈aj Isaías bꞌojoc sat teꞌ higo, ix acꞌchajoch dꞌa sat jun yabꞌil chiꞌ, ix bꞌoxican scꞌool vin̈ yuuj. 8 Ayic manto bꞌo jun remeyo chiꞌ, ix scꞌanbꞌan vin̈aj Ezequías chiꞌ dꞌa vin̈aj Isaías chiꞌ icha tic:

—¿Tas junoc yechel ol vilaꞌ yic ol nachajel vuuj to a Jehová ol acꞌan bꞌoxoc in cꞌool, yic syal in bꞌat dꞌa stemplo dꞌa chabꞌej chiꞌ? xchi vin̈.

9 Ix tacꞌvi vin̈aj Isaías chiꞌ:

—Ay jun yechel ol schꞌox Jehová dꞌayach yic vachꞌ ol nachajel uuj to ol elcꞌoch tas ix yalaꞌ. A ach tzalaꞌ tato sbꞌabꞌlaj veven dꞌa lajun̈eꞌ bꞌachquiltac dꞌa jun tzꞌilan jantac yecꞌ cꞌu, mato schael yich yemxi jun veven chiꞌ dꞌa spatic lajun̈eoc bꞌachquiltac chiꞌ, xchi vin̈.

10 Ix tacꞌvi vin̈aj Ezequías chiꞌ dꞌa vin̈:

—Ayic sbꞌat veven chiꞌ dꞌa yichan̈, secojtac, palta tato schaxiel yemxi lajun̈eoc bꞌachquiltac dꞌa spatic, a jun chiꞌ ajaltac, xchi vin̈.

11 Yuj chiꞌ ix tevi vin̈aj Isaías chiꞌ dꞌa Jehová, axo Jehová chiꞌ ix acꞌanxi yic tzꞌelxi yich yemxita veven chiꞌ dꞌa lajun̈ bꞌachquiltac chiꞌ dꞌa jun tzꞌilan jantac yecꞌ cꞌu yic vin̈aj Acaz.

12 A dꞌa jun tiempoal chiꞌ, a vin̈ sreyal Babilonia, aton vin̈aj Merodac-baladán yuninal vin̈aj Baladán, ix yabꞌ vin̈ to penaayaxnac vin̈aj Ezequías, yuj chiꞌ ix scheccot ebꞌ vin̈ schecabꞌ vin̈ yic tzul yacꞌancan jun carta ebꞌ vin̈ yedꞌ junoc silabꞌ dꞌa vin̈aj Ezequías chiꞌ. 13 Ix chaji ebꞌ vin̈ checabꞌ chiꞌ yuj vin̈aj Ezequías chiꞌ. Masanil tas sicꞌan yuj vin̈, ix schꞌox vin̈ dꞌa ebꞌ vin̈: Aton qꞌuen plata, qꞌuen oro, perfume yedꞌ aceite te vachꞌ yedꞌ pax bꞌaj molanecꞌ yamcꞌabꞌ yic oval yedꞌ jantac tas molan yuj vin̈. Man̈xa junocxo tas ay dꞌa spalacio vin̈ yedꞌ dꞌa yol smacbꞌen to maj schꞌoxlaj dꞌa ebꞌ vin̈. 14 Ix lajvi chiꞌ, ix bꞌat vin̈aj Isaías schecabꞌ Dios dꞌa vin̈aj Ezequías chiꞌ, ix scꞌanbꞌan vin̈ dꞌa vin̈ icha tic:

—¿Bꞌajtil ix cot juntzan̈ ebꞌ vin̈ vinac chiꞌ? ¿Tas xchi ebꞌ vin̈ dꞌayach? xchi vin̈.

Ix tacꞌvi vin̈aj Ezequías chiꞌ dꞌa vin̈:

—Ix cot ebꞌ vin̈ dꞌa jun nación te najat, dꞌa Babilonia, xchi vin̈.

15 Ix scꞌanbꞌanxi vin̈aj Isaías chiꞌ:

—¿Tas ix yil ebꞌ vin̈ dꞌa yol a palacio tic? xchi vin̈.

Ix tacꞌvixi vin̈aj Ezequías chiꞌ:

—Masanil tas ix yil ebꞌ vin̈, man̈xa jabꞌoc tas ayecꞌ tic maj yil ebꞌ vin̈, masanil ix in chꞌox dꞌa ebꞌ vin̈, xchi vin̈.

16 Ix yalan vin̈aj Isaías chiꞌ dꞌa vin̈ icha tic:

—Abꞌ tas syal Jehová dꞌayach: 17 Ol cꞌoch val scꞌual, masanil tas ay dꞌa a palacio yedꞌ masanil tas ix smolbꞌejcan ebꞌ a mam icham, ol icꞌchajbꞌat smasanil dꞌa Babilonia, man̈xa jabꞌoc tas ol canoc. 18 Yedꞌ pax ebꞌ in̈tilal, ol icꞌchajbꞌat ebꞌ dꞌa Babilonia chiꞌ, ol icꞌchajel sn̈olobꞌ sqꞌueen ebꞌ, ol acꞌchajoch ebꞌ yacꞌumaloc servil vin̈ sreyal Babilonia chiꞌ, xchi Jehová, xchi vin̈.

19 Ix yalan vin̈aj rey Ezequías chiꞌ dꞌa vin̈aj Isaías chiꞌ:

—A jun lolonel ix al dꞌayin yuj Jehová tic te vachꞌ, xchi vin̈. Ix yal vin̈aj Ezequías chiꞌ icha chiꞌ, yujto ix snaꞌ vin̈ to ay juncꞌolal yacbꞌan pitzanto vin̈.

20 A jantacto yabꞌixal vin̈aj Ezequías yedꞌ tas nivan yelcꞌoch ix scꞌulej vin̈, aton tas ix aj sbꞌoan jun n̈ajabꞌ vin̈ yedꞌ tas ix aj yicꞌancot a aꞌ vin̈ dꞌa yol chon̈abꞌ, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 21 Axo yic ix cham vin̈, a vin̈aj Manasés yuninal vin̈ ix ochcan reyal sqꞌuexuloc.