Ix colchajcan el Judá dꞌa yol scꞌabꞌ vin̈aj Senaquerib
19
Ayic ix yabꞌan vin̈aj rey Ezequías tas ix alchaj chiꞌ, ix stzilchitanbꞌat spichul vin̈. Ix yacꞌanoch spichul vin̈ yic cuscꞌolal, ix bꞌat lesalvoc vin̈ dꞌa yol stemplo Jehová. 2 Ix schecanbꞌat vin̈aj Eliaquim vin̈, vin̈aj Sebna yedꞌ pax ebꞌ vin̈ yajal ebꞌ vin̈ sacerdote. Ayoch pichul yic cuscꞌolal yuj ebꞌ vin̈. Ix bꞌat ebꞌ vin̈ yil vin̈ schecabꞌ Dios, aton vin̈aj Isaías yuninal vin̈aj Amoz. 3 Ix bꞌat yalan ebꞌ vin̈ tas syal vin̈ rey: A ticnaic ayon̈ och dꞌa yaelal, dꞌa cuscꞌolal yedꞌ dꞌa qꞌuixvelal. Icha junoc ix ix van sbꞌo scꞌol yuj unin, man̈xa jabꞌoc yip scani, icha val chiꞌ caj ticnaic. 4 Comonoc val ix yabꞌ Jehová co Diosal tas ix yal jun vin̈ schecabꞌ vin̈ sreyal Asiria ayic ix bꞌuchvaj vin̈ dꞌa co Diosal pitzan. Comonoc tzꞌacꞌjioch yaelal dꞌa yibꞌan̈ vin̈ yuj Jehová, yuj tas ix yal chiꞌ. Lesalvan̈ cuuj mach on̈ ayon̈ to ecꞌ tic, xchicot vin̈aj Ezequías, xchi ebꞌ vin̈.5 Ayic ix yabꞌan vin̈aj Isaías tas ix yal ebꞌ vin̈ schecabꞌ vin̈aj Ezequías chiꞌ, 6 ix schecanxibꞌat ebꞌ vin̈ vin̈ yal dꞌa vin̈ rey icha tic: Icha val tic yalan Jehová: Man̈ ex xiv yuj tas ix yal jun vin̈ schecabꞌ vin̈ sreyal Asiria chiꞌ, te chuc tas ix yal vin̈ dꞌayin, max yal-laj in colvaj yalan vin̈. 7 A in svalaꞌ to ol vacꞌoch jun xivcꞌolal dꞌa vin̈, yuj chiꞌ ayic ol yabꞌan junoc abꞌix vin̈, ol meltzaj vin̈ dꞌa schon̈abꞌ, ataꞌ ol vacꞌ miljoccham vin̈, xchi Jehová, xchibꞌat vin̈aj Isaías chiꞌ.
8 Ix yabꞌan vin̈ sat yajalil ebꞌ soldado yic Asiria to man̈xo ayoc ecꞌ vin̈ sreyal Asiria chiꞌ dꞌa chon̈abꞌ Laquis. Yuj chiꞌ ix meltzaj vin̈, ix schalan sbꞌa vin̈ yedꞌ vin̈ rey chiꞌ dꞌa chon̈abꞌ Libna, van yacꞌan oval vin̈ yedꞌ jun chon̈abꞌ chiꞌ. 9 Ataꞌ ix yabꞌ vin̈ rey chiꞌ yalji to a vin̈aj Tirhaca sreyal Etiopía van scot yedꞌ ebꞌ soldado ul yacꞌ oval yedꞌ vin̈. Yuj chiꞌ ix schecxicot schecabꞌ vin̈ dꞌa vin̈aj rey Ezequías chiꞌ. 10 Ix yalancot vin̈ icha tic: A a Diosal tzꞌalan dꞌayach to man̈ ol acꞌjococh Jerusalén dꞌa yol in cꞌabꞌ, palta man̈ acꞌ musansatil a bꞌa yuj tas syal a Diosal chiꞌ dꞌayach. 11 Tecan ix abꞌi tas ix aj co satanel juntzan̈xo nación a on̈ sreyal on̈ Asiria tic, ¿tom ol yal a colji yuj a Diosal chiꞌ a naani? 12 ¿Tocval ix colji ebꞌ anima yuj sdiosal dꞌa yol scꞌabꞌ ebꞌ in mam vicham? Aton ebꞌ aj Gozán, ebꞌ aj Harán, ebꞌ aj Resef ebꞌ aj Bet-edén cajan dꞌa Telasar, ix satjiel ebꞌ. 13 ¿Bꞌajtil ay vin̈ sreyal chon̈abꞌ Hamat, Arpad, Sefarvaim, Hena yedꞌ Iva? xchicot vin̈ sreyal Asiria chiꞌ.
14 Ix schaan jun carta vin̈aj rey Ezequías chiꞌ bꞌaj tzꞌibꞌabꞌil juntzan̈ lolonel ix alchaj chiꞌ. Ix yilan vin̈. Ix lajvi chiꞌ ix bꞌat vin̈ dꞌa stemplo Jehová, ix xuyanel jun carta chiꞌ vin̈ dꞌa yichan̈ Jehová chiꞌ. 15 Ix lesalvi vin̈ icha tic: Mamin Jehová, ach co Diosal a on̈ israel on̈ tic, ayach ecꞌ dꞌa scal snan̈al querubín, a achn̈ej Dios ach dꞌa yibꞌan̈ masanil nación dꞌa yolyibꞌan̈qꞌuinal tic. A ach ix a bꞌo satchaan̈ yedꞌ lum luum tic. 16 Mamin Jehová, cotan̈ qꞌuelan dꞌayin, tzabꞌan tas ix yalcot vin̈aj Senaquerib dꞌayin. Ach Dios pitzan, ix te bꞌuchvaj vin̈ dꞌayach. 17 Val yel tzijtum nación satnacxoel yuj ebꞌ vin̈ sreyal Asiria chiꞌ. 18 Ix sn̈usantzꞌa sdiosal ebꞌ, ebꞌ vin̈. Yujto a juntzan̈ chiꞌ man̈ diosoclaj, nabꞌa teꞌ, nabꞌa qꞌueen bꞌobꞌil yuj ebꞌ anima, yuj chiꞌ ix yal satanel ebꞌ vin̈. 19 A ticnaic jun, ach Jehová co Diosal, colon̈el dꞌa yol scꞌabꞌ jun vin̈ rey chiꞌ, yic syojtaquejel masanil nación dꞌa yolyibꞌan̈qꞌuinal tic to a achn̈ej Dios ach, malaj junocxo, xchi vin̈aj rey Ezequías chiꞌ dꞌa Jehová.
20 Ix lajvi chiꞌ ix yalancot vin̈aj Isaías chiꞌ dꞌa vin̈aj Ezequías chiꞌ icha tic: A Jehová co Diosal a on̈ israel on̈ tic, a tzꞌalan dꞌayach icha tic: Ix vabꞌ a lesal yuj tas syal vin̈aj Senaquerib sreyal Asiria. 21 Yuj chiꞌ a in Jehová in tic sval yuj vin̈ sreyal Asiria chiꞌ icha tic:
Ach Senaquerib, a ebꞌ ix cobꞌestac aj chon̈abꞌ Sion, malaj elcꞌoch dꞌa yol sat ebꞌ ix, ton̈ej ol ach stzetzej ebꞌ ix. A ebꞌ aj Jerusalén, ol bꞌat micnaj ebꞌ ol ach sbꞌuchan ebꞌ.
22 ¿Mach jun ix a bꞌuchuꞌ ix a xibꞌtani? ¿Mach jun bꞌaj chaan̈ ix utej a jaj, ix icꞌanchaan̈ a bꞌa dꞌay? Aton dꞌayin a in sDiosal in Israel tic to a inxon̈ej ochi.
23 Ix a chec yal bꞌuchval lolonel ebꞌ vin̈ a checabꞌ dꞌayin Yajal in tic.
Ix alan icha tic: Ix in qꞌue dꞌa jolomtac vitz yedꞌ jantac in carruaje, aton dꞌa jolomtac vitz chaan̈ dꞌa yol yic Líbano. Ix in chꞌacanel teꞌ cꞌuteꞌ chaan̈ steel yedꞌ teꞌ taj man̈ jantacoc svachꞌil. Ix in qꞌuen̈ejcꞌoch dꞌa jolomtac vitz chaan̈ bꞌaj te cꞌayum te teꞌ vachꞌ yilji.
24 A dꞌa chꞌoc chon̈abꞌil ix vacꞌ joychaj aꞌ ucꞌbꞌilaꞌ, ataꞌ ix vucꞌ aꞌ. A ix in ecꞌ dꞌa yoltac a aꞌ dꞌa Egipto, ix in tecꞌancan tup aꞌ, xa chi.
25 Palta, ¿tom malaj bꞌaj ix abꞌi to a in ton Jehová in? Vuuj tzꞌelcꞌoch juntzan̈ tic. Atax dꞌa pecaꞌ ix in naꞌa to ol a cꞌulej juntzan̈ tic. A ticnaic jun, van yelcꞌoch vuuj, yuj chiꞌ syal a satanel juntzan̈ nación te ay yip ix qꞌuecan bꞌulan scꞌajil uuj.
26 Man̈xalaj yip ebꞌ anima cajan dꞌa juntzan̈ nación chiꞌ, ix te xiv ebꞌ, ix qꞌuixvi ebꞌ. Lajan ix aj ebꞌ icha an̈ itaj yaax, mato icha an̈ an̈cꞌultac sqꞌuibꞌqꞌue dꞌa yibꞌan̈tac pat, cotacto an̈ stacjiel an̈, icha chiꞌ yaj ebꞌ anima chiꞌ.
27 Vojtac masanil tas tza cꞌulej yedꞌ tas nabꞌil uuj tzach eqꞌui. Vojtacpaxi to te aycot oval dꞌayin.
28 Toxo ix vabꞌi to aycot oval dꞌayin, tzicꞌanchaan̈ a bꞌa. Yuj chiꞌ ol vacꞌoch jun qꞌuen argolla dꞌa a n̈iꞌ yedꞌ jun freno dꞌa a tiꞌ, ol ach vacꞌan meltzaj dꞌa bꞌe bꞌaj ix ach coti, xchi Jehová dꞌa vin̈ sreyal Asiria chiꞌ, xchi vin̈aj Isaías chiꞌ.
29 Ix yalanpax vin̈aj Isaías dꞌa vin̈aj rey Ezequías chiꞌ: A jun tic yechel ol chꞌoxjoc eyilaꞌ yuj tastac toto ol ujoc: Ol e va ixim trigo munil syavej sbꞌa dꞌa jun abꞌil tic yedꞌ dꞌa junxo abꞌil sjavi. Man̈oc exlaj ol yavej ixim. Axo val dꞌa yoxil abꞌil jun, a exxo ol eyavej ixim e trigo chiꞌ, ol e jochanqꞌue vaan. Ol eyavejpax eyuva, ol e loan sat.
30 A jayvan̈ocxo ex ol ex can dꞌa Judá, lajan ol ex ajcan icha junoc te teꞌ sbꞌat schꞌan̈al yibꞌ dꞌa yol luum syacꞌan sat.
31 Axo dꞌa Jerusalén, ayto mach ol can dꞌay. Yedꞌ pax dꞌa tzalan Sion, man̈ ol satel-laj anima smasanil.
A jun tic, ol scꞌulej Jehová Yajal dꞌa Smasanil yujto te xajan ex yuuj.
32 Yuj chiꞌ syal Jehová dꞌa yibꞌan̈ vin̈ sreyal Asiria icha tic:
Man̈ ol ochlaj vin̈ dꞌa yol chon̈abꞌ Jerusalén, malaj val junoc sjul-labꞌ vin̈ ol yacꞌlej sjulancoti. Man̈ ol javoclaj vin̈ yacꞌ oval dꞌa Jerusalén tic, man̈ ol sbꞌoqꞌuelaj stecꞌnubꞌ vin̈ dꞌa spatictac smuroal chon̈abꞌ tic.
33 A in Jehová in tic svalaꞌ to a dꞌa bꞌe bꞌaj ix javi vin̈, an̈ejaꞌ taꞌ ol meltzajpax vin̈. Man̈ val jabꞌoc ol yal yoch vin̈ dꞌa yol chon̈abꞌ tic.
34 A in ol in tan̈vej jun chon̈abꞌ tic, yujto xajan vin̈ in checabꞌ aj David vuuj, yuj pax in bꞌinaji, xchi Jehová, xchi vin̈aj Isaías chiꞌ.
35 A dꞌa jun acꞌval chiꞌ, ix ecꞌ jun yángel Jehová smilcham 185 mil ebꞌ soldado asirio dꞌa scampamento ebꞌ, yuj chiꞌ chamnacxo ebꞌ ix sacbꞌi dꞌa junxo cꞌu. 36 Icha chiꞌ ix aj yicꞌanel scampamento vin̈aj Senaquerib chiꞌ taꞌ, ix paxcan vin̈ dꞌa Nínive. 37 A dꞌa jun cꞌu ayic ayoch vin̈ ejmelal dꞌa sdiosal scuch Nisroc dꞌa yol stemplo, ix tecjicham vin̈ yuj ebꞌ vin̈ yuninal taꞌ, aton vin̈aj Adramelec yedꞌ vin̈aj Sarezer. Ix lajvi chiꞌ ix bꞌatcan ebꞌ vin̈ elelal dꞌa yol yic Ararat, axo junxo yuninal vin̈ scuchan Esarhadón ix ochcan reyal sqꞌuexuloc.