Ix colji Judá dꞌa yol scꞌabꞌ ebꞌ aj Asiria
37
Ayic ix yabꞌan juntzan̈ lolonel chiꞌ vin̈aj rey Ezequías chiꞌ, ix sn̈icꞌchitanbꞌat spichul vin̈. Ix yacꞌanoch pichul vin̈ yic cuscꞌolal, ix bꞌat vin̈ dꞌa stemplo Jehová. 2 Ix checjicot vin̈aj Eliaquim chiꞌ, vin̈aj Sebna chiꞌ yedꞌ ebꞌ sacerdote te icham vinacxo yuj vin̈aj Ezequías chiꞌ, ayoch pichul ya sva yuj ebꞌ, ix cot ebꞌ dꞌayin schecabꞌ in Jehová, a inton Isaías in tic. 3 Ix ul yalan ebꞌ tas ix yal vin̈aj Ezequías chiꞌ dꞌa ebꞌ, ix yalan ebꞌ dꞌayin icha tic: A ticnaic, ayon̈ och dꞌa cuscꞌolal, dꞌa syaelal yedꞌ dꞌa qꞌuixvelcꞌolal. Icha val junoc ix ix van yalji yuneꞌ, tzꞌel yip ix, icha chiꞌ caji. 4 Comonoc val ix yabꞌ Jehová co Diosal, juntzan̈ lolonel ix yal jun vin̈ yajalil ebꞌ soldado ix scheccot vin̈ sreyal Asiria chiꞌ, yic tzul bꞌuchvaj vin̈ dꞌa co Diosal pitzann̈ej. Comonoc val sjavi yaelal dꞌa yibꞌan̈ vin̈ yuj Jehová co Diosal, yuj tas ix yal vin̈ chiꞌ. A ticnaic lesalvan̈ cuj a on̈ ixto on̈ can tic, xchi ebꞌ checabꞌ chiꞌ.5 Ayic ix vabꞌan tas ix yal ebꞌ schecabꞌ vin̈ rey chiꞌ, 6 ix valan dꞌa ebꞌ to sbꞌat yal ebꞌ dꞌa vin̈ rey chiꞌ tas ix aj yalan Jehová. Ix valan icha tic: Man̈ ach xiv dꞌa juntzan̈ bꞌuchval lolonel ix ul yal vin̈ schecabꞌ vin̈ sreyal Asiria chiꞌ dꞌayin. 7 A in ol vacꞌbꞌat junoc comon abꞌix dꞌa scal ebꞌ. Ayic ol yabꞌan jun abꞌix jun vin̈ rey chiꞌ, ol meltzaj vin̈ dꞌa schon̈abꞌ yedꞌ masanil soldado. A dꞌa schon̈abꞌ vin̈ chiꞌ ol vacꞌ miljocchamoc, xchi Jehová, xin chi.
8 Axo ix yabꞌan jun vin̈ yajalil ebꞌ soldado chiꞌ to a vin̈ sreyal Asiria chiꞌ toxo ix el vin̈ dꞌa chon̈abꞌ Laquis, yuj chiꞌ ix meltzaj vin̈, ix bꞌat vin̈ dꞌa vin̈ sreyal Asiria chiꞌ ayic van yacꞌan oval vin̈ dꞌa chon̈abꞌ Libna. 9 Ataꞌ ix yabꞌ vin̈ rey chiꞌ to a vin̈aj Tirhaca sreyal Etiopía van scot yedꞌ jantac soldado yacꞌ oval yedꞌ vin̈. Yuj chiꞌ ix stzꞌibꞌancot schecnabꞌil vin̈ rey chiꞌ dꞌa vin̈aj Ezequías chiꞌ, syalan icha tic: 10 A a Diosal tzacꞌoch yipoc a cꞌol chiꞌ, aꞌ ol ach colan dꞌa yol in cꞌabꞌ a naani, palta man̈ a cha ach yacꞌ musansatil. 11 Ix abꞌi tas ix cutej co satanel juntzan̈ ebꞌ rey yedꞌ schon̈abꞌ a on̈ sreyal on̈ Asiria tic. ¿Tom a achto val ol ach colchajcanoc? 12 ¿Tocval ix colchaj ebꞌ anima yuj sdiosal dꞌa yol scꞌabꞌ ebꞌ in mam vicham? Nacot tas ajnac chon̈abꞌ Gozán, Harán, Resef yedꞌ ebꞌ aj Edén, aton ebꞌ cajan dꞌa Telasar. 13 Nacot tas utajnacpax vin̈ sreyal Hamat, Arfad, Sefarvaim, Hena yedꞌ Iva. Icha chiꞌ ix yutej vin̈ rey chiꞌ stzꞌibꞌancot schecnabꞌil.
14 Ix schaanecꞌ jun tas ix stzꞌibꞌejcot vin̈ rey chiꞌ vin̈aj rey Ezequías chiꞌ, ix yavtan vin̈. Ix lajvi chiꞌ ix bꞌat vin̈ dꞌa templo, ix bꞌat yacꞌanoch lechan vin̈ dꞌa yichan̈ Jehová, 15 ix lesalvi vin̈ icha tic: 16 Mamin Jehová co Diosal, Yajal ach dꞌa Smasanil, a dꞌa snan̈al ebꞌ querubín ayach eqꞌui. A achn̈ej Dios ach dꞌa masanil yolyibꞌan̈qꞌuinal tic. A ach a bꞌonac satchaan̈ yedꞌ sat luum tic. 17 Mamin, comonoc tza maclej val abꞌi. Ina val juntzan̈ lolonel ix stzꞌibꞌejcot vin̈aj Senaquerib tic dꞌayin, aton juntzan̈ bꞌuchval lolonel ix yal vin̈ tic dꞌa a patic, ach Dios to pitzan achn̈ej. 18 Yelton val Mamin Jehová, a ebꞌ vin̈ sreyal Asiria chiꞌ ix satanel juntzan̈ chon̈abꞌ chiꞌ, ix yixtancanbꞌat slum ebꞌ vin̈. 19 Ix sn̈usantzꞌa masanil sdiosal ebꞌ vin̈, yujto a juntzan̈ chiꞌ, val yel man̈ diosoc, yujto bꞌobꞌil yuj anima, nabꞌa plata, ma teꞌ, ma qꞌueen. Yuj chiꞌ ix yal satanel ebꞌ vin̈. 20 A ticnaic jun Mamin Jehová co Diosal, colon̈el dꞌa yol scꞌabꞌ jun vin̈ rey chiꞌ, yic syojtaquejel masanil nación to a achn̈ej Dios ach, xchi vin̈aj Ezequías chiꞌ.
21 Ix lajvi chiꞌ, ix in checan a in Isaías in tic bꞌat alchaj dꞌa vin̈aj Ezequías chiꞌ icha tic: Icha val tic yalan Jehová co Diosal a on̈ israel on̈ tic: Toxo ix vabꞌ a lesal ix al dꞌayin yuj vin̈aj Senaquerib sreyal Asiria, xchi.
22 Yuj chiꞌ ix yalan juntzan̈ lolonel tic Jehová dꞌa yibꞌan̈ vin̈ sreyal Asiria chiꞌ:
Ach Senaquerib, a ebꞌ ix cobꞌestac aj Sion, ton̈ej tzach stzetzej ebꞌ ix. A ebꞌ aj Jerusalén, ton̈ej ol bꞌat miquiljoc ebꞌ ach sbꞌuchani ayic elelalxon̈ej ol ach meltzajoc.
23 ¿Mach jun bꞌaj ix a comon tecꞌbꞌej a bꞌa a bꞌuchani? ¿Mach jun bꞌaj ix comon qꞌue val a jaj ix icꞌanchaan̈ a bꞌa dꞌay? Aton val dꞌayin a in sDiosal in Israel to A inxon̈ej Ochi.
24 Ix a checanpaxcot ebꞌ a checabꞌ yic tzicꞌan val chaan̈ a bꞌa, ix ul yalan ebꞌ dꞌayin icha tic: Yedꞌ val jantac in carruaje yic oval in qꞌuecꞌoch dꞌa sjolom lum vitz te chaan̈ dꞌa yol yic Líbano. Ix in chꞌaquem teꞌ cꞌuteꞌ chaan̈ steel yedꞌ teꞌ taj te vachꞌ yilji. Ix in qꞌuecꞌoch dꞌa lum jolomtac vitz te chaan̈ bꞌaj cꞌayum te teꞌ.
25 Yaln̈ej bꞌaj syal in joyan aꞌ ucꞌbꞌilaꞌ vuqꞌuej. Syal vecꞌn̈ej dꞌa a aꞌ dꞌa Egipto, ichato tupnac aꞌ, malaj mach syal in syamanoch vaan, xa chi ix icꞌan val chaan̈ a bꞌa.
26 ¿Tom man̈ ojtacoc to a in Jehová in svaqꞌuelcꞌoch masanil juntzan̈ chiꞌ? Atax dꞌa pecaꞌ nabꞌil vuuj to ol ujoc juntzan̈ chiꞌ, axo ticnaic svaqꞌuelcꞌochi. Yuj chiꞌ ix yal a satanel juntzan̈ chon̈abꞌ vachꞌ yajoch smuroal, toxon̈ej ix qꞌuecan bꞌulan scꞌajil uuj.
27 A ebꞌ cajan dꞌa juntzan̈ chon̈abꞌ chiꞌ, ix te xivcanqꞌue ebꞌ, ix qꞌuixvicanqꞌue ebꞌ. Lajan ix ajcan ebꞌ icha an̈ an̈cꞌultac yax latzꞌinac, ma icha an̈ an̈cꞌultac sqꞌuibꞌqꞌue dꞌa yibꞌan̈tac pat, stacji yuj icꞌ scot bꞌaj sjavi cꞌu.
28 Vojtacn̈ej bꞌajtac tzach eqꞌui yedꞌ tastac tza cꞌulej. Vojtac to ix cot val oval dꞌayin.
29 Vojtac jantac oval, jantac val acꞌumtaquil, yuj chiꞌ ol vacꞌoch jun qꞌuen argolla dꞌa a n̈iꞌ yedꞌ jun freno dꞌa a tiꞌ, ol ach vacꞌan meltzaj dꞌa bꞌe bꞌaj ach coti, xchi Jehová.
30 Axo dꞌayach ach Ezequías, ay jun yechel ol schꞌox Jehová eyilaꞌ. A dꞌa jun abꞌil tic yedꞌ dꞌa junxo, ol e va sat ixim trigo munil ol pacꞌqꞌue schꞌocoj. Axo dꞌa yoxil abꞌil, a exxo ol eyavej eyicoꞌ, ol e molan sat tas ol eyavej chiꞌ. Ol eyavej teꞌ uva, ol e loan sat teꞌ.
31 A jayvan̈ ex ixto ex can dꞌa Judá tic, lajan ol ex aj icha junoc te teꞌ tzꞌavchaji sbꞌat schꞌan̈al yibꞌ, elan̈chamel satani.
32 A exxo jayvan̈ ex ixto ex can dꞌa Jerusalén, dꞌa tzalan Sion tic, a ex ol eyacꞌxi bꞌudꞌjoquel co chon̈abꞌ tic. Icha chiꞌ ol ajoc yujto xajan on̈ yuj Jehová Yajal dꞌa Smasanil.
33 Axo pax yuj vin̈ sreyal Asiria jun, ix yal Jehová icha tic: Man̈ ol och vin̈ dꞌa Jerusalén tic, malaj junoc yol sjul-labꞌ vin̈ ol sjuleli. Man̈ ol och vin̈ yacꞌ oval dꞌay yedꞌ maclabꞌ jul-labꞌ. Man̈ ol sbꞌoqꞌue stecꞌnubꞌ vin̈ dꞌa spatictac smuroal chon̈abꞌ tic.
34 A in val Jehová in svalaꞌ, a dꞌa bꞌe bꞌaj ol cot vin̈, an̈ejaꞌ taꞌ ol meltzaj vin̈. Man̈ ol yal yoch vin̈ dꞌa yol chon̈abꞌ tic.
35 Ol in tan̈vej jun chon̈abꞌ tic, ol in colani, yujto tzin xajanej vin̈ in checabꞌ aj David yedꞌ pax snivanil Velcꞌochi, xchi Jehová, xin chi.
36 A Yángel Jehová ix cꞌoch dꞌa scampamento ebꞌ aj Asiria chiꞌ, ix smilancham 185 mil ebꞌ soldado. Chamnacxo ebꞌ ix qꞌuin̈ibꞌi dꞌa junxo cꞌu. 37 Yuj chiꞌ, ix yiqꞌuel scampamento vin̈aj Senaquerib sreyal Asiria chiꞌ, ix pax vin̈ dꞌa chon̈abꞌ Nínive. 38 Ay jun cꞌu ayic van slesalvi vin̈ dꞌa stemplo sdiosal scuch Nisroc, axo ebꞌ vin̈ yuninal vin̈, aton vin̈aj Adramelec yedꞌ vin̈aj Sarezer, ix bꞌat milancham vin̈ taꞌ. Ix lajvi chiꞌ ix bꞌat ebꞌ vin̈ elelal dꞌa yol yic Ararat. Axo vin̈aj Esar-hadón, junxo yuninal vin̈ ix ochcan reyal sqꞌuexuloc.