Ix penaax ay vin̈aj Ezequías
38
A dꞌa jun tiempoal chiꞌ, te ov jun yaelal ix och dꞌa vin̈aj Ezequías, vanxo scham vin̈. A inxo Isaías in schecabꞌ Dios yuninal in vin̈aj Amoz, ix in cꞌoch dꞌa vin̈, ix valan dꞌa vin̈ icha tic:—Icha tic yalan Jehová: Alcani tas ol ajcan tastac ay dꞌayach, yujto ol ach chamxon̈ej, man̈xo ol ach bꞌoxoc, xin chi dꞌa vin̈.
2 Ix meltzajoch qꞌuelan vin̈ dꞌa sat spat, ix lesalvi vin̈ dꞌa Jehová icha tic:
3 Tzin tevi dꞌayach Mamin Jehová, nacoti tas ix vutej ach vacꞌan servil dꞌa smasanil in cꞌool, ix in cꞌulejn̈ej tas ix scha a cꞌool, xchi vin̈. Ix te ocꞌ val vin̈ sicꞌlabꞌil.
4 Ix yalanxi Jehová dꞌayin 5 to sbꞌat valxi dꞌa vin̈aj Ezequías chiꞌ icha tic: A Jehová sDiosal vin̈ a mam icham aj David, a tzꞌalan icha tic: Ix vabꞌ a lesal, ix vilanpax oqꞌui, yuj chiꞌ ol vacꞌ 15 abꞌilocxo a qꞌuinal. 6 Ol ach in col yedꞌ chon̈abꞌ Jerusalén tic dꞌa yol scꞌabꞌ vin̈ sreyal Asiria. Ol in tan̈vej jun chon̈abꞌ tic, xchi Jehová, xin chi. 7 Ix in tacꞌvi icha tic:
—A jun yechel ol schꞌox Jehová chiꞌ to yel ol elcꞌoch tas ix yalaꞌ: 8 A juntzan̈ bꞌachquiltac schꞌoxan jantac yecꞌ cꞌu yic vin̈aj Acaz, ol yacꞌxi meltzaj Jehová lajun̈eoc bꞌachquiltac bꞌaj toxo ix emcꞌoch veven, xin chi. Yuj chiꞌ ix schael yich yemxi lajun̈eꞌ bꞌachquiltac veven chiꞌ.
9 Ayic toxo ix bꞌoxi scꞌol vin̈aj Ezequías sreyal Judá chiꞌ, ix sbꞌoan jun bꞌit tic vin̈:
10 A in naani to tecꞌan into ol in chamoc. Yujto ix alchaj dꞌayin to ayinxooch dꞌa yol scꞌabꞌ chamel. A in naani to man̈xo ol vil jayeocxo abꞌil.
11 Mamin Jehová, ix in naꞌ to man̈xo ol ach vil dꞌa sat lum tic. Man̈xo ol vilpax junoc ebꞌ cajan dꞌa yolyibꞌan̈qꞌuinal tic valani,
12 yujto a in qꞌuinal ijan ix sateli, icha tzꞌaj sjuanem smantiado ebꞌ tan̈vum calnel. A in qꞌuinal tic, lajan icha tzꞌaj spoljielta cꞌapac cꞌapac bꞌaj sbꞌoi. Dꞌa cꞌual dꞌacꞌval ix vabꞌ syail uuj.
13 Ix el val vav yuj syail tzꞌecꞌ acꞌval, ichato a junoc nocꞌ choj scachꞌan vecchaj in bꞌaquil. Dꞌa cꞌual dꞌacꞌval ix vabꞌn̈ej syail uuj.
14 Cꞌunxon̈ej yel vav icha nocꞌ san̈capech, ix in cꞌacvi icha nocꞌ paramuch. Ix in tzactzaj in tan̈van a pactzitan dꞌayin. Mamin Jehová, tzin ixtax val svabꞌi, tacꞌvan̈ dꞌayin.
15 Axo ticnaic, ¿tas vachꞌ valan dꞌayach? Yujto ix acꞌ a tiꞌ to tzin acꞌ bꞌoxoc, icha chiꞌ ix in utej. Emnaquilal vecꞌ ticnaic yuj in yaelal ix ecꞌ tic.
16 Mamin, yujn̈ej tas tza cꞌulej, ay sqꞌuinal ebꞌ anima, ay pax in qꞌuinal yedꞌ ebꞌ.
A ach ix acꞌ bꞌoxoc in cꞌool, ix acꞌanxi in qꞌuinal.
17 Ayic ix javi jun yaelal tic dꞌa vibꞌan̈, ix in te cusi, axo ticnaic, juncꞌolal vaji. Ix el dꞌa a cꞌol ix in a colcanel dꞌa yol scꞌabꞌ chamel, yujto ix bꞌatcan in mul satcꞌolal uuj, ichato ix acꞌcanbꞌat dꞌa a patic.
18 A ebꞌ ayxoecꞌ dꞌa campusante, maxtzac yal yalan vachꞌ lolonel ebꞌ dꞌayach. A ebꞌ chamnac chiꞌ, ¿tom ol ach yicꞌchaan̈ ebꞌ? A mach toxo ix emcan dꞌa yol luum, ¿tom olto yal stan̈van ebꞌ acꞌanelcꞌoch tas ix al dꞌa ebꞌ?
19 An̈ej ebꞌ pitzan syal yalan vachꞌ lolonel dꞌayach, icha tzꞌaj valan dꞌayach ticnaic. A ebꞌ mamabꞌil nunabꞌil, a ebꞌ tzꞌalan dꞌa ebꞌ yalyuninal to tzaqꞌuelcꞌoch tas tzalaꞌ.
20 A Jehová co Columal yaji, yuj chiꞌ yacbꞌan pitzan on̈, con̈ bꞌitanec dꞌa stemplo yedꞌ yamcꞌabꞌ yic bꞌit, xchi vin̈aj Ezequías chiꞌ.
21 Ix in checan bꞌojoc sat teꞌ higo, yic tzꞌacꞌchajoch teꞌ dꞌa sat jun yabꞌil chiꞌ, yic sbꞌoxi scꞌool vin̈ yuuj. 22 Ix lajvi chiꞌ, ix scꞌanbꞌan vin̈aj Ezequías chiꞌ dꞌayin icha tic:
—¿Tas junoc yechel ol vilaꞌ yic ol nachajel vuj to a Jehová ol acꞌan bꞌoxoc in cꞌool, yic syal in bꞌat dꞌa stemplo? xchi vin̈.*