—Alec juntzan̈ lolonel tic dꞌa vin̈aj Ezequías, to a vin̈ sreyal Asiria ecꞌbꞌal te nivan yelcꞌochi, a vin̈ tzꞌalan icha tic: ¿Tas ayoch yipoc a cꞌool? 5 ¿Tom tza naꞌ to yujn̈ej lolonel vachꞌ yalji, sbꞌat ebꞌ in soldado jelan yacꞌan oval elelal tza naꞌa? ¿Mach tzacꞌoch yipoc a cꞌool, yuj chiꞌ te vinac tzutej a bꞌa dꞌa vichan̈? 6 A svilani to a Egipto tzacꞌoch yipoc a cꞌool. Ichocabꞌ taꞌ, palta a Egipto chiꞌ, lajan val icha junoc teꞌ aj can̈chajnac, ayic tzon̈ och yubꞌnaj dꞌa sn̈iꞌ teꞌ, sbꞌat tzꞌisnaj teꞌ dꞌa co cꞌabꞌ. Icha chiꞌ yaj vin̈ sreyal Egipto chiꞌ dꞌa mach tzꞌacꞌanoch vin̈ yipoc scꞌool. 7 Ach Ezequías, tecan tzal icha tic: A on̈ tic a Jehová co Diosal scacꞌoch yipoc co cꞌool. Palta ina toxo ix a chec satjiel juntzan̈ altar bꞌaj chaan̈, bꞌaj tzꞌoch ebꞌ anima ejmelal dꞌa jun e Diosal chiꞌ. Ix alani to junxon̈ej altar bꞌaj tzꞌoch ebꞌ aj Judá yedꞌ ebꞌ aj Jerusalén ejmelal. 8 A ticnaic bꞌo junoc a trato yedꞌ vin̈ vajalil, aton vin̈ sreyal Asiria. Syal vin̈ dꞌayach icha tic: Ol vacꞌ chabꞌoc mil nocꞌ chej dꞌayach, tato tzꞌilchaj ebꞌ soldado sqꞌue dꞌa yibꞌan̈ nocꞌ uuj. ¿Tom ol yal uuj? 9 Tato icha chiꞌ, ¿tom ol tzacꞌvan eyacꞌan oval yedꞌ jun n̈ilan̈ ebꞌ co soldado aj Asiria vanto scꞌayi, vachꞌchom tze comon aqꞌuejoch ebꞌ aj Egipto yedꞌ scarruaje yipoc e cꞌool? 10 An̈ejtonaꞌ, ¿tom tza naꞌ to tzon̈ comon javi co satel jun chon̈abꞌ tic tato man̈oc Jehová ayoch quedꞌoc? Aton val ix on̈ checancot ul ex co sateli, xchicot vin̈ rey, xchi vin̈ yajalil ebꞌ soldado chiꞌ.

11 Ix tacꞌvi vin̈aj Eliaquim, vin̈aj Sebna yedꞌ vin̈aj Joa dꞌa jun vin̈ yajalil ebꞌ soldado chiꞌ icha tic:

—Sco cꞌan dꞌayach to a dꞌa tiꞌ arameo tzach loloni, yujto scabꞌpax a on̈ tic. Man̈ al dꞌa tiꞌ hebreo yic max yabꞌ masanil ebꞌ anima ayqꞌue dꞌa yibꞌan̈ smuroal chon̈abꞌ tic, xchi ebꞌ vin̈.

12 Palta ix yalan vin̈ yajalil ebꞌ soldado chiꞌ icha tic:

—Man̈ocn̈ej dꞌa vin̈ eyajalil yedꞌ dꞌayex ix in checjicot yuj vin̈ sreyal Asiria val jun tic, palta ix in checjicot ul val dꞌa masanil anima ayqꞌue dꞌa yibꞌan̈tac smuroal chon̈abꞌ tic, ajun pax ebꞌ ol abꞌan syail eyedꞌoc, yujto ol e lo e tzaꞌ, ol eyucꞌanpax e chul, xchi vin̈.

13 Yuj chiꞌ ix qꞌue lin̈an vin̈ yajal chiꞌ, ix avaj chaan̈ vin̈, ix yalan vin̈ dꞌa tiꞌ hebreo:

—Abꞌec val tas syal vin̈ rey ecꞌbꞌal te nivan yelcꞌochi, aton vin̈ sreyal Asiria: 14 Man̈ eyacꞌ e bꞌa acꞌjoc musansatil yuj vin̈aj Ezequías chiꞌ, yujto man̈ ol yal ex scolan vin̈ dꞌa yol in cꞌabꞌ, xchi vin̈ rey chiꞌ. 15 Tato syal vin̈aj Ezequías chiꞌ to an̈ej Jehová tzeyacꞌoch yipoc e cꞌool, syalan vin̈ dꞌayex icha tic: Val yel ol on̈ scol Jehová co Diosal, man̈ ol scha acꞌjoc ganar co chon̈abꞌ tic yuj vin̈ sreyal Asiria, tato xchi vin̈, 16 man̈ e cha eyabꞌ dꞌa vin̈. Yujto a vin̈ sreyal Asiria chiꞌ ix in checancot val dꞌayex to tzex och dꞌa juncꞌolal yedꞌ vin̈, tzeyacꞌanoch e bꞌa dꞌa yol scꞌabꞌ vin̈ yic vachꞌ ol e lo sat teꞌ eyuva yedꞌ sat teꞌ higo, ol eyucꞌanpax a aꞌ eyictaxoni, 17 masanto ol ex yicꞌbꞌat vin̈ dꞌa jun lum luum icha val lum eyic tic, syacꞌ ixim trigo yedꞌ teꞌ uva dꞌa luum. Ol e bꞌo ixim pan, ol e bꞌoanpax vino. 18 Tato syal vin̈aj Ezequías chiꞌ to a Jehová ol ex colanoc, man̈ eyacꞌ e bꞌa smusej e sat vin̈. ¿Tocval ay junoc sdiosal juntzan̈xo chon̈abꞌ ix yal scolan schon̈abꞌ dꞌa yol scꞌabꞌ vin̈ sreyal Asiria chiꞌ? 19 ¿Bꞌajtil ix cꞌochcan sdiosal chon̈abꞌ Hamat yedꞌ chon̈abꞌ Arfad? ¿Bꞌajtil ix cꞌochcan sdiosal chon̈abꞌ Sefarvaim? ¿Tocval ay junoc dios ix colan Samaria dꞌa yol scꞌabꞌ vin̈ rey chiꞌ? 20 ¿Mach junoc sdiosal juntzan̈ chon̈abꞌ chiꞌ ix yal scolan schon̈abꞌ dꞌa yol scꞌabꞌ vin̈? ¿Tas yuj tze naꞌ to a Jehová ol colanel Jerusalén tic dꞌa yol scꞌabꞌ vin̈? xchi vin̈ yajalil ebꞌ soldado chiꞌ.

21 Numanxon̈ej ix ajcan ebꞌ anima chi, malaj junoc ebꞌ ix alan junoc bꞌelan̈ lolonel, yujto ix yal vin̈aj Ezequías chiꞌ to malaj junoc ebꞌ stacꞌvi. 22 Yuj chiꞌ a vin̈aj Eliaquim, vin̈aj Sebna yedꞌ vin̈aj Joa chiꞌ, ix sn̈icꞌchitejbꞌat spichul ebꞌ vin̈, ix bꞌat ebꞌ vin̈ yal dꞌa vin̈aj Ezequías masanil tas ix yal vin̈ yajalil ebꞌ soldado aj Asiria chiꞌ.