2 Pacꞌocabꞌ an̈ xumac icha an̈ chochol, tzalajcꞌolalocabꞌ yilji sat luum. A Dios ol acꞌan svachꞌil yilji sat lum icha lum Líbano, ol yaxbꞌoc sat lum icha lum vitzal Carmelo, ma icha lum acꞌlic yic Sarón. Ol yil ebꞌ anima smasanil to nivan yelcꞌoch Jehová co Diosal yedꞌ yipalil.

3 Aqꞌuec stecꞌanil ebꞌ malaj yip. Iptzitejec ebꞌ cꞌunbꞌinac.

4 Alec icha tic dꞌa ebꞌ chabꞌcꞌolal yaji: Tecꞌbꞌejec e bꞌa, man̈ ex xivoc, ol javoc co Diosal on̈ scoloꞌ. Ol yacꞌanoch syaelal ebꞌ ayoch ajcꞌolal dꞌayon̈ icha val smojal, xe chi.

5 Ichato chiꞌ bꞌian, a ebꞌ max uji yilani ol yil ebꞌ, axo ebꞌ max abꞌani ol yabꞌ ebꞌ.

6 Axo ebꞌ tzꞌem sbꞌeyi ol qꞌue tzꞌitnaj ebꞌ sbꞌeyi, icha nocꞌ cꞌultaquil chej. Axo ebꞌ max loloni ol avaj chaan̈ ebꞌ yuj tzalajcꞌolal. A dꞌa lum taquin̈ luum yedꞌ dꞌa lum taquin̈ sat ol qꞌueul chulnaj sjaj aꞌ nivac aꞌ sbꞌeyi.

7 A dꞌa lum taquin̈ luum, ol aj aꞌ nivac n̈ajabꞌ. A dꞌa lum taquin̈ val sat yalxon̈ej bꞌaj ol laj qꞌueul sjaj aꞌ. A bꞌaj cajanecꞌ nocꞌ oques ticnaic, ataꞌ ol qꞌuibꞌqꞌue teꞌ velecꞌ yedꞌ teꞌ aj.

8 Ataꞌ ol ecꞌ jun nivan bꞌe. A jun bꞌe chiꞌ ol scuchcan Sbꞌe Ebꞌ Yicxo Dios. A ebꞌ chuc yedꞌ ebꞌ pitbꞌinac yuj schucal, man̈ ol yal-laj yecꞌ ebꞌ taꞌ.

9 A dꞌa jun bꞌe chiꞌ malaj junoc nocꞌ choj ol ajoc, malaj pax junoc nocꞌ chium nocꞌ ol ajoc. Ataꞌ ol ecꞌ ebꞌ colbꞌilxo yuj Jehová.