A Jehová ol acꞌanoch syaelal Edom
34
Ex junjun chon̈abꞌ, nitzeccot e bꞌa tze maclan eyabꞌ tas ol aljoc. Yabꞌocabꞌ pax yolyibꞌan̈qꞌuinal tic yedꞌ masanil tas ay dꞌay.2 A Jehová, te aycot yoval dꞌa masanil nación yedꞌ dꞌa yibꞌan̈ ebꞌ soldado. Toxo ix sna Jehová chiꞌ to ol cham ebꞌ, ol satanel ebꞌ smasanil.
3 Ol actajcan bꞌulan ebꞌ chamnac chiꞌ, ol te qꞌue sjabꞌ juntzan̈ snivanil ebꞌ chiꞌ. Ol chꞌayxoquel jolomtac vitz yuj schiqꞌuil ebꞌ.
4 Masanil qꞌuen cꞌanal ol tzicubꞌtan̈ajoc, axo satchaan̈ ol chuljoc bꞌecꞌan. Masanil qꞌuen cꞌanal, ol cot tan̈aljoc qꞌueen, icha tzꞌaj scot xil teꞌ uva, ma teꞌ higo ayic stacji.
5 Ayic ol lajvoc scꞌanan yespada Jehová dꞌa satchaan̈, ol yacꞌanpaxem dꞌa yibꞌan̈ Edom, jun chon̈abꞌ toxo ix och chamel dꞌa yibꞌan̈ yuuj.
6 Ichato ol och chicꞌ yedꞌ xepuꞌ dꞌa yespada Jehová, icha tzꞌaj qꞌueen ayic smiljicham nocꞌ calnel yedꞌ nocꞌ chiva tzꞌacꞌji silabꞌil. Ol sbꞌo jun silabꞌ Jehová dꞌa Bosra, te nivan ebꞌ aj Edom chiꞌ ol chamoc.
7 Ol telvoc ebꞌ icha stelvi nocꞌ cꞌultaquil vacax, ma nocꞌ quelemtac vacax, ma nocꞌ mam vacax. Ol chꞌayxoquel sat slum ebꞌ yuj schiqꞌuil, axo xepual ebꞌ ol bꞌatcan dꞌa cal pococ.
8 Aton val dꞌa jun cꞌu chiꞌ ol yacꞌ spac Jehová, aton val dꞌa jun abꞌil chiꞌ ol yicꞌcanel yoval scꞌool yuj tas ix utaj chon̈abꞌ Sion yuj ebꞌ.
9 A bꞌaj sbꞌeytaxon a aꞌ dꞌa Edom chiꞌ, aꞌ asfalto ol bꞌeyoc, axo masanil lum pococ ol ochcan lum azufreal, axo lum sat luum ol scha scꞌacꞌal lum yuj asfalto chiꞌ.
10 Cꞌual dꞌacꞌval ol qꞌue n̈iln̈on scꞌacꞌal luum, ol qꞌuen̈ej stabꞌil luum dꞌa masanil tiempo. Ol actajcan lum dꞌa juneln̈ej, man̈xa bꞌaqꞌuin̈ ay mach ol ecꞌ taꞌ.
11 Ataꞌ ol aj nocꞌ xochꞌ yedꞌ nocꞌ cujubꞌ. Ataꞌ ol sbꞌo soꞌ nocꞌ joj yedꞌ nocꞌ tonton. Cuseltac ol ajcan jun chon̈abꞌ chiꞌ yuj Jehová.
12 Man̈xa bꞌaqꞌuin̈ ol och junocxo rey yic syacꞌ yajalil dꞌay. Masanil ebꞌ yajal ol satel ebꞌ.
13 Axon̈ej teꞌ qꞌuiix ol qꞌuibꞌqꞌue dꞌa spalacio ebꞌ, axo dꞌa yedꞌtal ebꞌ soldado, a teꞌ sac qꞌuiix ol qꞌuibꞌcanqꞌueoc. Axon̈ej nocꞌ oques ol aj taꞌ yedꞌ nocꞌ avestruz.
14 Ataꞌ junn̈ej ol aj nocꞌ vaax yedꞌ nocꞌ oques, axo nocꞌ cꞌultaquil chiva, ol laj yavtej sbꞌa nocꞌ taꞌ. Ataꞌ ol cajnaj juntzan̈ nocꞌ nocꞌ xibꞌtani, juntzan̈ nocꞌ sjen̈vi dꞌacꞌvalil.
15 Ataꞌ ol sbꞌo soꞌ nocꞌ cujubꞌ, ol em sn̈olobꞌ nocꞌ, ol elta yuneꞌ nocꞌ taꞌ. Ol smolbꞌan sbꞌa nocꞌ yic stan̈vej sbꞌa. Ataꞌ ol smolbꞌejpax sbꞌa nocꞌ chꞌacbꞌa, mojan̈il ol aj nocꞌ, jun nocꞌ smam, jun nocꞌ snun.
16 Sayec eyil bꞌaj tzꞌibꞌabꞌil yuj Jehová. Avtejec bꞌaj syal icha tic: Masanil nocꞌ nocꞌ sbꞌinaj tic, malaj junoc nocꞌ man̈ ol cꞌoch taꞌ. Malaj junoc nocꞌ man̈ ayoc ecꞌ junoc nocꞌ nunabꞌil yedꞌoc, yujto a Jehová alannac to a Yespíritu ol molbꞌan nocꞌ.
17 Junjun nocꞌ, chequel ol aj yedꞌtal nocꞌ. A val Jehová chiꞌ ol chꞌoxancan yedꞌtal junjun nocꞌ bꞌaj ol ajoc. Yicn̈ej nocꞌ ol ajcan dꞌa juneln̈ej, ataꞌ ol cajnaj nocꞌ.