A Jehová ayoch yipoc co cꞌool
33
Obꞌiltac ex, ex satumel anima, ex ixtum anima. Malaj mach tzex sataneli, ma tzex ixtani. Ayic ol lajvoc e satanel ebꞌ, tzeyixtanpax ebꞌ, ol ex satjoqueloc, ol ex ixtajpaxoc.2 Mamin Jehová, ocꞌoc val a cꞌol dꞌayon̈, yipcꞌolal aj cuuj. Ochan̈ quedꞌoc dꞌa junjun cꞌu ayic ay co yaelal, tzon̈ a colani.
3 Ayic syabꞌan ebꞌ anima to scot oval, sbꞌat ebꞌ elelal. Ayic tzach javi on̈ a coloꞌ, sacleminac sbꞌat juntzan̈ chon̈abꞌ elelal.
4 Icha val tzꞌaj satanel avbꞌen nocꞌ cꞌulubꞌ, icha chiꞌ ol aj satjiel sbꞌeyumal ebꞌ cajcꞌool.
5 Mamin Jehová, nivan ton val elcꞌochi, cajan ach dꞌa satchaan̈. A ach ol icꞌbꞌey ebꞌ aj Sion dꞌa vachꞌilal yedꞌ dꞌa stojolal.
6 Ol acꞌ stecꞌanil ebꞌ, sjelanil yedꞌ yaj pensaril ebꞌ. A juntzan̈ chiꞌ ol colan ebꞌ. Axo yic ol ach scꞌanabꞌajan ebꞌ, ichato sbꞌeyumal ebꞌ ol ajoc.
7 Abꞌec val yel yav ebꞌ soldado dꞌa yoltac scalleal e chon̈abꞌ yuj xivelal. Abꞌec val yel yav ebꞌ xidꞌnaquecꞌ scꞌan juncꞌolal.
8 A juntzan̈ bꞌe, ix laj can tzꞌinan, man̈xa mach tzꞌecꞌ dꞌay yuj xivelal. Ix juvibꞌat strato ebꞌ ix yacꞌaꞌ. Ix paticajel ebꞌ ix xidꞌecꞌ sbꞌo trato chiꞌ, man̈xa mach ay yelcꞌochi.
9 Ix cuscanqꞌue lum luum, ix juvicanbꞌat yilji luum. Ix qꞌuixvicanqꞌue lum Líbano, yujto ix chꞌacjiel steꞌal luum. Axo lum pan̈an yic Sarón, ix ochcan lum tzꞌinan lumal, axo lum Basán yedꞌ lum vitzal Carmelo, ix can san̈an luum.
10 Yuj chiꞌ syal Jehová icha tic: A ticnaic jun, ol in qꞌue vaan, ol in chꞌoxaneli to te nivan in poder.
11 A tas nabꞌil eyuuj yedꞌ tas toxo ix e bꞌoꞌo, lajan icha cꞌalem, ma icha an̈ ac. Ol in pubꞌat vicꞌ dꞌay, ol tzꞌabꞌat smasanil.
12 A e chon̈abꞌ, taan̈xon̈ej ol ajcanoc, ol scha scꞌacꞌal icha stzꞌabꞌat teꞌ taquin̈ qꞌuiix.
13 Mach ex najat ayex yedꞌ ex lacꞌan ayex, ilecnabꞌ val tastac ix in cꞌulej, scham val eyojtacanel in poder, xchi Jehová.
14 A ebꞌ chuc sbꞌeybꞌal ay dꞌa Sion, tzꞌibꞌxi ebꞌ yuj xivelal. A ebꞌ malaj yelcꞌoch Dios dꞌay, tzꞌibꞌxi ebꞌ, syalan ebꞌ icha tic: A yoval scꞌol Dios, lajan icha jun cꞌacꞌ man̈xa bꞌaqꞌuin̈ stupi. ¿Tom ayto junoc on̈ ol yal co colchaji? xchi ebꞌ.
15 A ebꞌ ol colchajoc: Aton ebꞌ sbꞌeybꞌalan tojolal, ebꞌ an̈ej yel syalaꞌ, ebꞌ malaj sgana tzꞌoch bꞌeyumal yuj schaan tumin dꞌa elcꞌaltac, ebꞌ max yacꞌoch sbꞌa yuj schamel junoc anima, syicꞌanpaxel sbꞌa ebꞌ dꞌa scal chucal.
16 Aton ebꞌ chiꞌ ol colchajoc, malaj tas ol sna ebꞌ, ichato cajanecꞌ ebꞌ dꞌa junoc chon̈abꞌ vachꞌ yajoch smuroal, ayn̈ej tas ol sva ebꞌ yedꞌ tas ol yuqꞌuej ebꞌ.
17 Ayic ol eyilan jun Rey te ay stziquiquial, ol eyilpaxi to te najat ol cꞌoch smacbꞌen jun nación tic,
18 ol e naancoti tas ajnac e xiv dꞌa yalan̈taxo, ol eyalan icha tic: ¿Tas ix scꞌulej ebꞌ vin̈ chꞌoc nacional scꞌananel qꞌuen tumin dꞌayon̈? ¿Tas ix scꞌulej ebꞌ vin̈ tzꞌechtan qꞌuen tumin chiꞌ? ¿Tas ix scꞌulej ebꞌ vin̈ slaj bꞌisan juntzan̈ yedꞌtal ebꞌ soldado yuj snaan ebꞌ jantac sbꞌeyumal co chon̈abꞌ? xe chama.
19 Man̈xa bꞌaqꞌuin̈ ol eyil ebꞌ acꞌumtac dꞌa e cal, ebꞌ chꞌoc nacional chꞌoc tial syalaꞌ, max eyabꞌ tas syal ebꞌ.
20 Ol eyil chon̈abꞌ Sion, bꞌaj scacꞌtaxonoch qꞌuin̈, aton Jerusalén, jun chon̈abꞌ bꞌaj juncꞌolal ol on̈ ajoc. Man̈xa bꞌaqꞌuin̈ ol qꞌuexmajoc. Icha junoc mantiado scann̈ej, max chocjiqꞌueta yestacail, max dꞌin̈chaj junoc schꞌan̈al, icha chiꞌ ol ajoc.
21 Ataꞌ ol schꞌox sbꞌa Jehová dꞌayon̈ yedꞌ spoder. Tzijtum a aꞌ levan sat ol bꞌey taꞌ, palta man̈ ol yal yoch ebꞌ ajcꞌol yedꞌ snivac barco yacꞌan oval quedꞌoc.
22-23 A schꞌan̈al juntzan̈ barco chiꞌ, man̈ ol tocꞌjoc tzatzbꞌoc dꞌa yoyal, man̈xa bꞌaj ol yacꞌ yip schꞌan̈al scꞌapaquil. Ol pojchajecꞌ tastac ay dꞌa ebꞌ ajcꞌol chiꞌ, ipan ebꞌ tzꞌem sbꞌey ol icꞌan jabꞌoc yicoꞌ, yujto a Jehová ol on̈ colanoc. Aꞌ ol bꞌoanel tas caji, co Reyal pax yaji.
24 Malaj junoc mach cajan dꞌa Jerusalén tic ol alanoc: Penaay in, man̈ xchioc. A ebꞌ cajan dꞌa jun chon̈abꞌ tic, ol icꞌjoquel smul ebꞌ.