A vin̈ rey tojol
32
Ay val jun vin̈ rey ol acꞌan yajalil dꞌa stojolal, ay pax ebꞌ yajal dꞌa yalan̈ smandar vin̈ te vachꞌ ol yutej yacꞌan yajalil.2 Junjun ebꞌ, ichato co columal ol aj ebꞌ dꞌa jun oval icꞌ yedꞌ dꞌa jun oval icꞌ n̈abꞌ. Icha a aꞌ dꞌa lum taquin̈ sat, ma icha yen̈ul junoc qꞌuen nivan tenam dꞌa tzꞌinan luum, icha chiꞌ ol aj ebꞌ.
3 A ebꞌ anima ichato max uji yilani, ol yil ebꞌ. Axo ebꞌ ichato max uji yabꞌani, ol scha yabꞌ ebꞌ.
4 A ebꞌ man̈ chamoc snaan tas syalaꞌ, ol tojolbꞌoc spensar ebꞌ. Axo ebꞌ tzꞌel squeec sloloni, ol bꞌo slolon ebꞌ.
5 A junoc anima amancotan, man̈xo ol alchaj vachꞌil. Axo junoc mach jelan smusan sat ebꞌ anima, man̈xa jabꞌoc ol aj yelcꞌochi.
6 Yujto a ebꞌ anima amancotan chiꞌ, an̈ej pensar malaj yelcꞌoch syal ebꞌ. An̈ej chucal snaꞌ scꞌulej ebꞌ dꞌa spensar chiꞌ, snibꞌej ebꞌ smacꞌvaji, syalan chucal lolonel ebꞌ dꞌa spatic Jehová. Max siej jabꞌoc tas ebꞌ dꞌa ebꞌ tzꞌoch svejel yedꞌ dꞌa ebꞌ ay staquin̈tial.
7 A ebꞌ ixtum anima chiꞌ, syicꞌ yip ebꞌ yuj tas scꞌaybꞌej dꞌa chucal, snaanqꞌue chucal ebꞌ. Tzꞌixtaj ebꞌ mebꞌaꞌ snibꞌej sbꞌo yaj yoval yuj yes ebꞌ.
8 Axo ebꞌ vachꞌ scꞌool elbꞌenn̈ej yuuj, yuj svachꞌil ebꞌ chiꞌ, vachꞌn̈ej tzꞌelcꞌoch ebꞌ.
A scachnabꞌil ebꞌ ix ix
9 A exxo ix ex tic, a ex te juncꞌolaln̈ej eyajeqꞌui, malaj tas tze naꞌa, abꞌec val tas ol val dꞌayex.
10 A ticnaic malaj tas tze naꞌa, palta jun, yabꞌ val icha tic junabꞌ, tzex xivqꞌuei, yujto man̈xalaj sat avbꞌen ol yacꞌaꞌ, man̈xa sat teꞌ uva ol molchajoc.
11 A ex val malaj jabꞌoc tas tze naꞌ tic, xivan̈ec, iqꞌuequel e pichul vachꞌ ayoch eyuuj. Aqꞌuecoch pichul ya svaꞌi, yic tze chꞌoxaneli to ayex och dꞌa syaelal.
12 Chꞌoxequel e cuscꞌolal chiꞌ, yujto ix ixtaxel lum e luum yax sat bꞌaj te vachꞌ tzꞌaj avbꞌen.
13 Yujto axon̈ej teꞌ qꞌuiix yedꞌ an̈ an̈cꞌultac ol qꞌuibꞌcanqꞌue dꞌa yol co chon̈abꞌ yedꞌ dꞌa yoltac juntzan̈ pat bꞌaj tzꞌoch qꞌuin̈ yic tzalajcꞌolal.
14 A spalacio ebꞌ vin̈ nivac yajal, cuseltac ol ajcanoc, ol can tzꞌinan schon̈abꞌ ebꞌ vin̈. A chon̈abꞌ vachꞌ yajoch smuroal, ol ochcan svaynubꞌoc nocꞌ nocꞌ. Ataꞌ ol yicꞌ yip nocꞌ caltacteꞌal bꞌuru dꞌa tzalajcꞌolal, ol laj va nocꞌ vacax taꞌ.
15 Palta ayic ol javoc Yespíritu Jehová dꞌa quibꞌan̈ junelxo, a lum taquin̈ luum, ol yaxbꞌocxi sat luum. Jantac sat avbꞌen ol yacꞌxi dꞌa luum.
16 Axo dꞌa masanil lugar, ol bꞌeybꞌalaj tojolal yedꞌ vachꞌilal.
17 Yujto sbꞌeybꞌalaj tojolal chiꞌ, yuj chiꞌ ay juncꞌolal, tzalajcꞌolal yedꞌ vachꞌ pensaril dꞌa masanil tiempo.
18-19 Vachꞌchom ol laj lan̈chaj te teꞌ yuj qꞌuen sacbꞌat, vachꞌchom ol satel juntzan̈ nación, palta ex vetchon̈abꞌ, juncꞌolal ol ex ajoc, ol eyacꞌ tzalajbꞌoc e cꞌool bꞌaj ol ex cajnajoc.
20 Vachꞌ eyicoꞌ yujto man̈ jantacoc a aꞌ bꞌaj vachꞌ ol och yalil eyavbꞌen, te ay pax bꞌaj ol yal sva nocꞌ e vacax yedꞌ nocꞌ e bꞌuru.