Cachnabꞌil dꞌa ebꞌ sna scolji yuj Egipto
31
Obꞌiltac ebꞌ bꞌat cꞌanan scolval Egipto. A ebꞌ soldado yic Egipto chiꞌ, te nivan sbꞌisul nocꞌ schej ebꞌ yedꞌ scarruaje, te ay pax yip ebꞌ. A juntzan̈ chiꞌ syacꞌoch ebꞌ yipoc scꞌool, palta max qꞌue qꞌuelan ebꞌ dꞌa Jehová sDiosal Israel Axon̈ej Ochi, max scꞌanpax scolval ebꞌ dꞌay.2 Palta te jelan pax Jehová chiꞌ, ol yicꞌcot somcꞌolal dꞌa yibꞌan̈ ebꞌ. Max ecꞌbꞌat tas syal dꞌa spatic jun chon̈abꞌ chuc yedꞌ dꞌa spatic ebꞌ scolvaj dꞌa ebꞌ scꞌulan chucal chiꞌ.
3 A ebꞌ aj Egipto chiꞌ animan̈ej ebꞌ, man̈ Diosoc ebꞌ. Axo nocꞌ schej ebꞌ, nocꞌn̈ej val nocꞌ, tocval espíritu nocꞌ. Yuj val chiꞌ jun, ayic ol yicꞌanchaan̈ scꞌabꞌ Jehová, ol telvoc ebꞌ colvajum, ol telvoc pax ebꞌ scolji, junn̈ej ol aj scham ebꞌ.
4 A Jehová Yajal dꞌa Smasanil ix alan dꞌayin icha tic: Ayic tzꞌel yav nocꞌ nivac choj, ayic van schianbꞌat junoc calnel nocꞌ toxo ix yicꞌaꞌ, maxtzac xivlaj nocꞌ ayic tzꞌel yav ebꞌ tan̈vum calnel xibꞌtani, vachꞌchom tzijtum ebꞌ tzoymaj dꞌa spatictac nocꞌ. Icha chiꞌ ol vutej in bꞌa, malaj mach syal in scachanoch vaan yic tzin emul in col tzalan Sion.
5 Icha syutej nocꞌ much stan̈van yuneꞌ dꞌa yol soꞌ, tzꞌecꞌ jen̈en̈oc nocꞌ dꞌa yibꞌan̈, icha val chiꞌ ol vutej in tan̈van chon̈abꞌ Jerusalén, ol in tan̈vej, ol in colani, xchi.
6 Ex vetisraelal, meltzajan̈ec dꞌa Jehová bꞌaj pit ix eyutej e bꞌa.
7 Yujto ayic ol e chacanel juntzan̈ yechel ix e bꞌo yuj e pitalil, aton juntzan̈ yechel bꞌobꞌil yedꞌ qꞌuen plata yedꞌ qꞌuen oro,
8 ol telvoc Asiria yuj qꞌuen espada man̈ animaoc ol acꞌlabꞌanoc. Ol elcan lemnaj ebꞌ soldado, axo ebꞌ ol yamchajoc, ol ochcan ebꞌ checabꞌoc.
9 Yuj val xivelal, ol bꞌat vin̈ sreyal ebꞌ elelal yedꞌ ebꞌ yajalil ebꞌ soldado, ol yactejcan sbandera ebꞌ. A Jehová ay yic altar dꞌa tzalan Sion, a tzꞌalan jun tic, a yoval scꞌol tzꞌoch scꞌacꞌal dꞌa Jerusalén.