Obꞌiltac ebꞌ snibꞌan scolval Egipto
30
Ix yalan Jehová icha tic:Obꞌiltac ebꞌ anima tzꞌecꞌ val dꞌa yibꞌan̈. Tzijtum tas sna ebꞌ dꞌa yol yicoꞌ, max yal ebꞌ vabꞌi. Comonn̈ej sbꞌo junoc trato ebꞌ schꞌocoj, man̈oc in pax svacꞌ scꞌulej ebꞌ. Yuj chiꞌ te nivan tzꞌaj smul ebꞌ dꞌa yibꞌan̈.
2 Elan̈chamel sbꞌat ebꞌ dꞌa Egipto, max scꞌanbꞌej ebꞌ dꞌayin. Snibꞌej ebꞌ scolji yuj yipal vin̈ sreyal Egipto chiꞌ, syacꞌanoch ebꞌ yipoc scꞌool.
3 Palta a scolval jun vin̈ rey chiꞌ, qꞌuixvelal ol utajcan ebꞌ yuuj, ol somchajcanqꞌue ebꞌ yuj scolval jun nación chiꞌ.
4 Vachꞌchom aybꞌat ebꞌ schecabꞌ ebꞌ dꞌa chon̈abꞌ Zoán yedꞌ dꞌa chon̈abꞌ Hanes,
5 qꞌuixvelal ol utaj ebꞌ yuj Egipto chiꞌ. Malaj jabꞌoc tas ol yicꞌ ebꞌ dꞌay, man̈ ol colvaj jabꞌoc dꞌa ebꞌ. An̈ej to ol qꞌuixvoccanel ebꞌ yuuj, xchi Jehová.
6 A tas ix yal Jehová yuj nocꞌ nocꞌ ay dꞌa yol yic Neguev: A dꞌa jun lugar chiꞌ te ay smay. Ataꞌ cajan nocꞌ choj, jantac yocꞌ nocꞌ taꞌ. Ay nocꞌ ajavchan yedꞌ nocꞌ chan sjen̈vi. Ataꞌ tzꞌecꞌ nocꞌ chej yedꞌ nocꞌ camello scuchanbꞌat sbꞌeyumal chon̈abꞌ Judá yic syacꞌan silabꞌoc dꞌa Egipto, palta a jun nación chiꞌ max colvaj jabꞌoc.
7 A jun nación chiꞌ max yal-laj yuuj, max techaj scolvaji, yuj chiꞌ svacꞌ sbꞌiej icha tic: Nocꞌ te ay smay yel yav, palta malaj tas syal yuuj, xchi Jehová.
8 Ix yalan Jehová dꞌayin icha tic: A ticnaic tzꞌibꞌejcan masanil tas van valan tic dꞌayach dꞌa yichan̈ ebꞌ etchon̈abꞌ tic, yic scan yabꞌixal dꞌa ebꞌ dꞌa juneln̈ej, yic snaann̈ejcot ebꞌ.
9 A ebꞌ anima tic, te pit ebꞌ, yin̈tilal esalvum ebꞌ. Malaj sgana ebꞌ syabꞌ in checnabꞌil a in Jehová in tic.
10 Syalan ebꞌ dꞌa ebꞌ in checabꞌ icha tic: Man̈ eyal dꞌayon̈ tas ix acꞌji eyil chiꞌ. Man̈ eyal lolonel yic tojolal. A sco cꞌanaꞌ to an̈ej lolonel sco nibꞌej scabꞌi, a tzeyalaꞌ.
11 Elan̈ec dꞌa yol co bꞌe. A co Diosal a on̈ israel on̈ tic Axon̈ej Ochi, man̈xo eyalcot dꞌayon̈, xchi ebꞌ, xchi Jehová.
12 Yuj chiꞌ, a in e Diosal in a ex israel ex tic to A inxon̈ej Ochi, sval icha tic: A ex tic ix e patiquejel jun cachnabꞌil, axo pitalil yedꞌ chucal tzeyacꞌoch yipoc e cꞌool.
13 Yuj chiꞌ a eyaelal ol em dꞌa eyibꞌan̈ yuj e mul chiꞌ, lajan ol aj icha junoc muro pojeltacxo, tzꞌeyanxoeqꞌui. Yalxon̈ej janicꞌ ol em lan̈najoc.
14 Ol ex satjoquel icha junoc nivan xalu smacꞌjipojoc, man̈xa nivancꞌolal dꞌay. Axo stitac lum chiꞌ, man̈xa jabꞌoc syal yoch lechlabꞌil, maxtzac yalpax yicꞌjibꞌat jabꞌoc tzacꞌacꞌ dꞌa cusinu yedꞌoc, xchi Jehová.
15 A Cajalil, aton Jehová co Diosal a on̈ israel on̈ tic Axon̈ej Ochi, a tzꞌalan icha tic: Meltzajan̈ec dꞌayin. Aqꞌuec in och yipoc e cꞌool. Man̈ ex och ilcꞌolal. Icha chiꞌ ol aj e colchaji, xchi. Palta max e cha eyabꞌi.
16 An̈ej to tzeyal icha tic: Maay, a on̈ tic ol on̈ qꞌue dꞌa yibꞌan̈ chej, ol on̈ bꞌat elelal, xe chi. Yelton tzeyalaꞌ, ol ex bꞌat elelal chiꞌ. Tzeyalanpax icha tic: Ol on̈ qꞌue dꞌa yibꞌan̈ nocꞌ chej jelan sbꞌeyi, xe chi. Palta yelxo ecꞌbꞌal jelan sbꞌey ebꞌ eyajcꞌol chiꞌ dꞌa eyichan̈.
17 An̈ej dꞌa jun pitan̈ ebꞌ ajcꞌol chiꞌ, jun mil ex ol ex el elelal. Vachꞌchom an̈ej ovan̈oc ebꞌ ajcꞌol chiꞌ, ol ex el elelal e masanil dꞌa ebꞌ. Jayvan̈exxon̈ej ol ex canoc, icha scan lin̈an junoc te teꞌ dꞌa jolom vitz, ma icha bandera dꞌa chon tzalan, xchi Jehová chiꞌ.
A yoqꞌuelcꞌolal Dios dꞌa schon̈abꞌ
18 Palta te nivan tzꞌocꞌ scꞌol Jehová dꞌayex, tan̈vabꞌil ex yuuj. Tato vachꞌ tzeyutej e bꞌa, ol ocꞌ scꞌol dꞌayex, ol ex yacꞌan nivancꞌolal, yujto tojol toni. A ebꞌ tzꞌacꞌanoch Jehová chiꞌ yipoc scꞌool, te vachꞌ yic ebꞌ. 19 Ex aj Sion, ex cajan ex dꞌa Jerusalén, man̈xo ol ex ocꞌoc. A Jehová ol ocꞌ scꞌol dꞌayex ayic ol yabꞌan yel eyav. Ayic ol eyalan e bꞌa dꞌay, ol tacꞌvoc dꞌayex dꞌa elan̈chamel. 20 Vachꞌchom tzex ecꞌ dꞌa scal syaelal yuj Dios Cajal, palta e cꞌaybꞌumal yaji. Man̈xo ol scꞌubꞌejel sbꞌa dꞌayex, palta ol eyil yedꞌ e sat. 21 Tato ol ex el dꞌa e bꞌe, tzex bꞌat dꞌa e vachꞌ, ma dꞌa e qꞌuexan̈, ol eyabꞌ yalji jun lolonel dꞌa e patic icha tic: Man̈ ex bꞌat taꞌ, ina sbꞌat bꞌe tic, bꞌatan̈ec dꞌay, xchama. 22 Ol e patiquejel juntzan̈ yechel nabꞌa plata yedꞌ e comon dios ayoch oro dꞌay, ol eyumancanel icha cꞌalem yajbꞌentac yilji. 23 Ichato chiꞌ bꞌian, ol yacꞌancot n̈abꞌ Jehová chiꞌ dꞌa yibꞌan̈ tas tzeyavej, te vachꞌ ol ajoc. A nocꞌ e vacax dꞌa jun tiempoal chiꞌ, toxon̈ej ol actajcan nocꞌ bꞌaj ol vaoc. 24 A nocꞌ e vacax yedꞌ nocꞌ e bꞌuru smunlaji, vachꞌ ixim cebada ol scꞌux nocꞌ. 25 Ayic ol cꞌoch scꞌual yem lan̈naj yedꞌtal ebꞌ eyajcꞌool, ayic ol cham ebꞌ smasanil, tzijtum aꞌ nivac aꞌ ol elta secnaj dꞌa jolomtac vitz yedꞌ dꞌa tzalquiltac. 26 Axo yoc qꞌuen uj, icha yoc cꞌu ol ajcanoc. Axo pax yoc cꞌu chiꞌ, uquel ol aj yoval yoc. Icha val yoc uqueoc cꞌual ol aj jun cꞌual chiꞌ. A val taꞌ ol bꞌoxoc scꞌol schon̈abꞌ Jehová yuuj. Ichato ol spich yechen ebꞌ lajvinac yuuj.
Yaelal ol javoc dꞌa yibꞌan̈ Asiria
27 Ilecnabꞌ scot Jehová dꞌa najat. A yoval scꞌool lajan icha teꞌ cꞌacꞌ sqꞌue n̈iln̈on yoc. Ayic sloloni, lajan icha teꞌ cꞌacꞌ stzꞌabꞌat tastac yuuj.
28 Yuj slolonel chiꞌ satel ebꞌ ajcꞌool, icha val junoc nivan elumaꞌ tzꞌel dꞌa smelemal, sqꞌuecꞌoch aꞌ dꞌa sjaj ebꞌ. Ol icꞌjocbꞌat ebꞌ ayoch ajcꞌolal dꞌay, icha yel smatzꞌil ixim trigo yuj icꞌ ayic schayaj ixim. Ichato ol acꞌjococh sfreno ebꞌ anima chiꞌ, yic tzꞌicꞌjibꞌat ebꞌ bꞌaj ol satel yuj Jehová chiꞌ.
29 Palta a exxo tic, ol ex bꞌitanoc, icha tzex bꞌitan dꞌacꞌvalil ayic tzꞌoch qꞌuin̈ ayic tze naancot tas aj yelnaccot ebꞌ e mam eyicham dꞌa Egipto. Tzalajcꞌolal eyicoꞌ, icha ayic tze puꞌan e flauta ayic tzex qꞌue dꞌa stzalanil stemplo Jehová Scolumal Israel.
30 Ol yacꞌ Jehová abꞌchaj sjaj, chaan̈ yel yav, ol schꞌoxanel spoder yedꞌ yoval scꞌool, icha teꞌ cꞌacꞌ satanel tastac yedꞌ nivac icꞌ n̈abꞌ yedꞌ scꞌan̈ cꞌu yedꞌ sacbꞌat.
31 Ayic ol yabꞌan sjaj Jehová ebꞌ aj Asiria, ol te xiv ebꞌ, ichato ol macꞌjoc qꞌuichaj ebꞌ yuuj yedꞌ sqꞌuen cꞌococh.
32 Ayic ol spajanoch juntaqueloc scꞌococh Jehová dꞌa ebꞌ aj Asiria chiꞌ, ol och tan̈bꞌil yedꞌ arpa yuj ebꞌ schon̈abꞌ. Te ay smay jun oval ol och dꞌa Asiria yuj Jehová chiꞌ.
33 Yujto toxon bꞌobꞌil jun yedꞌtal vin̈ sreyal Asiria yedꞌ ebꞌ soldado yuj Jehová, bꞌaj ol tzꞌa snivanil ebꞌ. A jun yedꞌtal chiꞌ te levan sat, jul pax yich, bꞌudꞌan yedꞌ teꞌ cꞌatzitz. A Jehová ol acꞌanoch scꞌacꞌal yedꞌ slolonel, ol qꞌue n̈iln̈on yoc icha azufre.