29
Ay..., obꞌiltac val chon̈abꞌ Jerusalén, scuch Yaltar Dios, bꞌaj ecꞌnac cajan vin̈aj David. Ecꞌocabꞌ juntzan̈ qꞌuin̈ tzꞌecꞌtaxoni.2 A Dios ol acꞌanoch ebꞌ anima dꞌa jun chon̈abꞌ tic dꞌa ilcꞌolal yedꞌ dꞌa cuscꞌolal. Ol laj cꞌacvoc ebꞌ yabꞌan syail. Axo jun chon̈abꞌ tic, icha junoc altar ol ajcan dꞌa yichan̈ Dios.
3 Ol scheccot soldado Jehová yic tzul yoyan sbꞌa ebꞌ dꞌa spatictac Jerusalén tic, ol sbꞌoanoch jun muro ebꞌ bꞌaj ol och oyan dꞌa spatictac chiꞌ. Ol sbꞌoanpaxoch sbꞌachteꞌ ebꞌ yic syacꞌan oval ebꞌ yedꞌoc.
4 Ol acꞌjoc telvoc Jerusalén, ichato ol ecꞌcan telan dꞌa sat luum, axo dꞌa sat lum chiꞌ ol lolonqꞌue ebꞌ aj chon̈abꞌ chiꞌ. Toxon̈ej ol qꞌue bꞌulnaj ebꞌ slolon dꞌa cal pococ, icha slolon junoc mach yedꞌ spixan chamnac.
5-6 Axo ol ajoc, elan̈chamel ol yacꞌoch yaelal Jehová dꞌa yibꞌan̈ masanil ebꞌ ayoch ajcꞌolal dꞌa Jerusalén tic. Ol macꞌvaj cꞌu, ol ecꞌ quixcabꞌ, ol ecꞌ nivac oval icꞌn̈abꞌ ayxo smay scꞌan̈i yedꞌ nivac cꞌacꞌ satanel tastac. A ebꞌ ajcꞌol chiꞌ, man̈xo jantacoc sbꞌisul ebꞌ, palta lajan ol ajcan ebꞌ icha lum pococ. A ebꞌ tzex ixtani, ol icꞌchajcanbꞌat ebꞌ icha tzꞌaj yicꞌchajbꞌat smatzꞌil ixim trigo yuj icꞌ.
7 Masanil juntzan̈ chon̈abꞌ man̈xo bꞌischajbꞌenoc chiꞌ, aton ebꞌ tzꞌacꞌan oval yedꞌ jun chon̈abꞌ scuch yaltar Dios, oymajnac ebꞌ dꞌa spatic, spojanem smuroal ebꞌ, lajan ol yutoc sbꞌa ebꞌ icha junoc mach ay tas svayichej dꞌacꞌvalil.
8 A mach ay svejel svayichej svaꞌi, palta axo yic tzꞌel svayan̈, an̈ejaꞌ yoch svejel. Ma icha mach stacji stiꞌ svaycani, axo dꞌa svayich, syuqꞌuej aꞌ syilaꞌ, palta axo yic tzꞌel svayan̈, an̈ejaꞌ stacji stiꞌ, taquin̈ qꞌuilinac yol sjaj. Icha chiꞌ ol aj yelcꞌoch juntzan̈ chon̈abꞌ man̈xo bꞌischajbꞌenoc ayoch yacꞌan oval yedꞌ tzalan Sion tic.
9 Ex aj Jerusalén, bꞌeyan̈ecn̈ej yedꞌ e man̈ pensaril, ichato max eyil jabꞌoc. Ecꞌan̈ecn̈ej quetcon icha ucꞌum an̈, vachꞌchom malaj an̈ tzeyuqꞌuej.
10 Yujto a Jehová ix acꞌancot jun nivan vayan̈ dꞌa eyibꞌan̈. Axo ebꞌ syaloch sbꞌa schecabꞌoc Dios tzꞌilan tas sjavi dꞌa eyibꞌan̈ chiꞌ. A Jehová ix macan spensar ebꞌ, icha tzꞌaj smacchaj sat junoc mach svay yedꞌ junoc cꞌapac.
11 Yuj chiꞌ masanil tas syal ebꞌ schecabꞌ Dios, lajan ol ajcan icha tas tzꞌibꞌabꞌilcan dꞌa junoc tas, palta to macan, ayoch selloal. Tato tzꞌalchaj dꞌa junoc mach syal yavtani: Avtej jun um tic, tato xchi dꞌay, syalan icha tic: Max yal-laj vavtani, yujto macan, ayoch selloal, xchi.
12 Tato tzꞌacꞌchajpax dꞌa junoc mach to max yal yavtani: Avtej jun tic, tato xchi dꞌay, syalani: Max yal-laj vavtani, xchi.
13 Yuj chiꞌ ix yal Jehová dꞌayin icha tic: A juntzan̈ anima tic, stzꞌac yal ebꞌ to tzin yicꞌchaan̈ ebꞌ, stzꞌacan yal ebꞌ to ay velcꞌoch dꞌa yol sat ebꞌ, palta axo val spensar ebꞌ najat yajcanel dꞌayin. Stzꞌac yaqꞌuem sbꞌa ebꞌ dꞌayin, palta an̈ej juntzan̈ schecnabꞌil ebꞌ anima snaqꞌuei, a syacꞌ ebꞌ cꞌaybꞌajoc.
14 Yuj chiꞌ a juntzan̈ tas satubꞌtac yilji ol in chꞌox yil jun chon̈abꞌ tic, toxon̈ej ol sat scꞌol ebꞌ yuuj. A sjelanil ebꞌ jelan yedꞌ yaj pensaril ebꞌ aj pensar, ol sateloc, xchi Jehová.
15 Obꞌiltac val ebꞌ te vachꞌ syutej scꞌubꞌanel tas nabꞌil yuuj yedꞌ tastac scꞌulej ebꞌ dꞌa elcꞌaltac dꞌa Jehová yalani. Syalan ebꞌ icha tic: Malaj mach tzon̈ ilani, malaj mach tzon̈ ojtacaneli, xchi ebꞌ.
16 Palta a ex tic, qꞌuexan̈ tzeyutej. ¿Tocval lajan lum tzꞌacbꞌil lum yedꞌ mach stzꞌacani? ¿Tom syal yalan lum dꞌa mach stzꞌacan chiꞌ icha tic: Man̈oc ach ix in a tzꞌacaꞌ? Mato syal lum icha tic: A ach tic man̈ ojtacoc tas tza cꞌulej, ¿tocval xchi lum dꞌay?
Albꞌilcani to ol colchaj chon̈abꞌ Israel
17 Quenxon̈ej val tiempo ol ochcan lum yax luum bꞌaj sbꞌo munlajel, axo lum bꞌaj sbꞌotaxon munlajel chiꞌ, ol ochcan lum yax lumal.
18 A dꞌa jun cꞌual chiꞌ, a ebꞌ max ujitaxon yabꞌani, ol yabꞌ ebꞌ yavtaj junoc tas tzꞌibꞌabꞌil. Axo ebꞌ max uji yilani, ol yil ebꞌ, ichato ol icꞌchajelta ebꞌ dꞌa scal qꞌuicꞌalqꞌuinal.
19 A ebꞌ emnaquil yaji, ol te tzalaj ebꞌ dꞌa Jehová. A ebꞌ te mebꞌaꞌ, ol te tzalaj ebꞌ dꞌa sDiosal Israel Axon̈ej Ochi.
20 A ebꞌ malaj yelcꞌoch yetanimail dꞌa sat, ol lajvoquem ebꞌ. A ebꞌ pit syutej sbꞌa, man̈xo junoc ebꞌ olto canoc. A ebꞌ an̈ej chucal snaꞌa, ol satel ebꞌ,
21 aton ebꞌ snaanqꞌue esal lolonel dꞌa spatic yetanimail. Aton ebꞌ scachan ebꞌ juez yic max acꞌjioch syaelal ebꞌ chuc, syacꞌan es ebꞌ yic man̈ tojoloc tzꞌaj sbꞌo yaj dꞌa ebꞌ malaj smul.
22 Yuj chiꞌ a Jehová sDiosal Israel, Jun coljinaccanel vin̈aj Abraham, a tzꞌalan icha tic: A ticnaic ex in chon̈abꞌ, ex yin̈tilal vin̈aj Jacob, man̈xa bꞌaj ol ex qꞌuixvoc, man̈xa bꞌaj ol chacbꞌoc e sat yuj qꞌuixvelal.
23 Yujto a ebꞌ eyin̈tilal ol yil ebꞌ tas ol in cꞌulej dꞌa scal, ol yojtaquejel ebꞌ to A inxon̈ej Ochi, nivan ol aj velcꞌoch dꞌa yol sat ebꞌ, a in e Diosal in israel ex tic.
24 A ebꞌ ayoch dꞌa somcꞌolal, ol scꞌaybꞌej jelanil ebꞌ, a ebꞌ bꞌuchumtac ol scha yabꞌ cꞌaybꞌubꞌal ebꞌ, xchi Jehová.