Yabꞌixal chon̈abꞌ Samaria
28
Obꞌiltac chon̈abꞌ Samaria, nivan yelcꞌoch dꞌa yol sat ebꞌ ucꞌum an̈ dꞌa yol yic Efraín. Yelvanubꞌ yaj dꞌa jun acꞌlic yax sat. Lajan pax icha corona xumactac van stacji dꞌa sjolom ebꞌ toxo ix te cham yuj an̈ an̈. A ebꞌ cajan dꞌa Samaria chiꞌ, an̈ej uqꞌuel an̈ syacꞌ ebꞌ.2 A Jehová ix sicꞌanel jun vin̈ vinac te tecꞌan, te jelan dꞌa oval. Ol javoc vin̈ yedꞌ yip, icha yaxn̈abꞌ calan yedꞌ qꞌuen sacbꞌat. Ol javoc vin̈ icha chacxuxum icꞌ smacꞌan chaan̈ tastac, icha pax yic syacꞌan yoval aꞌ bꞌeyumaꞌ yic tzꞌel aꞌ bꞌaj sbꞌeyi. Yuj yip vin̈ chiꞌ, ol em lan̈naj chon̈abꞌ Samaria chiꞌ.
3 A jun chon̈abꞌ nivan yelcꞌoch dꞌa ebꞌ ucꞌum an̈ chiꞌ, ol steqꞌuem jun vin̈ ay yip chiꞌ.
4 A jun chon̈abꞌ ay dꞌa pan̈an te yax sat vachꞌ yilji chiꞌ, aton jun lajan icha junoc taquin̈ corona chiꞌ, ol satjoqueloc. Icha val sat teꞌ higo spet eluli, elan̈chamel slojibꞌat yuj junoc mach tzꞌilani, icha chiꞌ ol aj jun chon̈abꞌ chiꞌ.
5 A dꞌa jun cꞌu chiꞌ, a Jehová Yajal dꞌa Smasanil, icha junoc corona te vachꞌ yilji, icha chiꞌ ol aj dꞌa ebꞌ anima olto can dꞌa schon̈abꞌ. Icha stzalaj junoc mach yedꞌ scorona, icha chiꞌ ol aj stzalaj ebꞌ yedꞌ Jehová.
6 A Jehová chiꞌ ol acꞌan sna ebꞌ juez yic vachꞌ ol yutoc ebꞌ schꞌolbꞌitan yaj ebꞌ anima. Ol yacꞌ pax yip ebꞌ soldado yic stan̈van schon̈abꞌ.
A tas albꞌilcan dꞌa yibꞌan̈ Jerusalén
7 A ebꞌ vin̈ sacerdote yedꞌ ebꞌ vin̈ schecabꞌ Dios, tzꞌecꞌ chꞌumchꞌon ebꞌ vin̈ uqꞌuel an̈, squistalax ebꞌ vin̈ yuj yoval an̈ chiꞌ. Ayic sqꞌue an̈ dꞌa sjolom ebꞌ vin̈ schecabꞌ Dios chiꞌ, scomon naanqꞌue ebꞌ vin̈ yalanel slolonel Dios, axo ebꞌ vin̈ sacerdote chiꞌ, max sbꞌolaj yaj ebꞌ anima ebꞌ vin̈ dꞌa stojolal.
8 Masanil smexa ebꞌ vin̈ mictac sat, xejtac sat yuj ebꞌ vin̈, man̈xa jabꞌoc sat smexa ebꞌ vin̈ chiꞌ vachꞌ.
9 Syalan ebꞌ anima vuj a in tic: ¿Mach snibꞌej jun vinac tic scꞌaybꞌej? ¿A am dꞌa ebꞌ vanto yel dꞌa yim, aton ebꞌ maxtzac chuni?
10 ¿Tas yuj jabꞌjabꞌil yalan vin̈ dꞌayon̈, icha svulvon ebꞌ unin vanto yel stiꞌ? xchi ebꞌ.
11 Tato malaj sgana ebꞌ yabꞌani, a Dios ol acꞌlabꞌan ebꞌ chꞌoc nacional yalan dꞌa ebꞌ, ichato ton̈ej ol vulvon ebꞌ ol yabꞌ ebꞌ.
12 Aton dꞌa ebꞌ bꞌuchvajnac chiꞌ albꞌil icha tic: Ina val icꞌoj ip tic, yicꞌocabꞌ yip ebꞌ cꞌunbꞌinac, siclabꞌocabꞌ scꞌol ebꞌ, xchi Jehová, palta maj schalaj yabꞌ ebꞌ.
13 Yuj chiꞌ, a slolonel Jehová ol alchaj dꞌa ebꞌ dꞌa jabꞌjabꞌil icha svulvon ebꞌ unin vanto yel stiꞌ. Yuj chiꞌ, ayic ol bꞌeyecꞌ ebꞌ pacꞌjabꞌ ol aj stelvi ebꞌ, ol echnaj ebꞌ, ol can ebꞌ dꞌa yaal, ol icꞌjocbꞌat ebꞌ dꞌa chꞌoc nacional.
14 Ex yajal eyaj dꞌa Jerusalén tic, ex bꞌuchumtac, abꞌec val slolonel Jehová:
15 Yujto ix eyal icha tic: Ay co lajtiꞌ yedꞌ yajalil chamel, yuj chiꞌ ayic ol javoc tas ol on̈ sataneloc icha aꞌ elumaꞌ, malaj tas ol on̈ icꞌanoc, yujto a juntzan̈ lolonel es ix cacꞌoch yipoc co cꞌool, ol co col co bꞌa dꞌay, xe chi.
16 Yuj chiꞌ, a Jehová Yajal tzꞌalan icha tic: Ol vaqꞌuem junoc mach yipumaloc Sion. A jun chiꞌ sicꞌbꞌilel vuuj, malaj bꞌaqꞌuin̈ ol sateloc, te nivan yelcꞌochi, lajan icha junoc qꞌuen qꞌueen tzꞌemcan dꞌa yesquinail junoc pat. A ebꞌ tzꞌacꞌanoch yipoc scꞌool, malaj bꞌaqꞌuin̈ ol can ebꞌ dꞌa qꞌuixvelal.
17 A dꞌa Sion chiꞌ, ol vacꞌlabꞌej in tojolal icha tzꞌajem chꞌan̈ cuerda, ma plomo yic yechel pat, xchi Jehová chiꞌ. Palta a es ix eyacꞌoch yipoc e cꞌool chiꞌ, a qꞌuen sacbꞌat ol sataneloc. Axo bꞌaj tze col e bꞌa chiꞌ, a aꞌ elumaꞌ ol cuchanbꞌatoc.
18 A e lajtiꞌ ix eyacꞌ yedꞌ yajalil chamel chiꞌ, ol sateloc. Ayic ol ja jun icha elumaꞌ dꞌa eyibꞌan̈ chiꞌ, ol ex can dꞌa yalan̈ yuuj.
19 Ayic ol javoc dꞌa juntac el, ol ex cuchjocbꞌat yuuj. Junjun qꞌuin̈ibꞌalil, ma cꞌual dꞌacꞌval ol ja dꞌayex. Ayic ol eyabꞌan yabꞌixal jun chiꞌ, ol ex ibꞌxocqꞌueoc.
20 Lajan ol ex aj icha junoc mach svay dꞌa junoc chꞌat tzapan steel yedꞌ junoc cꞌuꞌ lodꞌan sat.
21 Icha yutejnac Jehová yacꞌan oval dꞌa lum svitzal Perazim yedꞌ dꞌa lum yacꞌlical Gabaón, icha chiꞌ ol yutoc scꞌulan junoc tas satubꞌtac, junoc tas man̈ tan̈vabꞌiloc eyuuj.
22 A ticnaic jun, man̈ ex bꞌuchvajoc, yic vachꞌ max nivtaj eyaelal. Ix vabꞌ tas ix yal Jehová Yajal dꞌa Smasanil. Toxo ix snaꞌa to ol satel masanil smacbꞌen jun chon̈abꞌ tic.
23 Maclejec eyabꞌ tas ol valaꞌ, scham val eyabꞌan in lolonel:
24 A junoc vin̈ sbꞌoan smunlajel yic tzꞌavvi, man̈ocn̈ej dꞌocoj lum syacꞌ vin̈ yedꞌ qꞌuen arado, man̈ ton̈ejoc pax ste chocꞌbꞌitej lum vin̈ yedꞌ qꞌuen rastrillo.
25 Ayic toxo ix bꞌo luum, syavan yin̈atil an̈ eneldo vin̈ yedꞌ an̈ comino, syavan pax ixim trigo vin̈ dꞌa stzolal. Axo dꞌa stitac syavej ixim cebada vin̈ yedꞌ ixim avena, icha bꞌaj smoj yavchaji.
26 A Dios tzꞌacꞌan nachajel yuj vin̈ tas tzꞌaj smunlaji.
27 Yujto a an̈ eneldo chiꞌ, max tecꞌchaj an̈, max ecꞌ pax junoc carreta dꞌa yibꞌan̈ an̈ comino chiꞌ. Ton̈ej smacꞌjiel an̈ eneldo chiꞌ yedꞌ junoc te teꞌ, axo an̈ comino chiꞌ, smacꞌchaj an̈ yedꞌ junoc teꞌ jixcꞌabꞌ teꞌ.
28 A ixim trigo stecꞌji ixim, syal yecꞌ junoc carreta dꞌa yibꞌan̈ ixim, palta tato an̈ejaꞌ yecꞌ teꞌ dꞌa yibꞌan̈ ixim, spoj ixim sat chiꞌ.
29 Icha chiꞌ syutej Jehová Yajal dꞌa Smasanil snaan tas ol scꞌulej. Satubꞌtac yilji tas nabꞌil yuuj, tzꞌeln̈ejcꞌoch yuj sjelanil.