Ol el ebꞌ israel dꞌa libre
27
A val dꞌa jun cꞌual chiꞌ, ol yacꞌlabꞌej yespada Jehová, te al, te ay smay, jay pax ye, yic ol yacꞌanoch yaelal dꞌa yibꞌan̈ nocꞌ leviatán, aton nocꞌ chan jelan sbꞌey yolyonoc, syacꞌan yip nocꞌ sbꞌat elelal. Ol macꞌjoccham nocꞌ dragón chiꞌ yuj Jehová, nocꞌ ay dꞌa yol aꞌ mar.2 A dꞌa jun cꞌual chiꞌ ol yal Jehová icha tic:
Bꞌitejec teꞌ snunal uva vachꞌ sat syacꞌaꞌ.*
3 A in Jehová in tzin tan̈vej teꞌ, cotac scal svacꞌanoch yal teꞌ. Tzin tan̈vej teꞌ dꞌa cꞌualil yedꞌ dꞌacꞌvalil, yic vachꞌ malaj tas tzꞌicꞌan teꞌ.
4 Man̈xa voval aycot dꞌa teꞌ. Tato ay teꞌ qꞌuiix, ma comon an̈cꞌultac dꞌa scal teꞌ, tzin tecꞌsatoc, tzin n̈usantzꞌa dꞌa juneln̈ej.
5 Tato snibꞌej ebꞌ ayoch ajcꞌolal dꞌa in chon̈abꞌ chiꞌ scꞌanan in colval, ochocabꞌ ebꞌ juncꞌolal vedꞌoc, xchi Jehová chiꞌ.
6 A dꞌa yic bꞌaqꞌuin̈, a ebꞌ chon̈abꞌ yin̈tilal vin̈aj Jacob, ol yicꞌxi yip ebꞌ. Yuj ebꞌ ol yacꞌxicot svachꞌcꞌolal Dios dꞌa yolyibꞌan̈qꞌuinal tic. Lajan ol aj ebꞌ icha junoc te teꞌ svolani, syacꞌan xumaquil teꞌ, man̈ jantacoc pax sat teꞌ syacꞌaꞌ.
7 A Dios maj yacꞌoch yaelal dꞌa yibꞌan̈ ebꞌ israel icha ix yutej yacꞌanoch dꞌa ebꞌ yajcꞌol ebꞌ. Man̈ masaniloc ebꞌ israel smilnacchamoc, icha yutejnac smilancham masanil ebꞌ miljinaccham ebꞌ israel chiꞌ.
8 Ix yacꞌoch syaelal ebꞌ schon̈abꞌ Jehová, aton yic ix yacꞌan oval ebꞌ, ayic ix icꞌjipaxbꞌat ebꞌ dꞌa chꞌoc nacional. Icha tzꞌaj yicꞌjibꞌat tastac yuj oval icꞌ scot dꞌa stojolal bꞌaj sjavi cꞌu, icha chiꞌ ix aj yicꞌjibꞌat ebꞌ schon̈abꞌ chiꞌ.
9 Palta jun, ol acꞌjoc nivancꞌolal smul ebꞌ yin̈tilal Jacob chiꞌ, an̈ej tato chocꞌ ol yutejcan masanil sqꞌueenal yaltar scomon diosal ebꞌ, icha tzꞌaj spojbꞌat qꞌuen pulubꞌ ayic spolji qꞌueen, tato man̈xa pax junoc te teꞌ yechel Asera ol canoc, ma altar yic incienso yuj yicꞌjichaan̈ scomon diosal ebꞌ. Tato icha chiꞌ ol scꞌuloc ebꞌ, ol sucjoc sat smul ebꞌ.
10 A juntzan̈ chon̈abꞌ te tecꞌan, ol sateloc. Icha teꞌ pat man̈xa yajal, man̈xalaj anima, cuseltacxon̈ej ol ajcanoc. Axon̈ej nocꞌ nocꞌ ol va dꞌay. Ol em cutzan nocꞌ, ol scꞌuxel xil te teꞌ nocꞌ, jixcꞌabꞌtac ol ajcan teꞌ.
11 Axo yic ol tacjoquel teꞌ, ol laj cot locꞌoljoc teꞌ scꞌabꞌ, axo ebꞌ ix ix ol molbꞌan teꞌ cꞌatzitzal. A jun chon̈abꞌ tic, malaj jabꞌoc spensar. Yuj chiꞌ a Jehová bꞌojinac ebꞌ, man̈xo ol cus yuj ebꞌ, man̈xo ol ocꞌ scꞌol dꞌa ebꞌ.
12 A dꞌa jun cꞌual chiꞌ, ay val tas ol scꞌulej Jehová, ichato ol tecꞌvoc trigo. A jantac macbꞌil yuuj bꞌaj ichato ol tecꞌvoc trigo chiꞌ, ol cotn̈ej dꞌa aꞌ Éufrates masanto dꞌa smojonal Egipto. Palta a exxo israel ex tic, junjunal ol ex sicꞌjocchaan̈ yuuj.
13 A dꞌa jun cꞌu chiꞌ, ol pujoc jun qꞌuen nivan trompeta chaan̈ sjaj. A ebꞌ icꞌbꞌilcanbꞌat dꞌa Asiria yedꞌ dꞌa Egipto, ol javoc ebꞌ yic tzꞌoch ejmelal dꞌa Jehová dꞌa jun tzalan yic ejmelal ay dꞌa Jerusalén.