Bꞌit yuj yacꞌchaj ganar oval
26
A dꞌa jun cꞌu chiꞌ, ol co bꞌitej jun bꞌit tic dꞌa yol smacbꞌen Judá, xchi icha tic:Ay val jun co chon̈abꞌ te tecꞌan bꞌaj vachꞌ co colan co bꞌa. A val Jehová ix bꞌoanqꞌue smuroal jun co chon̈abꞌ chiꞌ.
2 Jaquec spuertail co chon̈abꞌ tic yic tzꞌoch jun chon̈abꞌil ebꞌ anima tojol spensar, te cꞌanabꞌajum paxi.
3 Mamin Jehová, a ach tzacꞌn̈ej sjuncꞌolal ebꞌ tecꞌann̈ej spensar, yujto a achn̈ej ayach och yipoc scꞌool ebꞌ.
4 Ayocabꞌn̈ej och Jehová yipoc co cꞌool, yujto an̈ej syal on̈ scolan dꞌa masanil tiempo.
5 A tzꞌicꞌanem ebꞌ acꞌumtac, ebꞌ cajan dꞌa jun chon̈abꞌ syicꞌchaan̈ sbꞌa. Man̈xalaj tzꞌaj yelcꞌoch ebꞌ, ichato tzꞌemcꞌoch sat ebꞌ dꞌa cal pococ.
6 A ticnaic stecꞌjiem jun chon̈abꞌ chiꞌ yuj ebꞌ emnaquil, yuj ebꞌ mebꞌaꞌ, xchi jun bꞌit chiꞌ.
7 Ach Mamin, tojoln̈ej tzutej. A ach tza tojolbꞌitej sbꞌe ebꞌ tzach cꞌanabꞌajani.
8 Mamin Jehová, sco bꞌeybꞌalej juntzan̈ bꞌeybꞌal syal a cꞌaybꞌubꞌal. A val tas sco nibꞌej to naan achn̈ej cuuj.
9 An̈ej dꞌayach ayoch co pensar dꞌa junjun acꞌval, axo dꞌa qꞌuin̈ibꞌalil sco tan̈vej a chꞌoxan a bꞌa. An̈ej yic tzacꞌancot yaelal dꞌa yolyibꞌan̈qꞌuinal tic, ol scꞌaybꞌan sbꞌa ebꞌ anima sbꞌeybꞌalan tojolal.
10 Vachꞌchom tzꞌocꞌ a cꞌol dꞌa ebꞌ chuc, palta max scꞌaybꞌej sbꞌa ebꞌ scꞌulan tojolal. Vachꞌchom dꞌa scal ebꞌ anima vachꞌ spensar cajan ebꞌ, palta an̈ejaꞌ sbꞌeybꞌalan chucal ebꞌ. Malaj yelcꞌoch a poder dꞌa ebꞌ.
11 Mamin Jehová, vachꞌxo yaj syaelal ebꞌ uuj, palta max nachajel yuj ebꞌ. Yilocabꞌ ebꞌ yic tza xajanan a chon̈abꞌ, qꞌuixvocabꞌel ebꞌ. Satocabꞌel ebꞌ yuj yoval a cꞌool vachꞌxo yaj dꞌa ebꞌ ajcꞌol yajoch dꞌayach.
12 Mamin Jehová, uuj vachꞌ ol on̈ ajoc, yujto uuj syicꞌ sbꞌa masanil tas sco cꞌulej.
13 Mamin Jehová co Diosal, ay juntzan̈xo ebꞌ ix och cajaloc, palta snachajel cuuj to a achn̈ej Cajal ach.
14 A ebꞌ chiꞌ chamnacxo ebꞌ, man̈xo ol pitzvoclaj ebꞌ. Man̈xa bꞌaqꞌuin̈ ol ilchaj ebꞌ, yujto toxo ix acꞌoch syaelal ebꞌ. Ix a satel ebꞌ dꞌa juneln̈ej. Man̈xa bꞌaj ol nachajcot ebꞌ.
15 Mamin, a ach ix acꞌ levanbꞌoc co macbꞌen yic vachꞌ tzach icꞌjichaan̈, a ach ix a nitzbꞌat stzꞌacan̈il.
16 Mamin, dꞌa scal syaelal ix ach co sayeqꞌui. Ayic ix acꞌanoch co yaelal chiꞌ yuj co vachꞌiloc, ix on̈ lesalvi dꞌayach dꞌa emnaquilal.
17 Mamin, icha val junoc ix ix toxo val tzꞌalji yuneꞌ, vanxo stacqꞌue scꞌol ix yuj syail, icha chiꞌ ix co cꞌulej dꞌa ichan̈.
18 Icha syail yalji unin, icha chiꞌ ix aj cabꞌan syail, palta malaj unin ix alji dꞌayon̈. Nabꞌan̈ej ix cabꞌ syail, maj on̈ colchajoc, malaj quin̈tilal ol cajan sat luum tic.
19 Mamin, a ebꞌ a chamnac ol pitzvocxi ebꞌ. Ol pitzvocqꞌue ebꞌ vetchon̈abꞌ. A ebꞌ ichato vaynac dꞌa yol luum, ol el svayan̈ ebꞌ, ol el yav ebꞌ dꞌa tzalajcꞌolal. Mamin Jehová, uuj ol pitzvocxi ebꞌ chamnac chiꞌ, icha tzꞌaj sqꞌueul tas avabꞌil dꞌa lum luum dꞌa qꞌuin̈ibꞌalil yuj yal acꞌval.
20 Ex vetchon̈abꞌ, ochan̈ec dꞌa yol e pat, tze macan e pat chiꞌ ayic tzex och chiꞌ. Cꞌubꞌejequel e bꞌa bꞌela, masanto ol ecꞌbꞌat yoval scꞌol Jehová,
21 yujto ol elta Jehová bꞌaj ay, yic syacꞌanoch syaelal masanil anima cajan dꞌa sat lum tic yuj schucal ebꞌ. A lum luum tic man̈xo ol scꞌubꞌejel ebꞌ milbꞌilcham dꞌa luum, palta ol checlajoc machtac miljinaccham ebꞌ.